Samu 116 - The Keyagana NT and 25 OT books

Nagaemo ge huʼnogeno Ala kava neʼmoʼa afiteno naha maeʼniye, huno huʼniya gemae

¹ Nagaemo nunumuʼmo huge keya aeʼna ge huge huʼna maiʼnogenoʼaeʼmo Ala kava neʼmoʼa afiʼniyaʼmofeʼmo agaefekeʼmo nahau nayamopafiʼmo neʼnahaiye.

² Keya aeʼna ge huʼnogeno geʼnimo afiʼniyaʼmofeʼmo ofaliʼna afaʼa maiʼneʼnaeʼmo muki afinaʼaeʼmo keya aeʼna ge huguve.

³ Falisuva kavaʼmoʼa nofi aegekana huno natafauno alagi huno maiʼniye. Kanolufiʼmo uʼna lamiguve, huʼna nagesamo afiʼna nahausoli huteʼna koli huʼnove.

⁴ Ani kava huʼna maiʼneʼna Ala kava nefeʼmo huʼnaeʼmo, Ala kava nene, huʼna, kahao ke hovanagi nagupi mafaʼnemo alika katika ato, huʼna keya aeʼna ge huʼnove.

⁵ Ala kava neʼmoʼa fikumo hapa maeno apamige fatago kavaʼamo huge nehiye. Gotitimoʼmo hau huno nelateya vekamo maiʼniye.

⁶ Ala kava neʼmoʼa apakimo ohaneʼnigeʼa afiteʼa oʼageʼnaya vayaʼaiteʼmo yagaino neʼapate. Hosu yaʼmo aliʼnogenoʼaeʼmo naha maeʼniye.

⁷ Ala kava neʼmoʼa alagepa huno naha maeʼniyaʼmofeʼmo nauneʼnameyo, huʼna, aika afeleka maika haga lo.

⁸ Ala kava neʼnimogae, huʼna, falisuva kavategatiʼmo nagupi mafaʼnemo ago alika katika ateteka naunumo aeka kalo paeka nateteka naiyafiʼmo oʼnahaesiyafeʼmo yagaika nateʼnane.

⁹ Nagaemo Ala kava neʼmo aulagaleʼmo ofaliʼa afaʼa maiʼnaya vayaʼaitegamo umenitata nehuve.

¹⁰ Nagesamo afiʼna fatago nehuvaʼmofeʼmo ge huʼnove. Ge huʼnaeʼmo, lusi hanageke yaʼmo aliʼnove, huʼna ge huʼnove.

¹¹ Nagaemo, Muki vayaʼaifeʼmo alagepa huʼna nagesamo oʼafiʼneʼna malage huʼna gemo huʼnaeʼmo, aigofe vayaʼmo maiʼnae, huʼna huʼnove.

¹² Ala kava neʼmoʼa nagaetegamo lusi kava huno alagepa kavaʼmo huʼniyaʼmofeʼmo anonaʼalefeʼmo na agufa yaʼmo amiguve.

¹³ Nagaemo lagufamo alino katino lateʼniya kavafeʼmo nagesamo afiteʼna kapufati aniʼmo neteʼna Ala kava nefekeʼmo keya aeʼna ge huguve.

¹⁴ Nagaemo, naha maeʼniyaʼmofeʼmo agaetegamo alagepa kavaʼmo huguve, huʼna huʼnova gemo akame huʼna Ala kava neʼmo vayaʼamogi apaulagaleʼmo agaetegamo alagepa kavaʼmo huguve.

¹⁵ Ala kava neʼmoʼa vayaʼamo falisaya kavafeʼmo hunoʼaeʼmo, Naulagaleʼmo alopa monileʼyaʼmo aeno agaseʼniya kavane, huno nehiye.

¹⁶ Ala kava nene, huʼna, aliʼyakamo neʼaluva vekamo maiʼnove. Itaʼnimoʼmo aliʼyakamo neʼaliya aʼmo maiʼniya kava huʼna maiʼnove. Hatu maeka nateʼnanageʼna afa vekamo maiʼnove.

¹⁷ Kahao ke heʼna ofalinimo kamiteʼna kagaefekeʼmo keya aeʼna ge huguve.

¹⁸ Naha maeʼniyaʼmofeʼmo Ala kava nefeʼmo, kagaetegamo alagepa kavaʼmo huguve, huʼna huʼnova gemo akame huʼna vayaʼamogi apaulagaleʼmo agaetegamo alagepa kavaʼmo huguve.

¹⁹ Yulusalemu taonimo folagapiʼmo Ala kava neʼmo mono noʼafiʼmo huguve. Ala kava neʼmo agiʼaleʼmo alita asaga hiyo.