Samu 141 - The Keyagana NT and 25 OT books

¹ O Ala kava nene, huʼna, Nagaemo kagaefeʼmo keya aeʼna nunumuʼmo nehuve. Malage huka naha mao. Nagaemo kagaefeʼmo keya aeʼna ge hisuva afinaʼmo kagetafo huka afiyo.

² Vayaʼmogi kagaemo alagepa atumo neʼaiya ofalini yafeʼmo amuse nehana kava huka nunumuʼmo nehuva geʼnieʼmo amuse huʼneka afiyo. Nayaʼmo aliʼna asaga huʼneʼna nunumuʼmo nehuva kavaʼnimoʼmo uneʼmo afumo amagiʼa ofalinimo nekamiya yakana hino.

³ O Ala kava nene, huʼna, kagaemo navayaleʼmo alagepa huka yagaika nato. Geʼnileʼmo alagepa huka yagaika nategeʼnao hosu gemo osino.

⁴ Nagaemo hosu kavaʼmo hisuvafeʼmo afaʼa nateʼnegenoʼa alino he tino oʼnateno. Fiku yanageʼna hosu kavaʼmo nehaya vayaʼeʼmo hosu kavaʼmo huguve. Kagaemo natalegeʼna haga neʼyaʼapimo apakaeʼeʼmo magokepiʼmo afaʼa oʼneno.

⁵ Fatago vayaʼmogimo namagisayana kanalene. Nao vayaʼmogi hisaya kavaʼmo haneʼniyaʼmofeʼmae. Aliʼa api aiʼa natesaya kavaʼmoʼa alagepa uveligana huno haneʼniye. Ani kavaʼmo hisageʼnaeʼmo nakameʼyamo oʼapamiguve.

⁶ Yagaiʼa neʼapataya vayaʼmo alopa yafateʼmo yaga auʼa apatalesageʼa apasagauʼa aisaya afinaʼmo geʼnimo afiteʼapaeʼmo, Haga gemo hiye, huʼa hugae.

⁷ Layamufamo aliʼa kanolufiʼmo yaga auʼnageno haneʼniye. Vayaʼmogimo yosamo apalotiteʼa atanaʼamo aliʼa yaga auʼa ataleʼnaya kava huno layamufamo haneʼniye.

⁸ Haneʼniyaʼmonanafa Ala kava neʼmo Gotiyo, huʼna, naha maesanafeʼmo kagaefekeʼmo aulu heʼna nekagove. Kagaepiʼmo fala kiʼna maiʼnovaʼmofeʼmo oʼnatalo. Nagupi mafaʼnemo hosu kava huno maisiyafeʼmo oʼnato.

⁹ Nagaemo faika vego huka natesanageʼa hosu vayaʼmogimo umenimo fala ki maleʼnisageno oʼnatafaino.

¹⁰ Hosu vayaʼmogimo apakaiʼapimo ae maleʼnisaya umenimoʼmo apatafausiya kavaʼmo huvo. Apatafaugiyaʼmonanafa nagaemo afaʼa faiʼna kasalo paeʼna uguve.