Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Samu 145 - The Keyagana NT and 25 OT books


Gotiʼa alagepa kavaʼmo nehiye, huno huʼniya gemae

1 Gotiʼnimogamo kini vekaʼnimogae, huʼna, kagaefekeʼmo ala vekamo maiʼnane, huʼna huguve. Muki afinaʼmo kagikaleʼmo aliʼna auleʼna kategauve.

2 Muki afinaʼae afinaʼaeʼmo aliʼna auleʼna kategauve. Muki afinaʼmo kagikaleʼmo aliʼna asaga huge huge huʼna maiguve.

3 Ala kava neʼmo ala vekamo maiʼniyaʼmofeʼmo agiʼaleʼmo aliʼa asaga huʼa atesaya vekamo maiʼniye. Ala agiʼamo haneʼniyaʼmofeʼmo ageta aeto osugune.

4 Itaʼapi afoʼapimogimo huʼnana kavafeʼmo, lusi alagepa kavaʼmo huʼniye, huʼa aliʼa apatesaya mafaʼne anagaʼapieʼmo kava gemo huʼa hapa paitesageʼapaeʼmo apakaemo henagaʼamo aliʼa apatesaya mafaʼne anagaʼapieʼmo kava gemo huʼa hapa paite hapa paite huliʼa ugae.

5 Apakaemo kagaefeʼmo huʼapaeʼmo, ha le konali yaʼagi ala agiʼagi huno haneʼniya vekamo maiʼniye, huʼa hisageʼnaeʼmo nagaeʼeʼmo aeto agufa kanale kavakaeʼmo nagesa afifi huʼna maiguve.

6 Vayaʼmogi lokiya kavaʼmo nehana kavakaeʼmo kava gemo hisageʼnaeʼmo nagaeʼeʼmo, ala vekamo maiʼniye, huʼna huguve.

7 Apakaemo kanale alagepa kavaʼmo nehana kavafeʼmo kava gemo huʼa hapa paige fatago kavakaeʼmo yokemo huge hugae.

8 Ala kava neʼmoʼa fikumo laha maeno lamige hau huno latege malage huno aipamo leno olatege hau ayamopafiʼmo hauge nehiye.

9 Agaemo muki vayaʼaitegamo alagepa kavaʼmo huteno muki alo hu maleʼniya yategaʼeʼmo hau huno neʼapate.

10 O Ala kava nene, huʼna, muki alo huʼnana vayaʼmogiʼe yaʼmogiʼeʼmo kagikaleʼmo aliʼa asaga hugae. Muki vayakamogimo aliʼa auleʼa kategae.

11-12 Apakaemo muki vayaʼmogimo lokiya kavaʼmo nehana kavakaʼe ha le konali yakaletiʼmo yagaiʼnana kavakaleʼefeʼmo ava gemo afisayafeʼmo yagaiʼnana kavafeʼmo huʼapaeʼmo, lokiya himamuʼaletiʼmo ani kavaʼmo nehiye, huʼa hugae.

13 Muki afinaʼmo yagaime yagaime ugane. Ala kava neʼmoʼa, ina kavaʼmo huguve, huno huʼniya gemo akame huno ani kavaʼmo nehiye. Muki nehiya kavaʼamo alagepa kavaʼageʼmo haneʼniye.

14 Agaemo hanageke yaʼmo neʼaliya vayaʼmo hapa maege asagauʼa aiʼnaya vayaʼmo alino he tino apatege nehiye.

15 Muki afaʼa neʼmaiya yaʼmogiʼe vayaʼmogiʼeʼmo apaka neteya afinaʼmo kagaefeʼmo apakesamo neʼafigekaeʼmo neʼyaʼmo neʼapamine.

16 Hapauʼnigekaeʼmo neʼapamine.

17 Ala kava neʼmoʼa muki afinaʼmo ani kavaʼmo nehunoʼaeʼmo fatago kavaʼmo huge yagu yaga kavaʼmo huge nehiye.

18 Ala kava neʼmoʼa agaefeʼmo apaipafatiʼmo hapauʼnigeʼa keya aeʼa ge nehaya vayaʼai hapaopaleʼmo emineno neʼmaiye.

19 Agaefeʼmo koli huʼneʼa mono nehaya vayaʼaiteʼmo hapauʼnisiya kavaʼmo afaʼa hugiye. Keya aeʼa ge nehagenoʼaeʼmo apakufamo alino katino neʼapate.

20 Ala kava neʼmoʼa agaefeʼmo hapau apayamofiʼmo hapauʼniya vayaʼaiteʼmo yagaino neʼapategeʼa afaʼa neʼmaiye. Afaʼa neʼmaiyaʼmonanafa muki hosu vayaʼmo alino apagoʼya lagauno apatalegaiye.

21 Muki afinaʼmo Ala kava neʼmo agiʼaleʼmo aliʼna asaga huʼna ategauve. Muki afinaʼmo muki afaʼa neʼmaiya yaʼmogiʼe vayaʼmogiʼeʼmo aote agiʼaleʼmo aliʼa asaga hiyo.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ