Samu 12 - The Keyagana NT and 25 OT books

Gotiʼa yagaino latesigeta alagepa huta maigune, huno huʼniya gemae

¹ Ala kava nene, huʼna, Hemenimo kagaefekeʼmo mono nehaya vayaʼmo oʼmaiʼnayaʼmofeʼmo laha mao. Ma mopafi vayapatiʼmo fatago vayaʼmo ago faliʼa hano huʼnae.

² Muki vayaʼmogimo afa gegeʼmo hapa nepaiye. Hapa paiteʼa aigofe geletiʼmo huʼa hapaoke nehae.

³ Ala kava neʼmoʼa aigofe gemo huteʼa huʼa hapaoke nehaya vayaʼmo kayoʼmo apamigiye. Ala apakimo alisayafeʼmo ge nehaya vayaʼmo alagi alino hano huno apatalegaiye.

⁴ Apakaemo, getiletiʼmo afaʼa huta aeta apakasegaune. Lahauʼniya gemo afaʼa hugune. Ina laʼmo yagaino nelate, huʼa nehae.

⁵ Ala kava neʼmoʼa hunoʼaeʼmo, apakaemo kagemi yaʼapimo ohaneʼniya vayaʼmo aliʼa afepi neʼapatae. Kafu huteʼa alagepa huʼa noʼmaiya vayaʼmogimo ha ha nehayaʼmofeʼmo he tiʼna hapa maegauve. Afaʼa maisayafeʼmo hapauʼniyanageʼna hapa maeteʼna aliʼna alagepa huʼna apategauve, huno huʼniye.

⁶ Ala kava neʼmo geʼamo alagi lama geʼageʼmo haneʼniye. Vayaʼmogimo siluva yafaʼmo atafiʼmo seveni afinaʼmo kaete kaete huʼnagenoʼaeʼmo muki oʼaniʼya faiʼniya yaʼamo leno kalo paeno ataleʼnigeno siluva yafaʼageʼmo afole neʼaiya kava huno Goti geʼamo alagi lama geʼageʼmo haneʼniye.

⁷ Ala kava nene, huʼna, yagaika latesanageta alagepa huta maigune. Muki afinaʼmo laha maesanageʼapaeʼmo hosu vayaʼmogi olatafaugae.

⁸ Alagi hosu kavaʼmo nehaya vayaʼmogimo ala apakimo neʼaligeʼapaeʼmo hosu vayaʼmogimo muki haopalegamo umenitata nehae.