Samu 121 - The Keyagana NT and 25 OT books

Mono notegamo ugefeʼmo neʼvaya vayaʼmogi kateʼmo neʼuʼapaeʼmo nehaya yokemae.

¹ Nagaemo avelega aulu heʼna agesufiye. Haiyategatiʼmo naha maesiya yaʼmo afole aigiye.

² Avelegatiʼmo naha maesiya yaʼmo afole oʼaigifa Ala kava neʼmo kokuʼnaʼe mopaʼeʼmo alo huʼniya vekamokeʼmo naha maegaiye.

³ Yagaino kateʼnisigeka aeka halu vale lamika asagauka oʼaigane. Yagaino nekateya vekamo au okalegaiye.

⁴ Afiyo, huʼna, Isaleli vayaʼaiteʼmo yagaino neʼapateya vekamoʼmo au maiʼmai osuge au okalege huteno afaʼa maiʼneno yagaino maigiye.

⁵ Ala kava neʼmoʼa yagaino nekateya vekamo maiʼniye. Ala kava neʼmoʼa kahaopaleʼmo he tino maiʼnigenoʼaeʼmo auneʼamoʼmo uluna vaino kateʼnigeka ani ulunapiʼmo maiʼnane.

⁶ Felugamo yegemoʼmo kaleno kasaga oligiye. Haniʼilagamo kaimoʼmo alino hosu huno okategaiye.

⁷ Ala kava neʼmoʼa alu hosu kavatetiʼe alu hosu kavatetiʼeʼmo alino hosu huno okatesiyafeʼmo yagaino katesigeno kagupi mafaʼnemo alagepa huno maigiye.

⁸ Nokamo ataleka visanagenoʼaeʼmo Ala kava neʼmoʼa yagaino katege atagi neka esanagenoʼaeʼmo yagaino katege hugiye. Hemenimo yagaino nekateyanageno henagaʼamo muki afinaʼaeʼmo yagaino katesigeka alagepa huka afaʼa maige maige huka maigane.