Samu 139 - The Keyagana NT and 25 OT books

Gotiʼa muki afinaʼaeʼmo nelage, huno huʼniya gemae

¹ Ala kava nene, huʼna, alagi nageka alagepa huʼnane.

² Nagaemo itopaleʼmo maiʼnofi he tiʼna maiʼnofi huʼnogekaeʼmo nageʼnane. Kagaemo afagitegamo maiʼnekaeʼmo nagesamo neʼafuva nagesamo nageʼnane.

³ Umenitata huge havaege nehugekaeʼmo nageteka muki nehuva kavaʼnimo ago nageʼnane.

⁴ Ge osuʼnovaʼmonanafa Ala kava nene, huʼna, henagaʼamo hisuva geʼnimo ago ageʼnane.

⁵ Yagaika vego huka nateteka nagaeteʼmo kayaʼmo maleka neʼnatane.

⁶ Ago nageʼnanana kagae kaipa kagesamoʼmo nagae naipa nagesamo ago aeno agaseʼniyanageʼna afaʼa oʼagegauve.

⁷ Kagaetegatiʼmo faiʼna kasalo paeʼna haiyategamo uguve. Maiʼnanategamo uʼna oʼmaiʼna naoteʼmo maisuvafeʼmo haiyategamo uguve.

⁸ Kokuʼnapiʼmo uʼna haiʼna maisuvana maiʼnane. Nagaemo faliʼnaya vayaʼmo uʼa maiʼnaya kotegamo uʼna lamiʼna maisuvana maiʼnane.

⁹ Yegemo hainenoʼaeʼmo hayomo neʼaeya yaʼmoʼa afagitega mopa atupaleʼmo malage huno neʼviya kava huʼna malage huʼna afagitega uʼna maisuvana maiʼnane.

¹⁰ Afagitega uʼna maiʼnisugekaeʼmo kayatetiʼmo navalelika egane. Ani kava huka lamaga kayatetiʼmo natafauka maigane.

¹¹ Nagaemo, hani huka aika nati kao, huʼna hisuvana hani huʼniya yapiʼmo ha le yakamoʼa aeno ha leʼnigeka nageʼnane.

¹² Hani huʼnisiya yapiʼmo uʼna fala kisuvana nagegane. Yegemoʼmo aeno ha neleya kava huno kagae kaulagaleʼmo hanipiʼmo aeno ha nele. Hani nehiya kavaʼmoʼmo kagae kaulagaleʼmo ha le yakana huno haneʼniye.

¹³ Muki nahau nayamopafiʼmo haneʼniya yaʼaʼnimo kagaikamo alo huʼnanageno kagaika yaʼmo haneʼniye. Muki nagufafiʼmo haneʼniya yaʼaʼnimo alo huteka alika itaʼnimo aipafiʼmo magokepi maleʼnane.

¹⁴ Kagaemo alagepa huka alo huka nateʼnanaʼmofeʼmo koli huteʼna kagikaleʼmo aliʼna asaga nehuve. Nagaetegamo huʼnana kavaʼmo ageteʼnaeʼmo nahau neʼauve. Huʼnana kavafeʼmo alagepa kavaʼmo huʼnane, huʼna huteʼna aliʼna namalagiʼnove.

¹⁵ Itaʼnimo aipafiʼmo maiʼnogenoʼaeʼmo nayamufaʼnimo afole aiteno kosime kosime uʼnigeka nageʼnane.

¹⁶ Itaʼnimoʼmo alino oʼnateʼniya afinaʼmo muki nagufafiʼmo haneʼniya yaʼaʼnimo ago ageʼnane. Ma mopafiʼmo afole aiʼna oʼmaiʼnogekaeʼmo na magi afinaʼmo ma mopafiʼmo maigapi huka mukufiʼmo ago avoʼmo kae maleʼnane.

¹⁷ Nagaefeʼmo kagesamo neʼafina kavakamoʼmo alopa monileʼyaʼmo aeno agaseʼniya kavaʼmo haneʼniye, huʼna nagesamo neʼafuve. He, lusi asole kavaʼmo haneʼniye.

¹⁸ Lekana paiguvana ani kahaepaleʼmo aise yafaʼmo ago aeno agaseʼniya agufa kavaʼmo haneʼniye. Naupatiʼmo he tiʼnaeʼmo kagaeʼekeʼmo maiʼnoʼae.

¹⁹ O Gotiyo, huʼna, hosu vayaʼmo apamagisanafeʼmo neʼnahaiye. Kaveta nehapaya vayaʼmo nataleʼa visayafeʼmo neʼnahaiye.

²⁰ Apakaemo kagaefeʼmo hosu gemo huteʼa huʼa faipa huʼa nekatae.

²¹ O Ala kava nene, huʼna, Apaini nehaya vayaʼaifeʼmo naini huʼnove. Apakameʼyamo nekamiya vayaʼai apaulagafiʼmo navenatuʼnamo heʼna neʼapatove.

²² Nagaemo apakaefeʼmo naini huʼneʼnaeʼmo, kame vayaʼnie, huʼna nehuve.

²³ O Gotiyo, huʼna, naipa nagesafiʼmo alagepa huka alika fako huka nago. Naipa nagesafiʼmo aulu haeka ago.

²⁴ Naipafiʼmo hosu kavaʼnimo haneʼnifigi ageteka alagepa huʼna maige maige huʼna maisuva kateʼmo navalelika uvo.