Samu 13 - The Keyagana NT and 25 OT books

¹ O Ala kava nene, huʼna, hainu afinaʼmo nagaefeʼmo kagesamo afiteka naha maegane. Muki afinaʼmo nagaefeʼmo kage okaniyo. Magoʼe huka alu afinaʼmo oʼnageka alu haopalega aulu hegapiye.

² Magoʼe magoʼe huʼna naipafiʼmo nagesa afifi huʼna maiguve. Naipamoʼmo kana hume hume neʼe. Na magi afinaʼmo kameʼnimoʼmo muki afinaʼae afinaʼaeʼmo aeno naga segaiye.

³ O Ala kava neʼmo Gotiʼnimogae, huʼna, kagesa afifi nehuka geʼnileʼmo aeka atagaina huka naha paiyo. Fiku yanageʼna faliguvanagi kayamufa huka nato.

⁴ Fiku yanageʼa kame vayaʼnimogi huʼapaeʼmo, kame huta aeta aga seʼnone, huʼa hugae. Fiku yanageʼna asagauʼna aisugeʼa apamogaga aigae.

⁵ Muki afinaʼmo oʼnataleka nagaefeʼmo kahau kayamopafiʼmo kahaugiye, huʼna aliʼna amufa nekamuve. Nagufamo alika katika nateganaʼmofeʼmo naipafiʼmo namogaga aiguve.

⁶ O Ala kava nene, huʼna, nagaetegamo alagepa kavaʼmo huʼnanaʼmofeʼmo kagaefeʼmo yokemo huguve.