Samu 118 - The Keyagana NT and 25 OT books

Muki afinaʼmo hau huno neʼapateyanageno ani kava huno hau huno apategaiye, huno huʼniya gemae

¹ Ala kava neʼmo alagepa vekamo maiʼniyaʼmofeʼmo agaefekeʼmo hao ke heyo. Hau huno neʼapateyanageno muki afinaʼaeʼmo hau huno apatege apatege huno maigiye.

² Isaleli vayaʼmogitamo, Hau huno neʼapateyanageno muki afinaʼaeʼmo hau huno apatege apatege huno maigiye, huta higetao.

³ Eloni nofi vayaʼmogitapae, huʼna, Hau huno neʼapateyanageno muki afinaʼaeʼmo hau huno apatege apatege huno maigiye, hutapa hiyo.

⁴ Muki vayaʼmogitapamo agaefekeʼmo koli hutetapa mono nehaya vayaʼmogitapamo, Hau huno neʼapateyanageno muki afinaʼaeʼmo hau huno apatege apatege huno maigiye, hutapa hiyo.

⁵ Lusi hanageke yaʼmo aliʼneʼnaeʼmo Ala kava nefekeʼmo keya aeʼna ge huʼnogenoʼaeʼmo geʼnimo afiteno hatu maeno nateʼnigeʼna afaʼa maiʼnove.

⁶ Ala kava neʼmo nagae vekamogeno naha maesiyafeʼmo maiʼniyaʼmofeʼmo vayaʼmogi nagaetegamo hisaya kavafeʼmo koli osuguve.

⁷ Ala kava neʼmo nagae vekamogeno naha maesiyafeʼmo maiʼniyaʼmofeʼmo apakeʼnovana nagaefeʼmo apaini nehaya vayaʼmo asagauʼa aigae.

⁸ Vayaʼmogimo laha maesayafeʼmo alita amufa apamisunana kanale osugifa Ala kava nefekeʼmo alita amufa amisunana kanale hugiye.

⁹ Ala apaki aliteʼa yagaiʼnaya vayaʼmogi laha maesayafeʼmo lagesamo afisunana kanale osugifa Ala kava nefekeʼmo laha maegaiye, huta lagesamo afisunana kanale hugiye.

¹⁰ Muki alu nofi vaya alu nofi vayaʼmo kame vayaʼnimo maiʼneʼa faiʼa vego huʼa nateʼnageʼnaeʼmo Ala kava neʼmo himamuʼaletiʼmo alagi aliʼna hano huʼna apatalegauve.

¹¹ Muki haopalega maiʼneʼa faiʼa vego huʼa nateʼnageʼnaeʼmo Ala kava neʼmo himamuʼaletiʼmo alagi aliʼna hano huʼna apatalegauve.

¹² Luʼmegana huʼa faiʼa vego huʼa nateʼnayaʼmonanafa aufe nofipiʼmo malage huno atamo leno yu neheya kava huʼna Ala kava neʼmo himamuʼaletiʼmo alagi aliʼna hano huʼna apatalegauve.

¹³ Kameʼnimogae, huʼna, alika nagoʼya faitalanageʼna heleve hisuvafeʼmo huʼnogenoʼaeʼmo Ala kava neʼmoʼa naha maeʼniye.

¹⁴ Ala kava neʼmoʼa lokiya vaino nateʼnigeʼna yokemo nehuve. Agaemo nagufamo ago alino katino nateʼniye.

¹⁵ Afiyo, huʼna, alagepa vayaʼmogimo seli noʼapifatiʼmo apakufamo ago alino katino apateʼniya kavafeʼmo yokemo huʼapaeʼmo, Ala kava neʼmoʼa himamuʼaletiʼmo ani kavaʼmo huʼniye.

¹⁶ Himamuʼaletiʼmo aeta apakaseʼnone, huʼa nehae.

¹⁷ Ofaliʼna afaʼa maiʼneʼnaeʼmo Ala kava neʼmoʼa huʼniya kavafeʼmo ava gemo aeʼna hakalo huʼna hapa paiguve.

¹⁸ Ala kava neʼmoʼa lusi kava huno namagiʼniyaʼmonanafa afaʼa nataleʼnigeʼna ofaliʼnove.

¹⁹ Alopa mono noʼmo kitamo yakika nategeʼnao uʼna haiʼna Ala kava nefeʼmo hao ke heno.

²⁰ Ala kava neʼmo kipaʼamo haneʼnigeʼa alagepa vayaʼageʼmo uʼa nehaiye.

²¹ Geʼnimo afiteka nagufamo alika katika nateʼnanaʼmofeʼmo kahao ke nehove.

²² Yafatetiʼmo noʼmo nekiya vayaʼmogimo mago no nekiya yafafeʼmo, afa yafane, huʼa huteʼa aliʼa yaga auʼa ataleʼnagenoʼaeʼmo Gotiʼa ani yafafeʼmo, hogote yafaʼmo noʼmo aluga alugaʼamo faiʼna atesuva yafaʼmo haneʼniye, huno huteno alino asagauno ateʼniye.

²³ Ala kava neʼmoʼa ani kavaʼmo huʼnigetaeʼmo ageteta aeto agufa kanale kavaʼmo huʼniye, huteta lahau aiʼnone.

²⁴ Ala kava neʼmoʼa ani afinaʼmo hu maleʼniye. Ani afinaʼmo lamogaga aigetao.

²⁵ Aukaya huta ge hutaeʼmo, O Ala kava nene, huta, lagufamo alika katika lato. O Ala kava nene, huta, laha maegenoʼao aliʼyatimoʼmo alagepa huno afole aino, huta aukaya huta ge nehune.

²⁶ Gotiʼa Ala kava neʼmo agiʼalefeʼmo neʼeya vekamo fiku ha maeno amino. Lagaemo Ala kava neʼmo mono noʼafatiʼmo Gotiʼa fiku lapa maeno lapamino, huta nehune.

²⁷ Ala kava neʼmo Gotiʼa maiʼniye. Agaemo ha le yaʼamo alino lamiʼniye. Ofalini afumo alita hiʼyalamuteʼmo maleʼnetapa nofitetiʼmo kita atafau maleyo.

²⁸ Gotiʼnimogamo maiʼnananageʼna kahao ke hegauve. Gotiʼnimogamo maiʼnananageʼna ala kagikamo kamiguve.

²⁹ Ala kava neʼmo alagepa vekamo maiʼniyaʼmofeʼmo agaefekeʼmo hao ke heyo. Hau huno neʼapateyanageno muki afinaʼaeʼmo hau huno apatege apatege huno maigiye.