Samu 130 - The Keyagana NT and 25 OT books

¹ Ala kava neo, huʼna, muki yaʼmoʼmo aino nati kaeʼnigeʼna afepilagamo maiʼneʼnaeʼmo kagaefekeʼmo keya aeʼna ge nehuve.

² Ala kava nene, huʼna, geʼnimo afiyo. Naha mao, huʼna keya aeʼna ge nehuva geʼnimo kagetafo huka afiyo.

³ O Gotiyo, huʼna, hosu kavatimo alika fako huka lateteka miyatimo lamiʼnanesinana Ala kava nene, huʼna, ina laʼmo afaʼa faino kasalo paeʼniyesine.

⁴ Magoke vekamo alagi faino kasalo opaeyesinaʼmonanafa kagaefeʼmo koli huteʼa mono hisayafeʼmo hosu kavatimo alika ataleʼnane.

⁵ Nagupi mafaʼnemoʼmo Ala kava neʼmoʼa naha maesiyafeʼmo agava maiʼniye. Geʼaeʼmo nagesamo afiteʼna agava maiʼneʼnaeʼmo navayagunagu nehuve.

⁶ Neʼyagaiya vayaʼmogi hani huʼniya yaʼmo hano hisigeno ha le yaʼmo afole aisiyafeʼmo nehapaigeʼa agava neʼmaiya kava huʼna Ala kava nefeʼmo magoʼe huʼna agava neʼmauve. He, agava neʼmaiya kava huʼna aeʼna apakaseʼna Ala kava nefeʼmo magoʼe huʼna agava neʼmauve.

⁷ Isaleli vayaʼmogitapae, huʼna, Ala kava nefeʼmo lapakesamo afitetapa lapa maesiyafeʼmo lapavayagunagu hutapa maiyo. Ala kava neʼmoʼa vayaʼaeʼmo hau huno neʼapateyanageno olapatalegaiye. Agaemo muki alu hosu kava alu hosu kavapatiʼmo miya faino hatu maeno neʼapateyaʼmofeʼmo ani kavafeʼmo lapakesamo afiteta lapavayagunagu hutapa maiyo.

⁸ Agaemo agaiʼa Isaleli vayaʼamo muki alu hosu kava alu hosu kavapatiʼmo miya faino hatu maeno apategaiye.