Samu 112 - The Keyagana NT and 25 OT books

Alino auleno apateʼnigeʼa maiʼnaya vayaʼaifeʼmo huʼniya gemae

¹ Ala kava neʼmo ala agiʼamo amiyo. Gotiʼa Ala kava nefeʼmo koli nehiya vekamo alino auleno ateʼniye. Agaemo Gotiʼa hiyo, huno huʼniya geʼaeʼmo lusi kava huno hauʼnigeno amogaga neʼaiye.

² Mafaʼneʼamogimo ma mopafiʼmo lokiya vayaʼmo maigae. Gotiʼa aginago vayaʼamo alino auleno apategaiye.

³ Moniʼaʼe asole kagemiyaʼaʼeʼmo noʼafiʼmo hanesigeno fatago kavaʼamo hano osuno hanege hanege huno hanegaiye.

⁴ Hani huʼniya yapiʼmo ha le yaʼmoʼa fatago vekalefeʼmo aeno ha legaiye. Agaemo fiku hapa maeno apamige hau huno apatege vayaʼaitegamo hapauʼniya kavaʼmo huge fatago kavaʼmo huge nehiye.

⁵ Fatago vekamoʼmo kanale kavaʼmo huno vayaʼai anonaʼapilefeʼmo neʼapamiye. Aigofe kavaʼmo huno aliʼyaʼamo noʼalifa fatago kavaʼmo huno aliʼyaʼamo neʼaliye.

⁶ Alagepa vekamo asagauno oʼaisigeʼa vayaʼmogimo agaefeʼmo apake kaniʼa oʼataleʼa muki afinaʼmo apakesamo afigae.

⁷ Aipamoʼmo atete nosigeno Ala kava nefeʼmo alino amufa neʼamiye. Hosu kavafeʼmo ava gemo afisiyafeʼmo koli osugiye.

⁸ Agaemo mago yafeʼmo agesa afiteno koli nosiye. Agaemo agesiyana Gotiʼa ha maeno kame vayaʼamo aeno apaka sesigeno agegaiye.

⁹ Ani fatago vekamoʼmo kagemi yaʼamo alino fako huno kagemi yaʼapimo ohaneʼniya vayaʼaina apamiʼniye. Fatago kavaʼamoʼmo muki afinaʼmo hanege hanege huno hanegaiye. Lokiyaʼamo hanesigeʼapaeʼmo ala agimo amigae.

¹⁰ Hosu vekamoʼmo ani kavaʼmo agetenoʼaeʼmo ohauʼninageno aipamoʼmo kana hugiye. Koʼmopamo avayafiʼmo hanigeno ani neheya kava huno alagi oʼmaigiye. Hosu vayaʼmogi alagepa kavaʼmo apakaetegamo afole aisiyafeʼmo apavayagunagu nehayaʼmonanafa ani hapauʼniya kavaʼmo alagi hano hugiye.