Samu 146 - The Keyagana NT and 25 OT books

Apakaemo agaemo hapa neʼmaya kavatefeʼmo Goti agiʼaleʼmo aliʼa asaga huʼnaya gemae

¹ Ala kava neʼmo agiʼaleʼmo alita asaga hiyo. Agupi mafaʼneyo, huʼna, Ala kava neʼmo agiʼaleʼmo alika asaga huvo.

² Nagaemo ma mopafiʼmo muki maisuva afinaʼmo agiʼaleʼmo aliʼna asaga huguve. Nagaemo muki afinaʼmo afaʼa maiʼneʼnaeʼmo Gotiʼnimo agiʼaleʼmo aliʼna asaga huguve.

³ Ala apaki vayaʼmogiʼe muki ma mopafi vayaʼmogiʼeʼmo afaʼa lapa oʼmaegae. Alita amufa oʼapamiyo.

⁴ Apakaemo falisaya afinaʼmo halate aiʼa afeleʼa mopamo aliʼa hamalegae. Ani afinaʼmo apakaemo muki hugune, huʼa apakesamo neʼafiya kavaʼmo afaʼa osugae.

⁵ Mago vekamoʼmo hunoʼaeʼmo, Yekopu Gotiʼamoʼmo naha maegaiye, huno agesamo neʼafiya vekamoʼmo amogaga neʼaiya vekamae. Agaemo Ala kava neʼmo Gotiʼamofeʼmo alino amufa amiʼniyaʼmofeʼmo amogaga neʼaiye.

⁶ Ani Gotiʼmo kokuʼnanagi ma mopagi solovala aninagi ani yateʼmo muki maiʼnaya yanagi huno alo huʼniye. Agaemo muki afinaʼaeʼmo agaiʼa geʼamo akame nehiye.

⁷ Agaemo vayaʼai apaiyafiʼmo maiʼnaya vayaʼaitegamo fatago kavaʼmo nehiye. Ala kava neʼmoʼa apaka neteya vayaʼaina neʼyaʼmo apamige kalavusi huʼa apateʼnaya vayaʼmo hatu maeno apatege nehiye.

⁸ Ala kava neʼmoʼa apaulagamo ali huʼniya vayaʼmo alino ayakeno apatege kana yaʼmoʼa alino afepiʼmo apateʼnigeʼa maiʼnaya vayaʼmo alino asaga huno apatege fatago vayaʼaifeʼmo hau ayamopafiʼmo hauge nehiye.

⁹ Agaemo alu kotegatiʼmo eʼa maiʼnaya vayaʼaiteʼmo alagepa huno yagaino apatege megusa mafaʼne anagaʼe kogu aʼne anagaʼeʼmo hapa maege nehiyaʼmonanafa hosu vayaʼmogimo nehaya kavaʼapimo alino hosu huno neʼatale.

¹⁰ Ala kava neʼmoʼa muki afinaʼae afinaʼaeʼmo kini vekamo maiteno yagaino apategaiye. Lapakaemo Saiyoni vayane, huʼna, Gotitapimoʼmo kini vekatapaimo muki afinaʼae afinaʼaeʼmo maigiye. Ala kava neʼmo agiʼaleʼmo alita asaga hiyo.