Samu 18 - The Keyagana NT and 25 OT books

Neviniʼa mani yokemo avoʼmo kaeno mono yokeleʼmo yagaiʼniya vekamo amiʼniye. Ala kava neʼmoʼa Neviniʼmo muki kame vayaʼamogi apayapatiʼe kini vekamo Solo ayapatiʼeʼmo agufamo alino katino ateʼnigenoʼaeʼmo Neviniʼa mani yokemo Ala kava nefeʼmo huno ha paiʼniye

¹ O Ala kava nene, huʼna, kagaemo himamu lokiyaʼnimo aepa vekamo maiʼnane. Kagaefekeʼmo nahau nayamopafiʼmo neʼnahaiye.

² Ala kava neʼmo yafaʼnimo maige avaʼe note lafi kegiʼyaʼnimo maige nagufamo alino katino neʼnateya vekaʼnimo maige huʼniye. Gotiʼnimoʼmo yafakana huno maiʼniyanageʼna aliʼna amufa amiguve. Agaemo haleguʼnimo maige kokuʼnapi uno haiʼniya nokana huno maige huʼneno yagaino nateʼnigeʼna alagepa huʼna maiʼnove.

³ Nagaemo Ala kava neʼmo ala agiʼamo alisiya Ala kava nefeʼmo keya aeʼna ge nehugenoʼaeʼmo kame vayaʼnimogi apayapatiʼmo nagufamo alino katino neʼnate.

⁴ Falisuva kavaʼmo nofigana huno faino vego huno nateʼniye. Hosu vayaʼmo ani hegekana huʼa eʼnageʼnaeʼmo koli huʼnove.

⁵ Fali kavaʼmoʼa faino vego huʼniye. Natafauʼa namagisaya aneʼaimoʼmo asole huʼniye.

⁶ Nagaemo hanageke yaʼmo aliteʼnaeʼmo Ala kava nefeʼmo keya aeʼna ge huʼnove. Nagaemo Gotiʼnimofeʼmo naha mao, huʼna keya aeʼna ge huʼnove. Alopa mono noʼafiʼmo maiʼnenoʼaeʼmo nagemo afiʼniye. Keya aeʼna ge huʼnogeno afiʼniye.

⁷ Agaemo aipamo leʼniyaʼmofeʼmo imima aliʼnigeno mopamoʼmo kanage kanage huʼniye. Avemo aiyafatiʼeʼmo kanage huʼniye.

⁸ Agoʼya katalapatiʼmo halinamo aiʼniye. Avayafatiʼmo ata kinagitaʼe hokanufaʼeʼmo eʼniye.

⁹ Agaemo kokuʼnaʼmo alino kafage kilino emineʼniye. Aiyafiʼmo anupa hiyaʼmo haneʼniye.

¹⁰ Agaemo enisole vekaleʼmo fai maiʼneno halelino eʼniye. Yasimoʼmo avalelino eʼniye.

¹¹ Agaemo hani kavatetiʼmo aino ati kaeʼniye. Alopa anupa hiyaʼmoʼa aeno hau vaino ateʼnigeno fala kino eʼniye.

¹² Anupa hiyapatiʼmo alino alave huteno ko mopa koʼmo aiʼniye.

¹³ Ala kava neʼmoʼa keya aeno ge huʼnigeno hakalu hakalu huʼniye. Alino alave huteno ko mopa koʼmo aiʼniye.

¹⁴ Agaemo keveʼaletiʼmo kame vayaʼamo hapaeno hapafaino apataleʼniye. Alino alave huʼniya yaʼamoʼmo hapaeʼnigeʼa ika ika huteʼa apaune heʼnae.

¹⁵ O Ala kava nene, huʼna, Ge hapauʼnanagenoʼaeʼmo kagoʼya katalapatiʼmo kavamusaʼmoʼa fu huno haleno apataleʼniye. Muki solovalaʼmoʼa aino ati kaeʼniya mopamo afole aiʼnigeno mopamo aepaʼaʼeʼmo afole aiʼniye.

¹⁶ Ala kava neʼmoʼa anagatiʼmo natafauʼneno vasilona anipatiʼmo nagufamo alino katino nateʼniye.

¹⁷ Agaemo lokiya kame vayaʼnimogi apayapatiʼmo nagufamo alino katino nateʼniye. Apakaemo nagaefeʼmo apaini huteʼa kame huʼa aeʼa nagaseʼnayaʼmofeʼmo naha maeʼniye.

¹⁸ Nagaemo kame huʼa nateʼnaya afinaʼmo lusi kana yaʼmo aliʼnovaʼmonanafa Ala kava neʼmoʼa lokiya vaino nateʼniye.

¹⁹ Agaemo hosu kavategatiʼmo navalelineno alagepa koteʼmo nateʼniye. Amuse huno nateʼniyaʼmofeʼmo nagufamo alino katino nateʼniye.

²⁰ Ala kava neʼmoʼa fatago kavaʼnilefeʼmo naha maeʼniye. Nayateʼmo oʼaniʼya ofaiʼniyaʼmofeʼmo anonaʼnilefeʼmo namiʼniye.

²¹ Nagaemo keʼaepa geʼamo akame huʼnovaʼmofeʼmae. Hosu kavaʼmo huʼna Gotiʼnimoʼmo ataleʼna oʼuʼnove.

²² Muki alino fako huʼniya keʼaepa geʼamo akame huʼnove. Nagaemo avoʼmo kae maleʼniya keʼaepa gemo amagiʼna oʼataleʼnove.

²³ Nagaemo aulagaleʼmo mago vaiʼmo oʼaliʼnove. Nagaiʼnileʼmo alagepa huʼna yagaiʼna nateʼnogeno ani hosu kavaʼnimoʼa aeno oʼnaga seʼniye.

²⁴ Ani kava huʼna maiʼnovaʼmofeʼmo Ala kava neʼmoʼa fatago kavaʼnilefeʼmo naha maeʼniye. Agae aulagaleʼmo nayateʼmo mago oʼaniʼya ofaiʼniya kavatefeʼmo anonaʼnilefeʼmo namiʼniye.

²⁵ Kagaemo hapau huʼa neʼapataya vayaʼaifeʼmo kahau huka apategane. Kagaemo vaiʼmo oʼaliʼnisaya vayaʼmo alika apave lisanageʼa vaiʼmo oʼaliʼnana Gotigamo maiʼnane, huʼa kagegae.

²⁶ Yaveyave apaipa vayaʼmogi yaveyave Gotigamo kagegae. Kayagi kayaga kavaʼmo nehaya vayaʼaitegamo kayagi kayaga kavaʼmo hugane.

²⁷ Kagaemo yagu yaga vayaʼmo apakufamo alika katika apateganaʼmonanafa himuʼnamu kavaʼmo nehaya vayaʼmo alika afepiʼmo apategane.

²⁸ Kagaemo lamuʼnifiʼmo kani aeka kaeka natesanageʼna ageʼna alagepa huʼna agegauve. Hanipiʼmo maiʼnogenoʼaeʼmo Ala kava neʼmo Gotiʼnimoʼmo aeno ha leno nateʼniye.

²⁹ Kagaemo lokiya vaika nateʼnanaʼmofeʼmo asole ati vayaʼeʼmo afaʼa kame huguve. Gotiʼnimoʼmo lokiya vaino nateʼniyaʼmofeʼmo nagaemo yafa kegiʼyafatiʼmo afaʼa uʼna haiguve.

³⁰ Gotiʼa nagaetegamo alagepa kavaʼageʼmo nehiye. Muki afinaʼmo huguve, huno polomasi gemo hu maleʼniya geʼamo afole neʼaiye. Gotiʼa agaiʼalegamo eʼa fala nekiya vayaʼai haleguʼapimo maiʼniye.

³¹ Ala kava neʼmo Gotikeʼmo maiʼniye. Gotikeʼmo yafakana huno maiʼneno afaʼa laha maegaiye.

³² Gotikeʼmo lokiya vaino neʼnateyaʼmofeʼmo alagepa huʼna maiʼnove.

³³ Agaemo alagepa afela afugana huno alino hamaleno nateʼnigeʼna alagepa huʼna nagu nagu nehuve. Navaleno alino asagauno anaʼaleʼmo nateʼnigeʼna alagepa huʼna maiʼnove.

³⁴ Agaemo kame hisuvafeʼmo alino naya maleteno alino lokiya vaino nateʼniye. Nagaemo aeni atimo afa yagaiʼna aliʼna lo aegauve.

³⁵ Kagaemo nagufamo alika katika natetekaeʼmo alagepa huʼna maisuvafeʼmo yagaika nateʼnane. Lamaga kayatetiʼmo natafauʼnanageʼna afaʼa asagauʼna oʼaiʼna he tiʼna maiʼnove. Kagaemo vase vase huka naha maeʼnanageʼnaeʼmo ala vekamo hamaleʼnove.

³⁶ Kagaemo alagepa kaʼmo valika nateʼnanaʼmofeʼmo aeʼna halu oʼvaleʼnove.

³⁷ Nagaemo kame vayaʼnimo apavegala aeʼna apatafauʼnove. Apamagime apamagime uʼnogeʼa alagi faliʼa hano huteʼa oʼmaiʼnae.

³⁸ Ago apamagiʼnovanageʼa afaʼa he otigae. Kame huʼna aeʼna apakaseʼnogeʼa naiyafiʼmo maiʼnae.

³⁹ Kame hisuvafeʼmo lokiya vaika nateʼnane. Kame huʼa nateʼnaya vayaʼmo alika afepi apateʼnane.

⁴⁰ Kagaemo hapa faika apataleʼnanageʼa nagaetegatiʼmo ataleʼa apaune heʼnayaʼmofeʼmo nagaefeʼmo apaini nehaya vayaʼmo aliʼna hano huʼna apataleʼnove.

⁴¹ Apakaemo keya aeʼa ge huʼnayaʼmonanafa hapa maesaya vayaʼmo alagi oʼmaiʼnae. Ala kava neʼefeʼmo keya aeʼa ge huʼnayaʼmonanafa alagi oʼafiʼniye.

⁴² Nagaemo aeʼna lata paiʼnogeʼa mumusopamo yasimoʼmo alino halelino neʼviya mumusopagana huʼa hamaleʼnae. Kapatiʼmo hapamo aliʼa neʼatalaya kava huʼna aliʼna yaga auʼna apataleʼnove.

⁴³ Vayaʼnimogimo nataleteʼa kame huʼa nateʼnagekaeʼmo naha maeʼnane. Kagaemo muki nofi vayaʼaiteʼmo yagaiʼna apatesuva kini vekamo alika hamaleka nateʼnane. Oʼapakeʼnova vayaʼmogiʼeʼmo aliʼyaʼnimo alisaya vayaʼmo hamaleʼnae.

⁴⁴ Alu nofi vayaʼmogimo nava gemo afiteʼapaeʼmo malage huʼa geʼnimo akame huʼnae.

⁴⁵ Apakaemo koli huteʼa atete huʼnayaʼmofeʼmo fala kiʼa maiʼnayatetiʼmo ataleʼa nagaetegamo eʼnae.

⁴⁶ Ala kava neʼmo afaʼageʼmo maiʼniye. Nagufamo alino katino neʼnateya Goti agiʼaleʼmo alita asaga higetao.

⁴⁷ Naha maeʼnigeʼna kame huʼna aeʼna apaka seʼnove. Agaemo naiyafiʼmo alino apateʼniye.

⁴⁸ Agaemo kame vayaʼnimogi apayapatiʼmo nagufamo alino katino nateʼniye. He, alika asaga huka nateʼnanageʼna aeʼna apaka seʼnove. Nahaesiyafeʼmo aini huno nateʼniya vekamo ayapatiʼmo nagufamo alika katika nateʼnane.

⁴⁹ O Ala kava nene, huʼna, Muki ani kavaʼmo huʼnanaʼmofeʼmo muki alu nofi vaya alu nofi vayaʼai folagapatiʼmo ala kagikamo kamiguve. Yokemo huʼna kagikaleʼmo aliʼna asaga huʼna kategauve.

⁵⁰ Gotiʼa lekana paino ateʼniya kini vekamo alagepa huno ha maeʼnigeno aeno neʼapakase. Agaemo uvelimo lakino ateʼniya vekaeʼmo hau ayamopafiʼmo hauʼniyanageno oʼatalegaiye. Agaemo Neviniʼe Nevini nofi vayapati vayaʼefeʼmo muki afinaʼmo hau ayamopafiʼmo haume haume neʼviye.