Samu 135 - The Keyagana NT and 25 OT books

Gotifeʼmo haoke heʼa huge aliʼa auleʼa ateteʼa huge huʼnaya Samu yokemae

¹ Ala kava neʼmo agiʼaleʼmo alitapa asaga hiyo. Ala agiʼamo amiyo. O aliʼyaʼamo neʼaliya vayanagi agiʼaleʼmo alitapa asaga hiyo.

^2-3 Ala kava neʼmo noʼafiʼmo he titapa maiʼnaya vayaʼenagi Gotitimo mono noʼamo kumateʼmo he titapa maiʼnaya vayaʼenagi hutapa Ala kava neʼmo agiʼaleʼmo alitapa asaga hiyo. Agaemo alagepa Gotiʼmo maiʼniyaʼmofeʼmo agiʼaleʼmo alitapa asaga hiyo. Lapamogaga aisaya kavaʼmo haneʼniyaʼmofeʼmo agiʼalefeʼmo yokemo hiyo.

⁴ Ala kava neʼmoʼa agaiʼalefeʼmo Yekopu vayaʼmo lekana paino apateʼniyaʼmofeʼmo ala agiʼamo amiyo. Isaleli vayaʼmo agaiʼa vayaʼamo maiʼnayaʼmofeʼmo ala agiʼamo amiyo.

⁵ Nagaemo ago ageʼnovana Ala kava neʼmo ala Gotiʼa maiʼniye, huʼna ageʼnove. Ala kava netimoʼa muki gotigiʼmo aeno apaka seʼniye.

⁶ Haiya agufa kavafeʼmo hauʼnifi ani kavaʼmo nehiye. Agaemo kokuʼnapinagi ma mopafinagi solovala anipinagi afepilaga anipiʼenagi huno hisiya kavafeʼmo hauʼniya kavaʼmo nehiye.

⁷ Agaemo ko aisiyafeʼmo alave nehiya yaʼmo alino afole neʼaiye. Agaemo yasimo maleʼniya yategatiʼmo alinino neʼe.

⁸ Agaemo Isipi vayaʼmogi yege mafaʼne anagaʼapimo alino hosu huno apataleʼniye. Agaemo apakae yege mafaʼneʼapiʼe afumogi yege apanaʼauʼeʼmo alino hosu huno apataleʼniye.

⁹ Agaemo Isipi vayaʼai folagapiʼmo alagena kavaʼe noʼagaya agufa aune kavaʼeʼmo alino apaveliʼnigeʼa kini vekamo Feloʼe muki aliʼyaʼamo neʼaliya vayaʼeʼmo ageʼnae.

¹⁰ Agaemo asole nofi vayaʼmogiʼeʼmo kamemo huno aeno apaka seʼniye. Lokiya kini vayaʼapimo kamitimo apamagiʼniye.

¹¹ Emo vayaʼai kini vekamo Saihoʼmo amagige Mesani vayaʼai kini vekamo Agaʼmo amagige muki Kenani vayaʼai kini vayaʼapimo apamagige huno kamitimo apamagiʼniye.

¹² Apamagiteno mopaʼapimo Isaleli vayaʼaina apamiʼniye.

¹³ O Ala kava nene, huʼna, Kagikamo muki afinaʼmo hanege hanege huno hano osuno afaʼa hanegaiye. Muki henagaʼa afole aisaya vayaʼmogimo ala kagikamo kamigae.

¹⁴ Ala kava neʼmoʼa vayaʼamo agoti huno apatenoʼaeʼmo naulagaleʼmo fatago vayaʼmo maiʼnae, huno hugiye. Agaemo aliʼyaʼamo neʼaliya vayaʼaifeʼmo hau huno apategaiye.

¹⁵ Ma mopafi nofi vayaʼmogi aigofe gotiʼapimogimo siluva yafatetiʼmo alo huge goli vafatetiʼmo alo huge huʼnae. Vayaʼmogi apayatetiʼmo alo huʼnae.

¹⁶ Apavayamo haneʼniyaʼmonanafa ge nosae. Apaulagamo haneʼniyaʼmonanafa noʼagae.

¹⁷ Apakesamo haneʼniyaʼmonanafa gemo noʼafiye. Apavayafiʼmo apavamusamo ohaneʼniye.

¹⁸ Alo nehaya vayaʼmogi aigofe gotiʼapigana huʼa maiʼnae. Aigofe gotigifeʼmo aliʼa amufa neʼapamiya vayaʼmogi apakaekana huʼa maiʼnae.

¹⁹ Isaleli vayaʼmogitapae, huʼna, Ala kava neʼmo alita auletapa ateyo. Mono nehaya vayane, huʼna, Ala kava neʼmo alita auletapa ateyo. Gotifeʼmo koli nehaya vayane, huʼna, alita auletapa ateyo.

²⁰ Livai nofi vayaʼmogitapae, huʼna, Ala kava neʼmo alitapa auleta ateyo. Ala kava nefeʼmo koli nehaya vayaʼmogitapae, huʼna, Ala kava neʼmo alitapa auleta ateyo.

²¹ Saiyonitegamo maiʼnetapa Ala kava nefeʼmo alitapa auleta ateyo. Agaemo Yulusalemo taonifiʼmo maiʼniye. Ala kava neʼmo agiʼaleʼmo alitapa asaga hiyo.