Samu 122 - The Keyagana NT and 25 OT books

Mono notegamo neʼvaya vayaʼmogi kateʼmo neʼuʼapaeʼmo nehaya yokemae.

¹ Apakaemo huʼapaeʼmo, Ala kava neʼmo noʼafiʼmo uta haigetao, huʼa naha paiʼnageʼnaeʼmo namogaga aiʼnove.

² Uta avaʼyi huteta uta haita maiʼnetaeʼmo, O Yulusalemuo, huta, lagaemo eta kagae yafa lafi kegiʼyafiʼmo he tita maiʼnone, huta nehune.

³ Yulusalemu taonimo kiʼnageno magokepiʼmo alagepa huno lokaeno haneʼniye.

⁴ Muki nofi vayaʼmo faleʼa uʼa haiʼnae. Ala kava neʼmo nofi vayaʼamogimo Ala kava nefekeʼmo hao ke hesayafeʼmo Isaleli vayaʼmo Goti geʼamo afisayategamo uʼa haite haite huʼnae.

⁵ Ani taonifiʼmo Nevini nofi vayapati kini vayaʼmogimo fai maiʼneʼa aliʼa fako huʼa neʼapataya siyaʼapimo haneʼniye.

⁶ Yulusalemu vayaʼmo alagepa huʼa maiʼa haga lesayafeʼmo nunumuʼmo hutapa apateyo. Yulusalemu taonieʼmo hapauʼnisiya vayaʼmogimo alagepa huʼa maiyo.

⁷ Yafa lafi kegiʼyafiʼmo alagepa huʼa magokepi lokaeʼa maiyo. Kini vayaʼmogi noʼapifi noʼapifiʼmo alagepa huʼa maiyo.

⁸ Konagaʼnimogiʼe nafaluʼnimogiʼeʼmo alagepa huʼa maisayafeʼmo huʼnaeʼmo, yafa lafi kegiyafiʼmo alagepa huʼa magokepi lokaeʼa maiyo, huʼna nunumuʼmo huʼna neʼapatove.

⁹ Ala kava neʼmo Gotitimo noʼaeʼmo nagesamo afiteʼnaeʼmo agae taonimo alagepa huno hanesiyafeʼmo nayamukiki huguve.