Samu 142 - The Keyagana NT and 25 OT books

Mago vekamoʼmo Gotiʼa ha maesiyafeʼmo nunumuʼmo huʼniya gemae

¹ Nagaemo alopa gefatiʼmo Ala kava nefeʼmo ge nehuve. Ala kava nefeʼmo ge huʼna afinegove.

² Nagaemo oʼnahauʼniya kavafeʼmo ha paige nagaetegamo afole aiʼniya kana yafeʼmo ha paige huʼna maiʼnove.

³ Nagaemo naipamoʼmo magoʼe huno kana huʼniya afinaʼmo neʼuva kaʼmo ago ageʼnane. Kame vayaʼnimogi nagae kateʼmo mago umenimoʼmo natafausiyafeʼmo ago fala ki maleʼnae.

⁴ Kagaemo lamaga nahaopaleʼmo ago. Alagepa huʼna maisuvafeʼmo mago yagaino natesiya vekamo oʼmaiʼniye. Mago ayu noʼnimo ohaneʼniye. Muki vayaʼmogi afaʼa maisuvafeʼmo apakesamo noʼafiye. Mago vekamoʼmo nagupi mafaʼneeʼmo agesamo oʼafiʼniye.

⁵ O Ala kava nene, huʼna, Kagaefeʼmo alopa gefatiʼmo keya aeʼna ge huʼnove. Kagaemo ayu noʼnimo maiʼnane, huʼna keya aeʼna ge huʼnove. Ma mopafiʼmo maiʼneʼnaeʼmo mago yaʼmo alisuvafeʼmo oʼnahauʼnifa kagaemo nagaeʼeʼmo magokepiʼmo lokaeka maisanafekeʼmo nahauʼniye.

⁶ Alagi afepilagamo maiʼnovanagi kagaefeʼmo naha mao, huʼna keya aeʼna ge huʼnova gemo afiyo. Kame vayaʼnimogi lokiyaʼapimoʼmo lokiyaʼnimo aeno nagaseʼniyaʼmofeʼmo apayapatiʼmo nagufamo alika katika nato.

⁷ Kagaemo nagaemo kagikaleʼmo aliʼna asaga hisuvafeʼmo nagupi mafaʼnemo kalavusifatiʼmo alika katika ato. Kagaemo nagaetegamo lusi kava huka alagepa kavaʼmo huganaʼmofeʼmo fatago vayakamo aliʼa anupa hisaya folagapiʼmo maiguve.