Samu 124 - The Keyagana NT and 25 OT books

Gotiʼa vayaʼamo hapa neʼmaeya vekamae, huno huʼniya gemae

Mono notegamo neʼvaya vayaʼmogi kateʼmo neʼuʼapaeʼmo nehaya yokemae.

¹ Ala kava neʼmoʼa kamemo huno laha oʼmaeʼniyesinana haiya kava huta maiʼnonesine. Isaleli vayaʼmogitapamo ani loka geleʼmo aeta atagaina hutapa hiyo.

^2-3 Vayaʼmogimo lagaeʼeʼmo kamemo huʼnaya afinaʼmo Ala kava neʼmoʼa kamemo huno laha oʼmaeʼniyesinana alagi lahaeʼa hano huʼa lataleʼnaesine. Lusi kava huʼa apaipamo leʼa lateʼnayaʼmofeʼmae.

⁴ Laha oʼmaeʼniyesinana aniʼmo he teno lavalelino ugekana agufa kavaʼmo huʼnigeno aniʼmoʼa aeno lati kaeʼnigeta afela heʼnonesine.

⁵ He, lagaemo ani lokiya aniʼmo heteno lavalelino uʼninageta aniʼmo neteta ago faliʼnonesine.

⁶ Lagaemo Ala kava nefekeʼmo alita auleta ategetao, laha maeʼnigeʼa kame vayatimogimo afaʼa lahaeʼa hano osuʼnayaʼmofeʼmae.

⁷ Umenimo mago vekamoʼmo maleʼnigenoʼaeʼmo namamoʼmo ageteno ataleno halelino neʼviya agufa kava huta apakaemo apataleta uʼnone. Umenimo kapalu aeʼnigetaeʼmo aeta hefita ago uʼnone.

⁸ Ala kava neʼmoʼa kokuʼnaʼmo alo hute mopamo alo hute huʼniya vekamo agaiʼafiʼmo laha neʼmaeya kavaʼmo haneʼniye.