Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Samu 119 - The Keyagana NT and 25 OT books


Goti geʼaeʼmo huʼniya gemae

1 Vayaʼmogimo alagepa kavaʼmo nehuʼapaeʼmo vaiʼmo oʼaliʼa Ala kava neʼmo keʼaepa geʼamo akame nehaya vayaʼmogi Goti aulagaleʼmo alagepa huʼa maiʼnayanageʼa afaʼa apamogaga aigae.

2 Avayafatiʼmo huʼniya keʼaepa geʼamo akame huge agesayafeʼmo muki apaipafatiʼmo kahauya huge huʼa neʼmaiya vayaʼmogi Goti aulagaleʼmo alagepa huʼa maiʼnayanageʼa afaʼa apamogaga aigae.

3 Apakaemo mago hosu kavaʼmo osuʼa Ala kava neʼmo kateʼmo uʼeʼa nehae.

4 Kagaemo, lapayamukiki hutapa geʼnimo akame hiyo, huka huʼnane.

5 Gekamo alagepa huʼna afiteʼna akame hisuvafeʼmo neʼnahaiye.

6 Muki gekamo ageteʼna afisuva afinaʼmo navagage osugiye.

7 Nagaemo fatago kavaʼmo huka alika fako huka nehana gekamo alagepa huʼna afiteʼnaeʼmo kanale fatago naipafatiʼmo ala kagikamo kamiguve.

8 Avoʼmo kae maleʼnaya keʼaepa gekamo akame huguvanagi alagi nataleka oʼuvo.

9 Haiya kava huno neya vekamoʼmo nehiya kavaʼamo afaʼa aeno kalo paeno atalegaiye. Agaemo gekamo alagepa huno afisiya kavatetikeʼmo afaʼa aeno kalo paeno atalegaiye.

10 Muki naipafatiʼmo kagesuvafeʼmo kahauya huʼnove. Hiyo, huka huʼnana keʼaepa gekamo ataleʼna visuvafeʼmo oʼnatalo.

11 Kagaetegamo hosu kavaʼmo osisuvafeʼmo gekamo naipafiʼmo aliʼna fala ki maleʼnove.

12 O Ala kava nene, huʼna, alagi aulena Gotigamomaiʼnane. Avoʼmo kae maleʼnaya keʼaepa gekamo alika naya malo.

13 Nagaemo navayafatiʼmo muki gekamo fatago kavaʼmo huka kavayafatiʼmo alika fako nehana keʼaepa gekamo aeʼna hakalo huʼna hapa paiʼnove.

14 Ma mopafi alopa kagemi yafeʼmo apamogaga neʼaiya kava huʼna kavayafatiʼmo huʼnana gekamo akame hisuvafeʼmo namogaga neʼauve.

15 Namiʼnana keʼaepa gekaeʼmo nagesa afifi huʼna maige neʼvana kaʼmo ageʼna alagepa huge huʼna maiguve.

16 Nagaemo avoʼmo kae maleʼnaya keʼaepa gekaeʼmo namogaga aisugenoʼaeʼmo nage okanigiye.

17 Kagaemo aliʼyakamo neʼaluva vekakamo magoʼe huka fikumo namigeʼnao ma mopafiʼmo afaʼa maiʼneʼnaeʼmo gekamo akame huguve.

18 Naulagamo alika ayakeka nategeʼnao keʼaepa gekamo ageteʼna nahau aiguve.

19 Ma mopafiʼmo nata neʼna neʼvisugekaeʼmo gekamo afisuvafeʼmo alika fala okika alika nave liyo.

20 Muki afinaʼmo alika fako nehana keʼaepa gekamo afisuva nagupi mafaʼnemoʼmo aipamo nekaliyaʼmofeʼmo naipafiʼmo nagafu nekiye.

21 Himuʼnamu kavaʼmo nehaya vayaʼaifeʼmo lifana huka apateʼnana vayaʼmogimo kakamo ataleʼa neʼvagekaeʼmo ge nehapane.

22 Kavayafatiʼmo huʼnana gekamo akame huʼnovaʼmofeʼmo huʼa faipa huʼa natege hosu gemo huge nehayanagi apavayamo alika akanika apategeʼa afaʼa maiyo.

23 Yagaiʼnaya vayaʼmogimo fai maiʼneʼapaeʼmo huʼa faipa huʼa nateʼnayaʼmonanafa aliʼyakamo neʼaluva vekamoʼnamo avoʼmo kae maleʼnaya keʼaepa gekaeʼmo nagesa afifi huʼna maiʼnove.

24 Kavayafatiʼmo huʼnana gekaeʼmo namogaga neʼauve. Gekamoʼmo visuva kaʼmo alino nave neliye.

25 Nagupi mafaʼnemo asagauno aiteno mopafiʼmo maiʼniye. Lapa maegauve, huka huʼnana gekamo akame huka alika he tika nato.

26 Nagaemo nehuva kavaʼnieʼmo kaha paiʼnogekaeʼmo geʼnileʼmo aeka atagaina huka naha paiʼnane. Avoʼmo kae maleʼnaya keʼaepa gekamo alika naya malo.

27 Alika naya malegeʼna namiʼnana gemo aepaʼamo afiʼna alagepa huʼna afiguve. Kagaemo neʼalina aliʼyakamo ageteʼnaeʼmo nahau aiʼnova kavaʼnieʼmo hapa paiguve.

28 Kanamo aliʼnogenoʼaeʼmo nagupi mafaʼnemoʼmo ani hegekana huʼniye. Lokiya vaiʼna kategauve, huka huʼnanaʼmofeʼmo lokiya vaika nato.

29 Aigofe kateʼmo oʼvisuvafeʼmo ka akani maleteka keʼaepa gemo fikumo namiyo.

30 Lama ge kateʼmo uguve, huʼna nagesamo afiʼnove. Alika fako huʼnana gemo aliʼna naulagaleʼmo maleʼnove.

31 Kavayafatiʼmo huʼnana geleʼmo aiʼna kamaeʼnove. O Ala kava nene, huʼna, navagage yaʼmo alika oʼnamiyo.

32 Magoʼe huka naipa nagesamo namisanageʼnaeʼmo nagu nagu huʼna gekamo hiyo, huka laha paiʼnana gemo akame huʼna huguve.

33 O Ala kava nene, huʼna, avoʼmo kae maleʼnaya keʼaepa gekamo alika naya malegeʼnao oʼataleʼna akame hume hume uʼna hano hisiya afinaʼeʼmo akame hino.

34 Alagepa nagesamo afisuva yaʼmo alika namigeʼnao keʼaepa gekamo akame hino. He, muki naipafatiʼmo akame huguve.

35 Hiyo, huka laha paiʼnana gekaeʼmo namogaga neʼauvaʼmofeʼmo ani kateʼmo uʼneʼna hisuva naipamo alika kalika nato.

36 Fiku yanageno ma mopafi yafeʼmo nahaʼye hugiye. Kavayafatiʼmo huʼnana gekamo akame hisuva naipa nagesamo namiyo.

37 Alu yaʼmo aulu haeʼna neʼagesugekaeʼmo alika aika afe leka nato. Kagae kateʼmo neʼvisugekaeʼmo alika he tika nato.

38 Aliʼyakamo neʼaluva vekamoʼnafiʼmo gekamo alika lokiya vaika nato, kagaefekeʼmo koli nehuvaʼmofeʼmae.

39 Alagepa huka alika fako nehanaʼmofeʼmo hosu kavaʼmo hisugeʼapaeʼmo huʼa faipa huʼa natesayafeʼmo koli nehuvanagi naha mao.

40 Namiʼnana gekaeʼmo nahaʼye nehiye. Fatago kavakaletiʼmo alika he tika nato.

41 O Ala kava nene, huʼna, kahau huka nato. Huguve, huka huʼnana kavaʼmo huka nagufamo alika katika nato.

42 Gekaeʼmo aliʼna amufa neʼamuvaʼmofeʼmo huno faipa huno neʼnateya vekamo geʼaleʼmo aeʼna atagaina huʼna ha paiguve.

43 Alika fako nehana gekaeʼmo nagesa afiʼnaeʼmo, naha maegaiye, huʼna nehuvaʼmofeʼmo lama gekamo navayafatiʼmo alika oʼatalo.

44 Ani kava huʼna maiʼneʼnaeʼmo muki afinaʼaeʼmo keʼaepa gekamo akame hume hume uʼna maiguve.

45 Namiʼnana gekamo afisuvafeʼmo kahauya nehuvaʼmofeʼmo kalavusifiʼmo oʼmaiʼna afaʼa maiguve.

46 Nagaemo kavayafatiʼmo nehana gemo aliʼna yagaiʼnaya kini vayaʼaifeʼmo aeʼna hakalo huʼna hapa paisugenoʼaeʼmo navagage osugiye.

47 Nagaemo nahau nayamopafiʼmo neʼnahaiya gekaeʼmo hiyo, huka laha paiʼnana gekaeʼmo namogaga aiguve.

48 Nagaemo nahau nayamopafiʼmo neʼnahaiya gekaeʼmo hiyo, huka laha paiʼnana gekalefeʼmo nayaʼmo aliʼna asaga huteʼna avoʼmo kae maleʼnaya gekaeʼmo nagesa afifi huʼna maiguve.

49 Kagaemo aliʼyakamo neʼaluva vekamoʼnaeʼmo kaha maegauve, huka naha paiʼnana gekaeʼmo halate kagesamo afika ho huvo. Ani gekaeʼmo nagesamo afiʼnaeʼmo, alagi afole aigiye, huʼna huteʼna navayagunagu huʼna maisuvafeʼmo alika he tika nateʼnane.

50 Gekamoʼmo alagepa huʼna maisuva yaʼmo alino namiʼniyaʼmofeʼmo kana yaʼmo neʼalugenoʼaeʼmo naipamoʼmo falu nehiye.

51 Apakiʼapileʼmo aliʼa asaga huʼa neʼapataya vayaʼmogimo kigi yokalo gegeʼmo huʼa neʼnatayaʼmonanafa keʼaepa gekamo oʼataleʼnove.

52 O Ala kava nene, huʼna, akeyaʼvilagamo gekamo alika fako nehana gekaeʼmo nagesamo afiʼna ho huteʼna naipamo aliʼna falu huʼna neʼatove.

53 Hosu vayaʼmogimo keʼaepa gekamo ago amagiʼa neʼatalayaʼmofeʼmo naipamoʼmo atete nehiye.

54 Nata neʼna eʼna maiʼnova nopiʼmo avoʼmo kae maleʼnaya keʼaepa gekamo yokemo huʼnove.

55 O Ala kava nene, huʼna, haniʼilagamo kagikaeʼmo nagesamo afiʼna ho nehuʼnaeʼmo keʼaepa gekamo akame nehuve.

56 Namiʼnana gekamo akame huʼnovaʼmofeʼmo ani gemo aliʼnove.

57 O Ala kava nene, huʼna, kagaemo hetamaʼnimo maiʼnane. Nagaemo gekaleʼmo yagaiʼneʼna akame huguve, huʼna huʼnove.

58 Nagaemo muki naipafatiʼmo, fiku naha maeka namiyo, huʼna kaha paiʼnove. Nahau huʼna lapategauve, huka laha paiʼnana kava huka kahau huka nato.

59 Nagaemo kavaʼnieʼmo nagesamo afiteʼnaeʼmo aiʼna afe leʼna kavayafatiʼmo huʼnana gemo akame huʼnove.

60 Hiyo, huka laha paiʼnana gemo akame hisuvafeʼmo afaʼa oʼmaiʼna malage huʼna he tiʼna akame huʼnove.

61 Hosu vayaʼmogimo nofitetiʼmo kiʼa nateʼnayaʼmonanafa keʼaepa gekaeʼmo nage okaniʼniye.

62 Kagaemo fatago kavaʼmo huka alika fako nehanaʼmofeʼmo haniʼilaga folaguʼmo he tiʼna kahao ke hegauve.

63 Nagaemo kagaefeʼmo koli nehaya vayaʼeʼmo magokepiʼmo lokaeta maiʼnone. Apamiʼnana geleʼmo yagaiʼa ateʼneʼa akame nehaya vayaʼeʼmo magokepiʼmo lokaeta maiʼnone.

64 O Ala kava nene, huʼna, kahau huka neʼapatana kavakamoʼmo ma mopafiʼmo havai teʼniye. Avoʼmo kae maleʼnaya keʼaepa gekamo alika naya malo.

65 O Ala kava nene, huʼna, Kaha maegauve, huka huteka ani kava huka aliʼyakamo neʼaluva vekamo magoʼe huka naha maeʼnane.

66 Nagaemo hiyo, huka huʼnana gekaeʼmo nagesamo afiʼna fatago nehuvaʼmofeʼmo alagepa naipa nagesamo namiyo.

67 Kayoʼmo oʼnamiʼnanageʼnaeʼmo hogoteʼna gekamo ago ataleʼnovaʼmonanafa hemenimo gekamo akame nehuve.

68 Alagepa kavaʼmo huteka alagepa vekamo yagu yaga kaipa vekamo maiʼnananagi avoʼmo kae maleʼnaya keʼaepa gekamo alika naya malo.

69 Himuʼnamu kavaʼmo nehaya vayaʼmogi aigofe nava gemo huteʼa huʼa faipa huʼa nateʼnayaʼmonanafa muki naipafatiʼmo namiʼnana gekamo akame huguve.

70 Apaipamo yafakana huno haneʼnigeʼa afiʼa aeto nosayaʼmonanafa keʼaepa gekaeʼmo amuse nehuve.

71 Kayoʼmo namiʼnanageʼnaeʼmo gekamo afiʼnovaʼmofeʼmo kayoʼmoʼa alagepa huno naha maeʼniye.

72 Kavayafatiʼmo huʼnana keʼaepa gekamoʼmo tauseni monimo ago aeno agaseʼniyaʼmofeʼmo gekaeʼmo magoʼe huno nahauʼniye.

73 Kagaemo kayatetiʼmo nagupi mafaʼnemo alo huka nateteka nagufamo alo huka nateʼnane. Hiyo, huka laha paiʼnana gemo afisuva nagesamo namiyo.

74 Nagaemo gekamoʼmo naha maegaiye, huʼna huteʼna navayagunagu huʼnovaʼmofeʼmo kagaefeʼmo koli nehaya vayaʼmogi nageteʼapaeʼmo apamogaga aigae.

75 O Ala kava nene, huʼna, afiʼnovana alika fako nehana kavaʼmo alagepa kavaʼmo haneʼnigeka gekamo akame huteka naha maesanafeʼmo kana yaʼmo alika namiʼnane.

76 Kagaemo aliʼyakamo neʼaluva vekamoʼnaeʼmo naha paiʼnana gekamo akame huka alagepa huka kahau huka nateteka naipamo alika falu huka nato.

77 Keʼaepa gekaeʼmo namogaga neʼauvaʼmofeʼmo kahau huka nategeʼnao afaʼa maino.

78 Apakiʼapileʼmo aliʼa asaga huʼa neʼataya vayaʼmogimo nagaetegamo hosu kavaʼmo huʼnayaʼmofeʼmo apavagage hisiya yaʼmo alika apamiyo. Nagaetegamo hosu kavaʼmo huʼnayaʼmonanafa namiʼnana keʼaepa gekaeʼmo nagesa afifi huʼna maiguve.

79 Kagaefeʼmo koli huteʼa kagaemo kavayafatiʼmo huʼnana keʼaepa gekamo afiʼnaya vayaʼmo alika aika atagineka apategeʼapao nagaetegamo eyo.

80 Nagaemo avoʼmo kae maleʼnaya keʼaepa gekaleʼmo aiʼna hapaisuva naipa nagesamo namigeʼnao navagage osisiyafeʼmo akame hino.

81 Nagupi mafaʼnemo alika katika atesanafeʼmo lusi kava huno nahauʼnigeno lokiyaʼnimo ago hano huʼniyaʼmonanafa kaha maegauve, huka huʼnana gekaeʼmo nagesamo afiteʼna navayagunagu nehuve.

82 Gekamo afole aisiyaʼaeʼmo aulu heʼna ageʼna maiʼnogeno naulagafatiʼmo nagafu nekiye. Hainu afinaʼmo naha maeteka naipamo alika falu huka nategane.

83 Nagaemo afu agufaletiʼmo alo huʼnaya ani kekana huʼna maiʼnove. Halinamo neʼaigenoʼaeʼmo vaiʼniya ani kekana huʼna maiʼnovaʼmonanafa avoʼmo kae maleʼnaya keʼaepa gekaeʼmo nage okaniʼna nagesamo neʼafuve.

84 Na magi afinaʼmo aliʼyakamo neʼaluva vekamoʼnamo kana yaʼmo aliʼna maiguve. Hainu afinaʼmo apaini huʼa neʼnataya vayaʼmo alika fako huka apateteka kayoʼmo apamigane.

85 Ala apaki aliteʼa apakufamo avaleliʼa nehaiya vayaʼmogimo kelifiʼmo asagauʼna aisuvafeʼmo kelimo kafi maleʼnae. Ani kavaʼmo keʼaepa gekamo akame nosaya kavaʼmo haneʼniye.

86 Kagaemo muki hiyo, huka laha paiʼnana gekamo alagi lama gemo haneʼniye. Apakaetegamo hosu kavaʼmo osuʼnovaʼmonanafa apaini huʼa neʼnatae. Naha mao.

87 Ma mopafiʼmo maiʼnogeʼapaeʼmo aliʼa hano huʼa natalesayafeʼmo huʼnageʼnaeʼmo hogoʼamo falisuvafeʼmo nehuʼnaeʼmo namiʼnana keʼaepa gekamo oʼataleʼnove.

88 Nagaemo kavayafatiʼmo huʼnana keʼaepa gekamo akame hisuvafeʼmo muki afinaʼaeʼmo kahau kayamopafiʼmo nekahaiya kavakaletiʼmo alika he tika nato.

89 O Ala kava nene, huʼna, gekamo alagi asagauno oʼaigiyaʼmonanafa kokuʼnapiʼmo lokiya vaino haneme haneme uno haneno hano osugiye.

90 Kagaemo muki afinaʼmo gekamo akame huka afole aiteʼa faliteʼa hume hume neʼvaya vayaʼaitegamo alagepa kavaʼmo nehane. Kagaemo ma mopamo faika ateʼnanageno haneme haneme eno hemenimo haneʼniye.

91 Muki yaʼamo alo huʼnanageno keʼaepa gekamo akame huno haneme haneme eno hemeniʼeʼmo afaʼa haneʼniye. Muki yaʼamogimo aliʼyakamo neʼaliye.

92 Nagaemo keʼaepa gekaeʼmo namogaga oʼaiʼnovesinana kana yaʼmo aliʼneʼnaeʼmo ago faliʼnovesine.

93 Namiʼnana keʼaepa gekaeʼmo muki afinaʼaeʼmo nage okanigiye. Gekaletiʼmo alagepa huʼna maisuva yaʼmo alika namiʼnanaʼmofeʼmae.

94 Nagaemo namiʼnana keʼaepa geeʼmo kahauya huʼnovaʼmofeʼmo nagaemo kagaika vekamo maiʼnovanagi nagufamo alika katika nato.

95 Hosu kavaʼmo nehaya vayaʼmogimo namagisageʼna falisuvafeʼmo nagava maiʼnayaʼmonanafa kavayafatiʼmo huʼnana keʼaepa gekaeʼmo nagesa afifi huʼna maiguve.

96 Nagaemo ageʼnovana muki haino hapaiʼniya yaʼmo ago hano huʼnigeʼna ageʼnove. Hano huʼniyaʼmonanafa keʼaepa gekamoʼmo yofo yaʼamoʼmo alopa yaʼmo haneʼniye.

97 Nagaemo keʼaepa gekaeʼmo lusi kava huno nahau nayamopafiʼmo nahauʼniye. Neteʼe uneʼeʼmo gekaeʼmo nagesa afifi huʼna maiʼnove.

98 Muki afinaʼmo kagaemo hiyo, huka huʼnana keʼaepa gekamo nagaeʼeʼmo magokepi lokaeno haneʼniyaʼmofeʼmo keʼaepa gekaletiʼmo alika naya neʼmalanageʼnaeʼmo nagaemo afiteʼna ageʼnova kavaʼmoʼa kame vayaʼnimogi afiteʼa ageʼnaya kavaʼapimo ago aeno agaseʼniye.

99 Kavayafatiʼmo huʼnana gekaeʼmo nagesa afifi huʼna maiʼnovaʼmofeʼmo nagaemo gemo aepaʼamo afiʼnova kavaʼnimoʼmo tisa vayaʼnimogi afiʼnaya kavaʼapimo ago aeno agaseʼniye.

100 Namiʼnana keʼaepa gemo akame nehuvaʼmofeʼmo nagaemo gemo aepaʼamo afiʼnova kavaʼnimoʼmo kosuna vayaʼmogi gemo aepaʼamo afiʼnaya kavaʼapimo ago aeno agaseʼniye.

101 Gekamo akame huteʼna muki hosu kateʼmo oʼvisuvafeʼmo naiyamo kalavusi huʼna ateʼnove.

102 Kagaikamo alika naya maleʼnanaʼmofeʼmo alika fako nehana gekamo oʼataleʼnove.

103 Nagaemo gekamo neʼna afi geʼnogenoʼaeʼmo haga nahauʼniye. Gekamo hagaʼamoʼmo luʼmemo anumoʼmo nehiya hagaʼamo ago aeno agaseno haga nehiye.

104 Namiʼnana keʼaepa gemoʼmo gemo aepaʼamo neʼafuva kavaʼmo alino namiʼniyaʼmofeʼmo muki aigofe gelefeʼmo naini huʼnove.

105 Gekamoʼmo lamugana huno haneʼnenoʼaeʼmo aeno ha leʼnigeʼna umenitata nehuve. Gekamoʼmo aeno ha leno visuva kaʼmo nave neliye.

106 Nagaemo huʼnaeʼmo, Alika fako nehana gekamo fatago gemo akame huguve, huʼna nagoʼyamo ataleteʼna ago kaha paiʼnove.

107 O Ala kava nene, huʼna, lusi kana yaʼmo aliʼnovanagi kaha maegauve, huka huʼnana gekalefeʼmo alika he tika nato.

108 Kahao ke hovanagi kagaefeʼmo nahau nayamopafiʼmo nahauʼnigeʼna navayafatiʼmo hisuva gemo ofalinigana huʼna kamisuva yaʼmo aliyo. Kagaemo alika fako nehana gemo alika naya malo.

109 Nagaemo muki afinaʼmo afaʼa neʼmauva yaʼnimo atalesuva kavategamo maiʼnovaʼmonanafa keʼaepa gekaeʼmo nage okaniʼniye.

110 Hosu vayaʼmogimo natafausiyafeʼmo aneʼaimo hanagi maleʼnayaʼmonanafa namiʼnana keʼaepa gekamo amagiʼna oʼataleʼnove.

111 Mafaʼneʼapimogimo afoʼapimogi kagemi yaʼapimo neʼaliya kava huʼna kavayafatiʼmo huʼnana keʼaepa gemo aliʼnovanageno hetamaʼnimo hanege hanege huno hanegaiye. Ani gekaeʼmo naipafiʼmo namogaga neʼauve.

112 Avoʼmo kae maleʼnaya keʼaepa gemo akame hume hume uʼna falisuva afinaʼmo hano hisiyafeʼmo naipamo aliʼna he tiʼna ateʼnove.

113 Nagaemo lole apakesamo neʼafiya vayaʼaifeʼmo naini nehuvaʼmonanafa keʼaepa gekaeʼmo nahau nayamopafiʼmo nahauʼniye.

114 Nagaemo kagaepiʼmo fala kiʼna maiʼnogeka kagaemo haleguʼnimo maiʼnane. Gekamo alagi afole aigiye, huʼna huteʼna navayagunagu huʼna maiʼnove.

115 Hosu kavaʼmo nehaya vayaʼmogitapae, huʼna, nagaetegatiʼmo ataletapa viyo. Gotiʼnimoʼmo hiyo, huno huʼniya gemo akame huguve.

116 Alagepa huʼna afaʼa maisuvafeʼmo kaha maegauve, huka huʼnana gekalefeʼmo nayateʼmo aliyo. Afole aisiya kavafeʼmo navayagunagu nehuvaʼmofeʼmo fiku yanageno navagage hugiye.

117 Nayateʼmo aliyo, afela oseʼna afaʼa maiguve. Afaʼa maiʼneʼna muki afinaʼmo avoʼmo kae maleʼnaya keʼaepa gekamo akame huguve.

118 Muki vayaʼmogi avoʼmo kae maleʼnaya keʼaepa gekamo amagiʼa neʼatalaya vayaʼmo kakameʼyamo neʼapamine. Apakaemo aigofe kavaʼmo nehuʼapaeʼmo apakaiʼapieʼmo humi neʼapatae.

119 Goli yafaʼmo atafiʼmo kaeʼnagenoʼaeʼmo oʼaniʼyaʼamo leno kalo paeno ataleʼnigeʼa aliʼa neʼatalaya kava huka hosu vayaʼmo alika neʼapatalanaʼmofeʼmo kavayafatiʼmo huʼnana keʼaepa gekaeʼmo nahau nayamopafiʼmo nahauʼniye.

120 Nagaemo kagaefeʼmo koli nehugenoʼaeʼmo nagufamoʼmo atete nehiye. Alika fako nehana kavakaeʼmo koli nehuve.

121 Nagaemo alagepa huʼna aliʼna fako huʼna apateteʼna fatago kavaʼmo huʼnove. Kana yaʼmo aliʼa neʼnamiya vayaʼai apayapiʼmo maisuvafeʼmo alagi nataleka oʼuvo.

122 Anonaʼnilefeʼmo eka naimuʼyaleʼmo maigeʼnao alagepa huʼna maino. Fiku yanageʼa ala apaki aliteʼa apakufamo avaleliʼa nehaiya vayaʼmogi kana yaʼmo aliʼa namigayanagi naha mao.

123 Nagufamo alika katika natesanafeʼmo aulu heʼna agege fatago kavakalefeʼmo gekamo agesuvafeʼmo aulu haeʼna agege huʼna maiʼnogenoʼaeʼmo naulagafatiʼmo nagafu nekiye.

124 Kahau huka neʼapatana kava huka kahau huka nateteka avoʼmo kae maleʼnaya keʼaepa gekamo alika naya malo.

125 Nagaemo aliʼyakamo neʼaluva vekamo maiʼnove. Nagaemo keʼaepa gekamo kavayafatiʼmo hisanageʼna gekamo aepaʼamo afisuva kavaʼmo alika namiyo.

126 O Ala kava nene, huʼna, apakaemo keʼaepa gekamo ago aeʼa ati kaeʼnayaʼmofeʼmo aliʼyakamo alisana afinaʼmo afole aiʼniye.

127 Gekamo aeʼa ati kaeʼnayaʼmofeʼmo hiyo, huka huʼnana gekalefeʼmo nahauʼniya kavaʼmoʼa hogote goli yafafeʼmo nahauʼniya kavaʼmo ago aeno agaseʼniye.

128 Gekamo aeʼa ati kaeʼnayaʼmofeʼmo muki kavatefeʼmo namiʼnana keʼaepa gekaeʼmo, fatago gemo haneʼniye, huʼna nagesamo afiteʼna aigofe kavatefeʼmo naini nehuve.

129 Kavayafatiʼmo huʼnana keʼaepa gekaeʼmo nahau neʼauva gemo haneʼniyaʼmofeʼmo nagupi mafaʼnemoʼmo akame nehiye.

130 Gekamoʼmo vayaʼai apaipafiʼmo faleno uno haitenoʼaeʼmo aeno ha nele. Negi vayaʼmogi gekamo afiteʼapaeʼmo gemo aepaʼamo afigae.

131 Hiyo, huka huʼnana gekaeʼmo naga teʼnigeʼnaeʼmo navayamo aka huneʼna ha ha huʼnove.

132 Kagikaeʼmo hapau apayamopafiʼmo hapauʼniya vayaʼaitegamo nehana kava huka nagaefeʼmo kahau huka nato.

133 Kagaemo gekaletiʼmo alika ho huka nateteka hosu kavaʼmoʼa yagaino oʼnatesiyafeʼmo nataleka oʼuvo.

134 Namiʼnana keʼaepa gekamo akame hisuvafeʼmo kana yaʼmo aliʼa namiʼnaya kavapatiʼmo hatu maeka nato.

135 Kaugosafatiʼmo ha le yakamoʼmo aliʼyakamo neʼaluva vekamoʼnaleʼmo aeno ha leno. Avoʼmo kae maleʼnaya keʼaepa gekamo alika naya malo.

136 Vayaʼmogimo keʼaepa gekamo akame nosayaʼmofeʼmo lusi kava huno naunumo uno nelamiye.

137 O Ala kava nene, huʼna, fatago vekamo maiʼneka alagepa fatago kavaʼmo huka alika fako huka neʼatane.

138 Kavayafatiʼmo hiyo, huka huʼnana keʼaepa gekamo fatago gemo alagi lama gemo haneʼniye.

139 Kame vayaʼnimogi gekaeʼmo apake kaniʼniyaʼmofeʼmo nayamukiki nehuva kavaʼnimoʼmo atagana huno leno nasaga liʼniye.

140 Gekamo alagi alagepa gemo haneʼniyaʼmofeʼmo aliʼyakamo neʼaluva vekamoʼnamo gekaeʼmo nahau nayamopafiʼmo nahauʼniye.

141 Ala vekamo oʼmaiʼnogeʼapaeʼmo nagaefeʼmo ina agufa vekamo maiʼniye, huʼa nehayaʼmonanafa namiʼnana keʼaepa gekaeʼmo alagi nage okaniʼniye.

142 Fatago kavakamoʼmo hanege hanege huno muki afinaʼaeʼmo hanegaiye. Keʼaepa gekamo alagi lama gemo haneʼniye.

143 Hanageke yaʼmo nagaeteʼmo afole aiʼnigeno nagafu kiʼniyaʼmonanafa hiyo, huka huʼnana gekaeʼmo namogaga neʼauve.

144 Kavayafatiʼmo huʼnana keʼaepa gekamo fatago kavaʼamoʼmo alagi hanege hanege huno muki afinaʼaeʼmo hanegaiye. Kagaemo gemo aepaʼamo afisuva kavaʼmo namigeʼnao afaʼa maino.

145 Nagaemo muki naipafatiʼmo, Ala kava nene, huʼna, geʼnimo afiyo, avoʼmo kae maleʼnaya keʼaepa gekamo akame huguve, huʼna kagaefeʼmo ge nehuve.

146 Nagaemo, Nagufamo alika katika nategeʼnao kavayafatiʼmo huʼnana keʼaepa gekamo akame hino, huʼna kagaefeʼmo ge nehuve.

147 Ko otiʼnigeʼnaeʼmo he tiʼna, naha mao, huʼna ge nehuve. Gekamo afole aigiye, huʼna navayagunagu huʼna maiʼnove.

148 Nagaemo gekaeʼmo nagesa afifi huʼna maisuvafeʼmo haniʼilagamo nau okaleʼna afaʼa maiʼnove.

149 O, Ala kava nene, huʼna, kahau kayamopafiʼmo kahauʼniya kavakaletiʼmo geʼnimo afiyo. Alagepa huka alika fako nehana kavakaletiʼmo alika he tika nato.

150 Hosu kavaʼmo nehaya vayaʼmo nahaopaleʼmo eʼnae. Apakaemo keʼaepa gekamo hanetegeʼapaeʼmo afagiʼaleʼmo maiʼnae.

151 O Ala kava nene, huʼna, kagaemo nahaopaleʼmo maiʼnanagenoʼaeʼmo muki gekamo hiyo, huka huʼnana gekamo alagi lama gemo haneʼniye.

152 Nagaemo akeyaʼvilagamo kavayafatiʼmo huʼnana keʼaepa gekamo faika ateʼnanaʼmofeʼmo muki afinaʼmo afaʼa hanegaiye, huʼna ago afiʼnove.

153 Nagaemo keʼaepa gekaeʼmo nage okaniʼniyaʼmofeʼmo kana yaʼmo aliʼnovanagi kagesamo afiteka hatu maeka nato.

154 Agotileʼmo he tika maiʼneka naha maeka hatu maeka nato. Kaha maegauve, huka huʼnana gekalefeʼmo alika he tika nato.

155 Hosu vayaʼmogimo avoʼmo kae maleʼnaya keʼaepa gekaeʼmo kahauya nosayaʼmofeʼmo apakufamo alika katika apatesanafeʼmo afagiʼaleʼmo maiʼnae.

156 O Ala kava nene, huʼna, Lusi kava huka kahau huka apatege apatege huka neʼmaine. Alagepa huka alika fako nehana kavakaletiʼmo alika he tika nato.

157 Asole vayaʼmogi apaini huʼa natege kame huʼa natege huʼa maiʼnayaʼmonanafa kavayafatiʼmo huʼnana keʼaepa gekamo ataleʼna oʼuʼnove.

158 Hosu kavaʼapimo aeʼa ati kaeʼnaya vayaʼmogi gekamo akame nosayaʼmofeʼmo apakeʼnogenoʼaeʼmo naipamoʼmo kana huʼniye.

159 Namiʼnana keʼaepa gekaeʼmo nahau nayamopafiʼmo nahauʼniya kavaʼnieʼmo kagesamo afiyo. Kahau kayamopafiʼmo kahauʼniya kavakaletiʼmo alika he tika nato.

160 Akeyaʼvilaga aepa faiʼnana afiʼnatetiʼmo haneʼniya gekamo alagi lama gemo haneʼniye. Muki gekamo alika fako nehana gekamoʼmo hanege hanege huno muki afinaʼaeʼmo hanegaiye.

161 Ala vayaʼmo yagaiʼnaya vayaʼmogi apaini huʼa neʼnataya kavaʼapimo aepa vekamo oʼmaiʼnovaʼmonanafa gekaekeʼmo koli nehuve.

162 Vayaʼmogi kamemo huʼa aeʼa apakaseteʼa alopa kagemi yaʼmo aliteʼapaeʼmo apamogaga neʼaiya kava huʼna gekaeʼmo namogaga neʼauve.

163 Aigofe gelefeʼmo naini huʼnovaʼmonanafa keʼaepa gekaeʼmo nahau nayamopafiʼmo nahauʼniye.

164 Fatago kavaʼmo huka alika fako nehanaʼmofeʼmo muki afinaʼae afinaʼaeʼmo seveniʼa afinaʼmo kahao ke nehove.

165 Keʼaepa gekaeʼmo hapau apayamopafiʼmo hapauʼniya vayaʼmo alagepa huʼa maiʼnageno apaipamoʼmo falu nehiyanageno mago yaʼmoʼa apavalelino asagauno aisiya yaʼmo alagi ohaneʼniye.

166 Ala kava nene, huʼna, nagufamo alika katika natesanafeʼmo navayagunagu huʼna maiʼneʼnaeʼmo hiyo, huka huʼnana gekamo akame nehuve.

167 Nagupi mafaʼnemoʼmo kavayafatiʼmo huʼnana keʼaepa gekamo akame nehigenoʼaeʼmo lusi kava huno nahau nayamopafiʼmo neʼnahaiye.

168 Muki nehuva kavaʼaʼnimo kaulagaleʼmo haneʼniyaʼmofeʼmo namiʼnana keʼaepa gekaʼe kavayafatiʼmo huʼnana keʼaepa gekaʼeʼmo akame nehuve.

169 O Ala kava nene, huʼna, lokiya vaiʼna ge nehuva geʼnimo afiyo. Lapa maegauve, huka huʼnana gekalefeʼmo gemo aepaʼamo afisuva kavaʼmo namiyo.

170 Aukaya nehuva geʼnimo afiyo. Lapa maegauve, huka huʼnana gekalefeʼmo hatu maeka nato.

171 Kagaemo avoʼmo kae maleʼnaya keʼaepa gekamo alika naya neʼmalanaʼmofeʼmo ala kagikamo kamiguve.

172 Muki gekamo hiyo, huka huʼnana gekamo fatago gemo haneʼniyaʼmofeʼmo navayafatiʼmo gekamo aeʼna hakalo huʼna hapa paiguve.

173 Namiʼnana keʼaepa gekamo lekana pai maleʼnovaʼmofeʼmo kayatetiʼmo naha mao.

174 O, Ala kava nene, huʼna, nagufamo alika katika natesanafeʼmo naga nete. Keʼaepa gekaeʼmo namogaga neʼauve.

175 Nagupi mafaʼnemoʼmo afaʼa maisiya yaʼmo namigeʼnao ala kagikamo kamino. Alika fako huka nateteka naha mao.

176 Nagaemo hiyo, huka huʼnana gekaeʼmo nage okaniʼniyaʼmofeʼmo kahauya huka nago. Afela heʼniya sipisipigana huʼna kataleʼna uʼnovanagi aliʼyakamo neʼaluva vekamo kahauya huka nageka navalo.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ