Samu 138 - The Keyagana NT and 25 OT books

Ala kava neʼmoʼa alagepa kavatefeʼmo agiʼaleʼmo alino asaga huno ateʼniya gemae Neviniʼmo avoʼmo kaeʼniya Samu gemae

¹ Nagaemo muki naipafatiʼmo kagikaleʼmo aliʼna asaga huguve. Nagaemo aigofe gotigi apaulagaleʼmo kagikaleʼmo aliʼna asaga hisuva yokemo huguve.

² Kagaemo nagaefeʼmo muki afinaʼaeʼmo alagi kahauʼnigeka lama geʼageʼmo nehanaʼmofeʼmo nagaemo kagaemo kaote mono noʼmo aulagamo mono huʼna kagikaleʼmo aliʼna asaga huguve. Kagaemo kagikaleʼmo alika asaga huteka gekaleʼmo magoʼe huka alika asaga huʼnane.

³ Nagaemo kagaefeʼmo keya aeʼna ge huʼnova afinaʼmo geʼnileʼmo aeka atagaina huka alika lokiya vaika nateʼnanageno nagupi mafaʼnemoʼmo lokiya vaino maiʼniye.

⁴ O Ala kava nene, huʼna, Muki ma mopafi kini vayaʼmogimo kavayafatiʼmo huʼnana gekamo afiteʼapaeʼmo kagikaleʼmo aliʼa asaga hugae.

⁵ He, Ala kava neʼmo ha le konali yakamo alopa yaʼmo haneʼniyaʼmofeʼmo apakaemo Ala kava neʼmoʼa nehiya kavafeʼmo yokemo hugae.

⁶ Ala kava neʼmo alagi anaga hogote vekamo maiʼniyaʼmonanafa agaemo afa vayaʼaifeʼmo agesamo neʼafiye. Apakaefeʼmo agesamo neʼafiyaʼmonanafa ala vekamo maiʼnove, huʼa nehaya vayaʼmo afagitegamo maiʼnageno apakeʼniye.

⁷ Nagaemo hanageke kavaʼmo hisaya folagapiʼmo maiʼnisuvaʼmonanafa nauneʼnameʼnimo alika he tika ategane. Kagaemo nageteka lokiya kavakaletiʼmo apaipamo neleya kame vayaʼnimo apamagiteka apayapatiʼmo nagufamo alika katika nategane. Lamaga kayatetiʼmo alika katika nategane.

⁸ Ala kava nene, huʼna, nagaetegamo afole aiʼniya kavatefeʼmo aliʼyaʼmo aliteka alagi alika alagepa huka ategane. O Ala kava nene, huʼna, muki afinaʼmo kahau huka natege natege huka maigane. Kayatetiʼmo alo huka lateʼnana vayaʼmo lataleka oʼuvo.