Samu 149 - The Keyagana NT and 25 OT books

Ala kava nefeʼmo apamogaga aiʼa nehaya yokeeʼmo huʼniya gemae

¹ Ala kava neʼmo agiʼaleʼmo alita asaga hiyo. Saufa yokemo agaefeʼmo hiyo. Apaote vayaʼaʼeʼmo monoteʼmo alita anupa hutetapa agiʼaleʼmo alita asaga hiyo.

² Isaleli vayaʼmogitapae, huʼna, Alo huno lapateʼniya Gotitapimofeʼmo lapamogaga aiyo. Saiyoni taonifi vayane, huʼna, kini vekatapiyeʼmo lapamogaga aiyo.

³ Apaiya aeʼa ohagesaya kavatetiʼmo ala agiʼamo amiyo. Gitamo amagitapa yokemo huta agiʼaleʼmo alita asaga hiyo.

⁴ Ala kava neʼmoʼa vayaʼaeʼmo amuse huno neʼapate. Agaemo apakaiʼapimo aliʼa afepi neʼataya vayaʼai apakufamo alino katino apatesigeʼa alagepa apaulagamo neʼapakaya vayaʼmo maigae.

⁵ Lapaote vayaʼmogitapae, huʼna, hale konali yatapilefeʼmo lapamogaga aiyo. Hipaleʼmo havaeʼneʼapaeʼmo alopa gefatiʼmo yokemo hiyo.

⁶ Apakaemo apavayaletiʼmo Gotiʼa alagepa ala agiʼamo amiyo. Apakaemo lole avetalaʼmo neʼneya naipemo aliyo.

⁷ Apakaemo alu nofi vaya alu nofi vayaʼmogi hosu kavaʼapilefeʼmo kamemo hiyo. Apakaemo muki vayaʼaina kayoʼmo apamiyo.

⁸ Apakaemo kini vayaʼe vayatama vayaʼeʼmo aeni seli nofitetiʼmo aeʼa apategae.

⁹ Gotiʼa kayoʼmo apamiyo, huno huʼniya agufa kavaʼmo hugae. Muki apaote vayaʼmogi ani agufa ala apaki aliʼyaʼmo aligae. Ala kava neʼmo agiʼaleʼmo alita asaga hiyo.