Samu 17 - The Keyagana NT and 25 OT books

Naha mao, huno nunumuʼmo huʼniya gemae

¹ O Ala kava nene, huʼna, Alagepa kavaʼnieʼmo ge hisugekaeʼmo geʼnimo afiyo. Kamalageka hisuvafeʼmo nunumuʼmo osuʼnovanagi kaipamo namiyo.

² Kaulagaleʼmo maiʼnisugekaeʼmo alika fako huka natetekaeʼmo, alagepa kavaʼmo huʼnane, huka huvo. Kagaemo alagepa kavaʼnimo ago.

³ Naipaeʼmo amalageka huʼnane. Kagaemo haniʼilagamo eka nagetekaeʼmo namalageka huʼnanaʼmonanafa hosu nagesamo neʼafuva kavaʼnimo oʼageʼnane. Hosu gemo osuguve, huʼna nagoʼyamo ataleteʼna gemo huʼnove.

⁴ Ma mopafi vayaʼai kavaʼapieʼmo oʼnahauʼnigeʼna nagesamo noʼafuve. Gekamo afiteʼnaeʼmo vayaʼmo nehapaeya vekamo kaʼaleʼmo oʼuʼnove.

⁵ Nagaemo kakaleʼmo neʼuʼnaeʼmo aeʼna halu oʼvalesuvafeʼmo natafauvo.

⁶ O Gotiyo, huʼna, Geʼnimo afaʼa afiganaʼmofeʼmo kagaefekeʼmo ge huʼnove. Kagetafo huʼneka geʼnimo afiyo.

⁷ Lamaga kayatetiʼmo naha maeteka kahau kayamopafiʼmo kahauʼniya kavakamo ageʼna nahau aisuvafeʼmo alika nave liyo. O Gotiyo, huʼna, aliʼa amufa nekamiya vayaʼmogi kame hapaesayafeʼmo huʼnaya vayaʼai apayapatiʼmo apakufamo alika katika neʼapatana Gotigae, huʼna, Naha mao.

⁸ Vayaʼmogimo apaulagaleʼmo alagepa huʼa neʼyagaiya kava huka yagaika nato. Kahakumo ulunapiʼmo alika fala kika nato.

⁹ Hosu vayaʼmogimo kana yaʼmo aliʼa neʼnamiye. Kame vayaʼnimogimo nahaesayafeʼmo yagaiʼa vego huʼa nateʼnayanagi naha mao.

¹⁰ Apaipaguʼe vayaʼmo maiʼnae. Ala apakimo alisayafekeʼmo gemo nehae.

¹¹ Apakaemo faiʼa vego huʼa lateʼnae. Laiyakamo ageteʼa mopafiʼmo aliʼa yaga auʼa latalesayafeʼmo nehae.

¹² Hapaesayafeʼmo yagaiʼa maiʼnaya laiyonigana huʼa maige fala kino maiʼniya aikeli laiyonigana huʼa maige huʼnae.

¹³ O Ala kava nene, huʼna, he tikeka apakaeʼeʼmo fotu nehukaeʼmo mopafiʼmo alika yaga auka apatalo. Kagaemo naipekaletiʼmo hosu vayaʼai apayapatiʼmo nagupi mafaʼnemo alika katika nato.

¹⁴ O Ala kava nene, huʼna, kayatetiʼmo ma mopafi vayaʼai apayapatiʼmo nagufamo alika katika nato. Ma mopafikeʼmo hetamaʼapimo haneʼniye. Kagaemo fala kino haneʼniya alagepa yakamo alika neʼapaminagenoʼaeʼmo apakupafiʼmo havai teʼniye. Mafaʼneʼapimo neʼyaʼmoʼa apamu paeʼniye. Apakaemo kagemi yaʼapimo neʼatalageʼapaeʼmo nute mafaʼneʼapimogi neʼaliye.

¹⁵ Kagemi yaʼapimo neʼaliyaʼmonanafa nagaemo fatago kavakamo aliʼnovanageʼna kaugosafiʼmo kagegauve. Nagaemo naupatiʼmo he tiʼna kagaekana huʼna maiʼneʼnaeʼmo magoʼe huno mago kavafeʼmo nahaʼye osugiye.