Samu 14 - The Keyagana NT and 25 OT books

Hosu vayaʼai kavaʼapieʼmo huʼniya gemae

¹ Negi nagi vayaʼmogimo apaipafiʼmo, Gotiʼa oʼmaiʼniye, huʼa nehae. Afumo nefaligenoʼaeʼmo apakufamo nekasaliya kava huʼa hosu vayaʼmo maiʼnae. Gotiʼa avenatuʼnaʼmo heno neʼapateya kavaʼmo nehae. Magoke vekamoʼmo alagepa kavaʼmo nehiya vekamo alagi oʼmaiʼniye.

² Gotiʼa kokuʼnapatiʼmo apakenoʼaeʼmo, Mago ageteʼa afiʼnaya vayaʼmo maiʼnafi mago vayaʼmogi kahauya huʼa nagesayafeʼmo nehafi huno apakeʼniye.

³ Apakeʼniyaʼmonanafa mukiʼamogimo alagepa kaʼmo ago ataleʼa magoke aiyaya huʼa hosu vayaʼmo maiʼnae. Alagepa kavaʼmo nehaya vayaʼmo alagiʼato oʼmaiʼnae. Magokeʼatomo alagi oʼmaiʼniye.

⁴ Gotiʼa hunoʼaeʼmo, oʼafiʼneʼa hosu kavaʼmo nehaya vayaʼmo negi nagi vayaʼmo maiʼnafiye. Neʼyaʼmo neʼnaya kava huʼa vayaʼnimo apamagiʼa hano huʼa apataleteʼa Gotifeʼmo nunumuʼmo nosae, huno huʼniye.

⁵ Gotiʼa fatago vayaʼmogiʼeʼmo magokepiʼmo lokaeno maiʼniyaʼmofeʼmo ani hosu vayaʼmogi lusi kava huʼa koli hugae.

⁶ Afa vayaʼmogi ina kava ma kavaʼmo hugune, huʼa apakesamo neʼafiyaʼmonanafa hosu vayaʼmogimo ani apakesamo neʼafiya kavaʼmo afole oʼaisiyafeʼmo kaʼmo akanisayafeʼmo huʼnayaʼmofeʼmo Ala kava neʼmoʼa afa vayaʼmo alagepa huʼa maisayafeʼmo yagaino apategaiye.

⁷ Nahauʼniyanageno mago vekamo Saiyoni kotegatiʼmo eno Isaleli vayaʼmo hapa maesigeʼa aeʼa apakasegae. Gotiʼa hapa maesigeʼapaeʼmo Isaleli vayaʼmo halate alagepa huʼa maiteʼa lusi kava huʼa apamogaga aigae.