Samu 16 - The Keyagana NT and 25 OT books

Gotiʼa agaiʼa vekamo alagepa huno ha maegaiye, huno huʼniya gemae

¹ O Gotiyo, huʼna, nagaemo kagaefekeʼmo aliʼna amufa kamiʼnovaʼmofeʼmo yagaika nategeʼnao afaʼa maino.

^2-3 Nagaemo Ala kava nefeʼmo, Ala kava neʼnimo maiʼnane, huʼna kaha nepauve. Kaha maesuvafeʼmo alagepa kavaʼmo nosufa ma mopafi maiʼnaya apaote vayaʼmo hapa maesuvafekeʼmo alagepa kavaʼmo nehuve. Apakaemo hogote vayaʼmo maiʼnageʼna apakaefekeʼmo amuse huʼna neʼapatove.

⁴ Alu gotiʼapimoʼmo akame hisayafeʼmo apayamukiki nehaya vayaʼmogimo magoʼe huʼa lusi kana yaʼmo aligae. Nagaemo kola ofaliniʼapimo lakiʼna oʼapamige apakiʼapimo oʼaege huguve.

⁵ Ala kava neʼmo hetamaʼnimo maiʼneno aniʼmo kapufatiʼmo neʼnova anikana huno maiʼniye. Hetamaʼnileʼmo alagepa huka yagaika neʼnatane.

⁶ Kagaemo alagepa yaʼageʼmo alika fako huka namiʼnanaʼmofeʼmo amuse nehuve. He, alagepa yaʼmo ago aliʼnove.

⁷ Ala kava neʼmoʼa alino api aino neʼnateyanageʼna agiʼaleʼmo aliʼna asaga huʼna ategauve. Haniʼilagamo nagupi mafaʼnemoʼmo alino naya neʼmale.

⁸ Nagaemo muki afinaʼmo Ala kava neʼmo aliʼna naulagaleʼmo neʼatove. Lamaga nahaopaleʼmo neʼmaiyaʼmofeʼmo alagepa katetiʼmo navaleliʼa oʼvisageʼna aliʼyaʼnimo oʼatalegauve.

⁹ Neʼmaiyaʼmofeʼmo naipafiʼmo namogaga neʼauve. Navayafatiʼmo namogaga neʼauve. Navayagunagu huʼna agava neʼmauvanageno nagufaʼnimo alagepa huno hanesigeʼna maiʼna haga legauve.

¹⁰ Kagaemo mani kavatefeʼmo nagupi mafaʼnemo kanolufiʼmo oʼatalegane. Kagaemo, aote vekaʼnimo agufaʼamo atalesugeno okasaligiye, huka huʼnane.

¹¹ Kagaemo alagepa huʼna maige maige huʼna maisuva kaʼmo alika nave ligane. Kaulagaleʼmo maisaya vayaʼmogimo apaipafiʼmo apamogaga aisaya kavaʼmo havai tegaiye. Lamaga kahaopaleʼmo hapausiya kavaʼmo hanage hanege huno hano osuno hanegaiye.