Samu 115 - The Keyagana NT and 25 OT books

Aigofe gotigimo laha oʼmaegayaʼmonanafa Ala kava neʼmokeʼmo laha magaiye, huno huʼniya gemae

¹ O Ala kava nene, huta, Kagaemo lagitilefeʼmo ha le konali lagitimo olamika kagikalefeʼmo ha le konali kagikamo aliyo.

² Na kava higeʼapaeʼmo alu nofi vaya alu nofi vayaʼmogi huʼapaeʼmo, Gotiʼapimoʼmo haiyaʼaleʼmo maiʼniye, huʼa hugae.

³ Gotitimoʼmo kokunapiʼmo maiʼniye. Agaemo muki hisiyafeʼmo hauʼniya kavaʼmo nehiye.

⁴ Aigofe gotiʼapimogi apakaiʼapimo apayatetiʼmo siluva yafatetiʼmo alo huge goli yafatetiʼmo alo huge nehae.

⁵ Aigofe gotiʼapimogi apavayamo haneʼniyaʼmonanafa ge nosae. Apaulagamo haneʼniyaʼmonanafa noʼagae.

⁶ Apakesamo haneʼniyaʼmonanafa gemo noʼafiye. Apagoʼyamo haneʼniyaʼmonanafa atumo noʼafiye.

⁷ Apayaʼmo haneʼniyaʼmonanafa noʼatafae. Apaiyamo haneʼniyaʼmonanafa ka umenitata nosae. Lugoʼapimo haneʼniyaʼmonanafa apavayafatiʼmo apakemo noʼaiye.

⁸ Apakaemo aigofe gotigimo alo nehaya vayaʼmo aigofe gotigigana huʼa maiʼnae. Aigofe gotigifeʼmo aliʼa amufa neʼapamiya vayaʼmogi ani kava huʼa apakaekana huʼa maiʼnae.

⁹ O Isaleli vayaʼmogitapae, huʼna, Ala kava nefeʼmo alita amufa amiyo. Agaemo hapa maeno halegukana huno yagaino neʼapate.

¹⁰ Gotifeʼmo mono hutapa neʼapataya Eloni nofi vayane, huʼna, Ala kava nefeʼmo alita amufa amiyo. Agaemo hapa maeno halegukana huno yagaino neʼapate.

¹¹ Ala kava nefeʼmo koli nehaya vayane, huʼna, Ala kava nefeʼmo alita amufa amiyo. Agaemo hapa maeno halegukana huno yagaino neʼapate.

¹² Ala kava neʼmoʼa lagaefeʼmo agesamo afiʼniyanageno alino auleno lategaiye. Agaemo Isaleli nofi vayaʼmo alino auleno apategaiye. Agaemo Eloni nofi vayaʼmo mono huʼa neʼapataya vayaʼmo alino auleno apategaiye.

¹³ Ala kava neʼmoʼa agaefeʼmo muki koli nehaya vayanagi apaki haneʼniya vayanagi apaki ohaneʼniya vayanagi huno alino auleno apategaiye.

¹⁴ Ala kava neʼmoʼa lapakaeʼe mafaʼne anagatapiʼeʼmo magoʼe magoʼe huno alino auleno lapateno.

¹⁵ Kokuʼnaʼe ma mopaʼeʼmo alo huʼniya Ala kava neʼmoʼa alino auleno lapateno.

¹⁶ Kokunaʼmo Ala kava neʼmo koʼamo haneʼnigenoʼaeʼmo agaemo ma mopamo lamiʼniye.

¹⁷ Ago faliʼnaya vayaʼmogimo Ala kava neʼmo agiʼaleʼmo aliʼa asaga nosae. Muki vayaʼmogi ge osisaya kopiʼmo uʼa lamiʼa maiʼnaya vayaʼmogimo Ala kava neʼmo agiʼaleʼmo aliʼa asaga nosae.

¹⁸ Nosayaʼmonanafa lagaemo afaʼa maiʼnona vayamogitamo hemenigekeʼmo Ala kava neʼmo agiʼaleʼmo alita auleta ateme ateme ugune.