Samu 148 - The Keyagana NT and 25 OT books

Muki kokuʼnate yaʼmogitapaʼe ma mopafi yaʼmogitapaʼeʼmo Ala kava neʼmo agiʼaleʼmo alita asaga hiyo, huno huʼniya gemae

¹ Ala kava neʼmo agiʼaleʼmo alita asaga hutapa ateyo. Lapakaemo anaga kotegatiʼe kokuʼnate kotegatiʼeʼmo Ala kava neʼmo agiʼaleʼmo alita asaga hiyo.

² Lapakaemo muki enisole vayaʼmogitapae, huʼna, agiʼaleʼmo alita asaga hiyo. Lapakaemo muki kokuʼnapi ami vayaʼmogitapae, huʼna, agiʼaleʼmo alita asaga hiyo.

³ Yegemogaʼe kaimogaʼene, huʼna, agiʼaleʼmo alitana asaga hiʼao. Muki aetapa ha nelaya kanefiʼmogitapae, huʼna, agiʼaleʼmo alita asaga hiyo.

⁴ Muga anaga kokuʼnaʼmogae, huʼna, agiʼaleʼmo alika asaga huvo. Anaga kokuʼnate haneʼniya aniʼmogae, huʼna, agiʼaleʼmo alika asaga huvo.

⁵ Agaiʼageʼmo ge huʼnigeʼa afole aiʼnayaʼmofeʼmo ani yaʼmogimo Ala kava neʼmo agiʼaleʼmo aliʼa asaga hiyo.

⁶ Agaemo muki afinaʼmo hanege hanege huno hanesiyafeʼmo maleʼniye. Gemo ago hu maleʼniyanageno geʼamo alagi hano osugiye.

⁷ Lapakaemo muki ma mopafatiʼmo Ala kava neʼmo agiʼaleʼmo alita asaga hiyo. Alopa noyame anaganagi solovala aniʼmo afepilagamo vasilonafiʼmo maiʼnaya yaʼmogitapagi, huta, Ala kava neʼmo agiʼaleʼmo alita asaga hiyo.

⁸ Hiyapatiʼmo alino alave huge koʼmopa koʼmo aige hiyaʼmo kige lokiya yasimo alige nehiya kavaʼaletiʼmo Ala kava neʼmo agiʼaleʼmo alita asaga hiyo.

^9-10 Alopa avegi aise avegi neʼnaya yosa alagamo neʼaeya yosagi yahaofilaga yosagi muki afela afu anaganagi muki pulumaka anaganagi muki alu ya alu yaʼmo mopafiʼmo umenitata nehaya yanagi nama anaganagi hutapa lapakaemo Ala kava neʼmo agiʼaleʼmo alita asaga hiyo.

^11-13 Lapakaemo kini vayanagi muki alu nofi vaya alu nofi vayanagi yagaiʼnaya gamani vayanagi muki agoti gemo neʼafiya vayanagi neya vayanagi aʼmafaʼne anaganagi kosuna vayanagi mafaʼne anaganagi hutapa lapakaemo mukiʼamogitapae, huʼna, apataleʼnigeʼa Ala kava neʼmo agiʼaleʼmo aliʼa asaga hiyo. Ala kava neʼmo agiʼalekeʼmo aliʼa asaga hisaya agiʼamo haneʼniyaʼmofeʼmae. Agaemo ha le konali yaʼamoʼmo muki ma mopafi ha le konali yaʼe kokuʼnate ha le konali yaʼeʼmo ago aeno agaseʼniye.

¹⁴ Muki vayaʼmogimo agiʼaleʼmo aliʼa asaga hisayafeʼmo alino lokiya vaino apateʼniye. Isaleli vayaʼamogimo Ala kava neʼmo aulagaleʼmo maiʼnageno apakaefeʼmo hau ayamopafiʼmo hauʼniye. Ala kava neʼmo agiʼaleʼmo alita asaga hiyo.