Samu 143 - The Keyagana NT and 25 OT books

Mago vekamoʼmo Gotiʼa ha maesiyafeʼmo ayamukiki huno nunumuʼmo huʼniya gemae

¹ O Ala kava nene, huʼna, kagaemo nunumu geʼnimo afiyo. Naha maesanafeʼmo aukaya huʼna ge nehuva geʼnimo kagetafo huka afiyo. Kagaemo fatago vekamogamo muki afinaʼaeʼmo alagi lama geʼageʼmo nehana vekamogae, huʼna, nunumu geʼnimo afiteka naha mao.

² Kaulagaleʼmo mago fatago vekamo oʼmaiʼniyaʼmofeʼmo aliʼyakamo neʼaluva vekamo agoti huka oʼnato.

³ Kame vekaʼnimoʼmo nagupi mafaʼnemo avegala aeteno ma mopafiʼmo alino ateʼniye. Agaemo hani kopiʼmo alino nateʼnigeʼna akeyaʼvilagamo faliʼnaya vayakana huʼna hani kopiʼmo maiʼnove.

⁴ Maiʼnovaʼmofeʼmo nagupi mafaʼnemo faligekana huno maiʼnigeʼnaeʼmo naipamoʼmo lusi kava huno kana huʼniye.

⁵ Nagaemo akeyaʼvilagamo afole aiʼniya kavafeʼmo nagesamo afiʼnove. Nagaemo kagaemo huʼnana kavafeʼmo nagesa afifi huʼna maiʼnove. Nagaemo kayatetiʼmo aliʼnana aliʼyakaeʼmo nagesa afifi huʼna maiʼnove.

⁶ Nagaemo kagaefeʼmo nayaʼmo aliʼna asaga nehuve. Hau huʼniya mopamoʼmo koʼmo aisiyafeʼmo hauʼniya kava huno nagupi mafaʼnemoʼmo kagaefeʼmo lusi kava huno alagi hauʼniye.

⁷ O Ala kava nene, huʼna, Geʼnimo afiteka malage huka naha mao. Nauneʼnameʼnimo faligekana huno maiʼniye. Kagaemo nagaefeʼmo fala okiyo, fiku yanageʼna faliteʼa alopa kelifiʼmo uʼa lamiʼnaya vayakana huʼna maiguve.

⁸ Kagaefeʼmo aliʼna amufa nekamuvaʼmofeʼmo netepiʼmo nagaefeʼmo kahau kayaʼmopafiʼmo kahauge kahauge huno neʼmaiya kavafeʼmo nagesamo afisuva kavaʼmo huvo. Nunumuʼmo huʼnaeʼmo nagupi mafaʼnemo kagaetefeʼmo aliʼna asaga nehuvaʼmofeʼmo visuva kaʼmo alika nave liyo.

⁹ O Ala kava nene, huʼna, yagaika natesanafeʼmo kagaetegamo naune heʼna uʼna maiʼnovanagi kame vayaʼnimogi apayapatiʼmo nagufamo alika katika nato.

¹⁰ Kagaemo Gotiʼnimogamo maiʼnanaʼmofeʼmo kahauʼniya kavaʼmo hisuvafeʼmo alika naya malo. Kaumekameʼmo alagepa aunemeʼmo maiʼnenoʼaeʼmo alagepa kateʼmo alino api aino nateno.

¹¹ O Ala kava nene, huʼna, kagikalefeʼmo alika he tika nato. Fatago kavakalefeʼmo kana yapatiʼmo nagupi mafaʼnemo alika katika nato.

¹² Nagaemo aliʼyakamo neʼaluva vekamo maiʼnovaʼmofeʼmo muki afinaʼmo kahau kayamopafiʼmo kahaume kahaume neʼviya kavatetiʼmo kame vayaʼnimo kamitimo apamagige nagupi mafaʼnemo aliʼa hosu huʼa neʼataya vayaʼmo apamagige huvo.