Samu 108 - The Keyagana NT and 25 OT books

Gotiʼa kame vayatimo aeno apaka sesiya kavafeʼmo huge Neviniʼa yokemo huge huʼniya gemae

¹ O Gotiyo, huʼna, Nagaemo naipamo he tino lokiya vaino haneʼniye. Nagupi mafaʼnemoʼmo yokemo huno kagikaleʼmo alino asaga hugiye.

² Nagaemo yegemo auʼmo kaleʼniyapatiʼmo aliʼna he tiʼna ateteʼna gita amagige kuleleʼmo amagige huguve.

³ O Ala kava nene, huʼna, alu nofi vaya alu nofi vayaʼmogi folagapatiʼmo kagaefeʼmo mono huguve. Nagaemo muki vayaʼmogi folagapatiʼmo yokemo huʼna kagikaleʼmo aliʼna asaga huguve.

⁴ Kahau huka nelatana kavaʼmo atupaʼamoʼmo kokuʼnapiʼmo uno haino aeno aga seʼniye. Muki afinaʼmo gekamo akame nehana kavaʼmoʼa hiyateʼmo uno haiʼniye.

⁵ O Gotiyo, huʼna, vayaʼmogimo kagikaleʼmo aliʼa asaga hisagenoʼa alagi anagamo uno haino. Ma mopafi muki haopalegamo ha le konali yakamoʼmo aino atagu faino.

⁶ Kahau kayamopafiʼmo kahauʼniya vayaʼmogita hosu kavapatiʼmo lagufamo alika katika latesanafeʼmo nunumuʼmo nehuva geʼnimo afitekaeʼmo lamaga kayatetiʼmo lahau vaiyo.

⁷ Gotiʼa aote geʼaletiʼmo hunoʼaeʼmo, Nagaemo kamemo ago huʼna aeʼna apaka seteʼna namogaga aiteʼna Sekemi mopaʼe Sukoti kagoʼmu koʼeʼmo vayaʼnimo aliʼna fako huʼna apamiguve.

⁸ Giliyati mopaleʼmo maiʼnaya vayaʼmo vayaʼnimo maiʼnae. Manasa nofi vayaʼeʼmo vayaʼnimo maiʼnae. Ifalemu nofi vayaʼmo kame hisuva kapa kakolitaʼnigana huʼa maiʼnae. Kini vekamoʼnamo vayaʼaiteʼmo yagaiʼna apatesuvafeʼmo Yuta nofi vayaʼmo hayopa kayoʼnigana huʼa maiʼnae.

⁹ Maiʼnayaʼmonanafa Movapu nofi vayaʼmo yuvapafiʼmo naiyamo sese hisuva yuvapagana huʼa maiʼnae. Iʼnomu nofi vayaʼmogimo naiyafiʼmo maigae. Nagaemo Filisatini nofi vayaʼeʼmo kamemo huʼna aeʼna apaka segauve.

¹⁰ Ina laʼmo nagaemo ani lokiya yafa kegiʼyamo haneʼniya taonifiʼmo navalelino ugiye. Ina laʼmo Iʼnomu kotegamo kaʼmo alino ho huno nategaiye.

¹¹ O Gotiyo, huʼna, Ani kavaʼmo hisana vekageʼmo maiʼnanaʼmonanafa kagaemo ago kakameʼyamo lamiʼnane. Kagaekeʼmo maiʼnanaʼmonanafa lagae ami vayaʼmo hapa oʼmaeʼnane.

¹² Vayaʼmogimo hapa neʼmaya kavaʼmo ina agufa kavaʼmo haneʼniyaʼmofeʼmo hanageke kavatilefeʼmo laha mao.

¹³ Gotiʼa kame vayatimo alino afepiʼmo apategaiyaʼmofeʼmo koli osuta himamuʼaletiʼmo kamemo huta aeta apaka segaune.