Samu 140 - The Keyagana NT and 25 OT books

Neviniʼa huʼniya yokemae

¹ Ala kava nene, huʼna, hosu vayaʼai apayapatiʼmo nagufamo alika katika nato. Kagaemo alagepa huka yagaika nategeʼa kaveta nehaya vayaʼmogi aliʼa hosu huʼa oʼnategae.

² Muki afinaʼaeʼmo apakaemo hosu kavakeʼmo hisayafeʼmo apakesamo afiteʼapaeʼmo ge neʼvaiya kavaʼmo aliʼa he tiʼa neʼatae.

³ Apavenafuʼnamo vayaʼmo nehapaeya nagaloʼyavegana huno haneʼnigeʼa geʼapiletiʼmo nagaloʼyavemoʼmo hapaeʼnigeʼa nefaliya analisagana huno haneʼniye.

⁴ Ala kava nene, huʼna, Alagepa huka yagaika nategeʼao aliʼa hosu huʼa oʼnateyo. Apakaemo aliʼa hosu huʼa natesayafeʼmo apakesamo neʼafiyanagi naha mao.

⁵ Himuʼnamu vayaʼmogimo natafausiyafeʼmo aneʼaiʼmo hanagi malege kaʼnileʼmo umenimo malege nehae.

⁶ Nagaemo Ala kava nefeʼmo huʼnaeʼmo, Kagaemo Gotiʼnimogamo maiʼnane. O Ala kava nene, huʼna, Naha mao huʼna keya neʼaova geʼnimo afiyo.

⁷ O Gotiyo, Ala kava neʼnimogae, huʼna, Kagaemo lokiya vekaʼnimogeka nagufamo alika katika neʼnatane. Nagaeʼeʼmo kamemo nehagekaeʼmo nagenopaleʼmo aika nati nekane.

⁸ O Ala kava nene, huʼna, Hosu vayaʼmogimo alisayafeʼmo hapauʼnisiya kavaʼmo hisayafeʼmo hapa oʼmao. Hugune, huʼa apakesamo afiʼnaya kavaʼmo hisayafeʼmo afaʼa oʼapatalo. Fiku yanageʼa apakiʼapileʼmo aliʼa asaga hugae.

⁹ Kagaemo kame vayaʼnimo afaʼa apateʼnegeʼa faiʼa vego huʼa oʼnateyo. Apakaemo, alita hano huta katalegaune, huʼa nehayaʼmonanafa kagaemo apakaiʼapi legageʼmo hugenoʼa afole aino.

¹⁰ Kagaemo hokanufa atamo apakaeteʼmo asagauno aisiya kavaʼmo huvo. Kagaemo apakaemo ata neleya atafiʼmo lusi kava huno afepilaga lamiʼniya kelifiʼmo alika yaga auka apatalegeʼao uʼa lamiteʼapaeʼmo eʼa hai oʼmeyo.

¹¹ Aigofe gemo huteʼa huʼa faipa huʼa neʼapataya vayaʼmo afaʼa apateʼnegeʼa ma mopafiʼmo lokiya vaiʼa oʼmaiyo. Kaveta hisayafeʼmo nehaya vayaʼmogeno apakaeteʼmo hosu kavaʼmo afole aiteno alino hano huno apataleno.

¹² Nagaemo ago afiʼnovana Ala kava neʼmoʼa kana yaʼmo neʼaliya vayaʼaina hapa maege kafu nehaya vayaʼaina hapa maege nehiye.

¹³ Fatago kavaʼmo nehaya vayaʼmogimo kagi kalefeʼmo kahaoke hegae. Ani agufa vayaʼmogi kagaeʼeʼmo magokepi lokaeʼa maigae.