Samu 110 - The Keyagana NT and 25 OT books

Ala kava neʼmoʼa Ala kava neʼnieʼmo ha paiʼniya gemae

¹ Ala kava neʼmoʼa Ala kava neʼnieʼmo, lamaga nahaopaleʼmo faika maime maime neʼugeʼnao kame vayakamo aliʼna kaiya afeʼalumelaga apateno, huno ha paiʼniye.

² Ala kava neʼmoʼa kayotetiʼmo yagaika apatesana himamukamo Saiyoni taonifatiʼmo alino atesigeno ugiye. Kame vayakamogi folagapiʼmo maiʼneka yagaika apato, huno kaha paiʼniye.

³ Himamukaletiʼmo aliʼyaʼmo alisana afinaʼmo vayakamogimo apaipamo kaliteʼa apakufamo kamiteʼa apaote konali kukenamo aliʼa vaiteʼa kakame hugae. Aʼnemogimo mafaʼnemo apaipafatiʼmo aliʼa neʼapataya kava huno netepiʼmo laoʼyaʼmo nelamiye. Ani kava huno Gotiʼa neya vayakamo alino apatesigeʼa laoʼyakana huʼa afole aiteʼa kagaetegamo ugae.

⁴ Ala kava neʼmoʼa alu aipa agesamo oʼafino agoʼyamo ataleteno ge hunoʼaeʼmo, Melikisetekiʼa mono huno neʼapateya vekamo maiʼniya kava huka agae akamelegatiʼmo agae nofi vekamo mono huka neʼapatana vekamo maiʼneka muki afinaʼaeʼmo maige maige huka maigane, huno kaha paiʼniye.

⁵ Ala kava neʼmo lamaga kahaopaleʼmo maiʼniye. Agaemo aipamo leno apatesiya afinaʼmo kini vayaʼmo alagi kamitimo apamagigiye.

⁶ Agaemo muki alu nofi vaya alu nofi vayaʼmo alino fako huno apateteno kamitimo apamagisigeʼa faliteʼapaeʼmo apakufaʼamo mopafiʼmo asagauno aigiye. Agaemo muki haopalega maiʼnaya kini vayaʼeʼmo kamemo huteno huno aeno apakasegaiye.

⁷ Kateʼmo neʼunoʼaeʼmo ka agiʼnaleʼmo haneʼniya anipatiʼmo negaiyaʼmofeʼmo he tino lokiya vaino aeno apakasegaiye.