Samu 113 - The Keyagana NT and 25 OT books

Apakaemo Gotiʼa alagepa huno hapa maeʼniya kavafeʼmo agiʼaleʼmo aliʼa asaga huʼnaya kavafeʼmo huʼniya gemae

¹ Ala kava neʼmo agiʼaleʼmo alitapa asaga hiyo. O Ala kava neʼmo aliʼyaʼamo neʼaliya vayaʼmogitapae, huʼna, agiʼaleʼmo alitapa asaga hiyo.

² Vayaʼmogi Ala kava neʼmo agiʼalefeʼmo aliʼa auleʼa ateyo. Hemeniʼe muki afinaʼeʼmo aliʼa auleʼa ateyo.

³ Yegemo haine neʼeya haopalegatiʼe uno yegemo uno nelamiya haopalegatiʼeʼmo Ala kava neʼmo agiʼaleʼmo alitapa asaga hiyo.

⁴ Ala kava neʼmo muga anagamo maiʼnenoʼaeʼmo muki nofi vayaʼaiteʼmo yagaino neʼapate. Ha le konali yaʼamoʼmo muki kokuʼnate yaʼmo aeno aga seʼniye.

⁵ Ina laʼmo Ala kava neʼmo Gotitimogana huno maiʼniye. Agaemo alagi muga anagamo neʼmaiye.

⁶ Agaemo aulu heno koku; naʼe kokuʼnapi maiʼnaya vayaʼe mopafi maiʼnaya vayaʼeʼmo apakesiyafeʼmo agaiʼamo alino afepiʼmo neʼate.

⁷ Agaemo kagemi yaʼapimo ohaneʼniya vayaʼmo mumusopafatiʼmo alino asaga huno neʼapate. Kafu nehaya vayaʼmo apavaleno aliʼa uʼa ataleʼnaya hosuʼniya yaʼmo aliniʼuʼa ataleʼnaya yapatiʼmo apavaleno alino asagano neʼapate.

⁸ Agaemo alino asagauno neʼapategeʼa ala apakimo aliteʼa ala vayaʼeʼmo lokaeʼa maiʼnae. He, agae vayaʼaʼeʼmo maiʼnae.

⁹ Agaemo anamo aʼne anagaʼmo afamo anagaʼapifiʼmo maisayafeʼmo fikumo hapa maeno neʼapamiye. Ala kava neʼmo agiʼaleʼmo alitapa asaga hiyo.