Samu 147 - The Keyagana NT and 25 OT books

Apakaemo muki lokiyaʼamo haneʼniya Goti agiʼaleʼmo aliʼa asaga hiyo, huno huʼniya gemae

¹ Lagaemo kanale kavanageta Gotitimo agiʼaleʼmo alita asaga huta hisuna yokemo hugunaʼmofeʼmo Ala kava neʼmo agiʼaleʼmo alita asaga hino. Lamogaga aisuna kavaʼmo haneʼniyanageta ani fatago kavaʼmo higetao.

² Ala kava neʼmoʼa Yulusalemu taonimo halate saufa taonimo nekiye. Agaemo kalavusi huʼa apateteʼa apavaliʼuʼa apateʼnaya vayaʼmo apavalelino eʼniye.

³ Agaemo hosu kavaʼapieʼmo apaipamoʼmo kana nehiya vayaʼmo alino hapageno apateteno apaipafatiʼmo apakafu kiʼniya kavaʼapileʼmo hayaeno neʼapate.

⁴ Agaemo kanefiʼm lekana nepaiye. Magoke magoke kanefiʼmogi apakiʼapimo neʼae.

⁵ Ala kava netimo ala agi vekamo maiʼnigeno lokiya himamuʼamo haneʼniye.

⁶ Ala kava neʼmoʼa apakiʼapileʼmo aliʼa afepiʼmo neʼataya vayaʼmo alino asagauno apategaiyaʼmonanafa hosu vayaʼmo mopafiʼmo alino yaga auno neʼapatale.

⁷ Lapakaemo Ala kava nefeʼmo haoke hetapa yokemo hiyo. Gotitimofeʼmo gitamo amagita feliyopaʼmo hino.

⁸ Agaemo kokuʼnateʼmo hiyatetiʼmo aino ati kaege koʼmo aisiyafeʼmo alo huge nehiye. Ina kava huno kahaumo lagisiyafeʼmo koʼmo alino atalegeno emineneʼe.

⁹ Agaemo muki alu afu alu afumo neʼyaʼmo apamige nama agapamo neʼyaʼmo apamige nama agapamoʼmo neʼyafeʼmo ge nehagenoʼaeʼmo neʼyaʼmo apamige nehiye.

¹⁰ Ala kava neʼmoʼa lokiya hosieʼmo amuse osuge vayaʼai lokiya apaiyaeʼmo amuse osuge nehiyaʼmonanafa.

¹¹ Ala kava neʼmoʼa vayaʼmogimo agaefeʼmo koli nehaya vayaʼaifeʼmo amuse huge hau huno neʼapateya kavafeʼmo aliʼa amufa neʼamiya vayaʼaifeʼmo amuse huge nehiye.

^12-13 Agaemo Yulusalemu taonile kegiʼyale kitakamo alino lokiya vaino ateteno vayakamo alagi alino auleno apateʼniyaʼmofeʼmo lapakaemo Yulusalemu vayane, huʼna, Ala kava neʼmo agiʼaleʼmo alita asaga hiyo. Ina kava hutapa Saiyoni taonifi vayane, huʼna, Gotitapimo agiʼaleʼmo alita asaga hiyo.

¹⁴ Agaemo mopatapileʼmo alagepa huno yagaino nelapategeʼapaeʼmo vagaʼmogi eʼa lapakaeʼeʼmo kame osuʼnageta alagepa hutapa maiʼnae. Alagepa hogote vitimo hoyafatiʼmo alino afole aino neʼategetapa lapakaemo netapa lapamu nehae.

¹⁵ Agaemo hunoʼaeʼmo, Hiyo, huno huʼniya gemoʼmo malage huno muki haopalegamo aino atagu faino uʼniye.

¹⁶ Agaemo sipisipimo yaveyave ayokakana koʼmopamo alino ataleʼnigeno emine neʼe. Agaemo lao yaʼmo mumusopagana huno alino neʼatale.

¹⁷ Agaemo asole koʼmopa koʼmo mapologana huno alino ataleʼnigeno emineʼe. Agaemo yasimoʼmo nehiya kavaʼmo nehiyanageʼa ina lagimo afaʼa alagepa huʼa maigae.

¹⁸ Inagi henagaʼamo agaemo halate ge nehigenoʼaeʼmo koʼmopamoʼmo aniʼmo alino hamaleʼniye. Agaemo yasimo alino atesigenoʼaeʼmo aisimoʼmo aniʼmo alino hamaleteno uno lamigiye.

^19-20 Agaemo Yekopu vayaʼaeʼmo geʼamo aeno hakalo huno hapa nepaiye. Agaemo Isaleli vayaʼaifeʼmo avoʼmo kaeʼa maleʼnaya keʼaepa geʼe alino fako huʼniya geʼeʼmo hapa nepaiye. Alu nofi vayaʼaifeʼmo ani gemo hapa opaiʼniye. Apakaemo alino fako huʼniya gemo oʼafiʼnae. Ala kava neʼmo agiʼaleʼmo alita asaga hiyo.