Samu 107 - The Keyagana NT and 25 OT books

Ala kava neʼmoʼa muki vayaʼaitegamo nehiya kavafeʼmo huʼniya gemae

¹ Ala kava neʼmo alagepa vekamo maiʼneno muki afinaʼaeʼmo hau huno apatege apatege huno maigiyaʼmofeʼmo agaefekeʼmo hao ke heyo.

² Ala kava neʼmoʼa kame vayaʼapimogi apayapatiʼmo hatu maeno apateʼniya vayaʼmogimo, Ala kava neʼmoʼa hatu maeno lateʼniye, huʼa hisaya gemo haneʼniye.

³ Agaemo yegemo haine neʼeya kotegatiʼmo apavalelino ege yegemo uno lamino nefaleya kotegatiʼmo apavalelino ege aluga aluga haopalegatiʼmo apavalelino ege huno apavalelineno alino anupa huno apateʼniye.

⁴ Mago vayaʼmo aniʼmo ohaneno kaʼme koteʼmo vayaʼmo oʼmaiʼnaya kotegamo afaʼa umenitata nehuʼapaeʼmo maisaya taonieʼmo kahauya huʼnayaʼmonanafa oʼageʼnae.

⁵ Afaʼa umenitata nehagenoʼaeʼmo apaka tege anifeʼmo hapauge nehigenoʼaeʼmo apakupi mafaʼneʼageʼmo aunena aiʼniye.

⁶ Ani kava huʼa hanageke yaʼmo aliʼneʼapaeʼmo Ala kava nefekeʼmo keya aeʼa ge huʼnagenoʼaeʼmo lusi hanageke yaʼmo aliʼnaya kavapatiʼmo apavalelino eʼniye.

⁷ Agaemo uʼa maisaya taonifiʼmo visayafeʼmo fatago kateʼmo apavalelino uʼniye.

⁸ O, huʼna, Vayaʼmogi Ala kava neʼmoʼa muki vayaʼaitegamo huʼniya alagepa kavaʼamo ageteʼa hapau aiʼnaya kavafeʼmo hao ke heyo.

⁹ Agaemo hapauʼnigeʼa hapaʼye nehiya vayaʼmo alino falu huno apatege apaka neteya vayaʼmo alagepa yaʼmo apamige nehiyaʼmofeʼmae.

^10-11 Mago vayaʼamogimo Gotiʼapimo geʼamo ago amagiʼa ataleteʼa anaga hogote vekamoʼmo hisaya kavafeʼmo huʼniya geeʼmo, afa gemo huʼniye, huʼa huteʼa ataleʼnayaʼmofeʼmo seli nofitetiʼmo kino apateʼnigeʼa hani huʼniya yapiʼmo ulunapiʼmo maiʼneʼa falisaya kavapiʼmo maiʼnae.

¹² Ani kava huʼnayaʼmofeʼmo lokiya aliʼyaʼmo apamiʼnigenoʼaeʼmo lokiyaʼapimo alagi hano huʼniye. Apakaemo mopafiʼmo asagauʼa aiʼnageʼapaeʼmo mago hapa maesaya vayaʼmo alagi oʼmaiʼnae.

¹³ Ani kava huʼa hanageke yaʼmo aliʼa maiʼneʼapaeʼmo Ala kava nefeʼmo keya aeʼa ge huʼnageno afiteno hanageke yaʼmo aliʼnaya kavaʼapifatiʼmo apakufamo alino katino apateʼniye.

¹⁴ Agaemo seli nofiʼmo alino kapalu aeno ataleteno hani huʼniya yapiʼmo ulunapiʼmo maiʼneʼa falisaya kavapatiʼmo apavalelino uʼniye.

¹⁵ O, huʼna, Vayaʼmogi Ala kava neʼmoʼa muki vayaʼaitegamo huʼniya alagepa kavaʼamo ageteʼa hapau aiʼnaya kavafeʼmo hao ke heyo.

¹⁶ Na kava huʼniyaʼmofeʼmo hao ke hegae. Agaemo yafa lafi kegiʼya kateʼmo aeni kitamo alino lo aeteno lokiya aeniletiʼmo ka akani maleʼnaya aenimo alino lo ae maleʼniye.

¹⁷ Negi nagi vayaʼmogimo Goti geʼamo ago amagiʼa atalege hosu kavaʼmo huge huʼnayaʼmofeʼmo kaita hapauʼniye.

¹⁸ Muki alu neʼya alu neʼyafeʼmo ohapauʼniyaʼmofeʼmo falisayafeʼmo huʼnae.

¹⁹ Ani kava huʼa hanageke yaʼmo aliʼneʼapaeʼmo Ala kava nefekeʼmo keya aeʼa ge huʼnageno hanageke yaʼmo aliʼnaya kavaʼapifatiʼmo apakufamo alino katino apateʼniye.

²⁰ Gotiʼa geʼamo alino ateʼnigeno emineʼniya geʼaletiʼmo alino alagepa huno apateʼniye. Agaemo falisaya agufa hanageke yaʼmo aliʼnaya kavategatiʼmo apavalelino uʼniye.

²¹ O, Vayaʼmogimo Ala kava neʼmoʼa muki vayaʼaitegamo huʼniya alagepa kavaʼamo ageteʼa hapau aiʼnaya kavaʼaeʼmo hao ke heyo.

²² Apakaemo Gotifeʼmo hao ke hesaya ofalinimo amagiʼa amiyo. Amiteʼa aliʼyaʼalefeʼmo apamogaga aiteʼapaeʼmo aeʼa hakalo hiyo.

²³ Alopa solovala anipiʼmo sipifiʼmo aliʼyaʼmo neʼaliya vayaʼmogimo

²⁴ Ala kava neʼmo aliʼyaʼamo agege solovala aniteʼmo huʼniya kavaʼamo ageteʼa hapau aiʼnaya kavaʼmo agege huʼnae.

²⁵ Agaemo yasi aliyo, huno nehigenoʼaeʼmo lusi kava huno yasimo aliʼnigeno aniʼmoʼa aino holakau holakau huteno apavalelino uno haiteno emineteno nehiye.

²⁶ Sipifi maiʼnaya vayaʼaiteʼmo lusi hanageke yaʼmo afole aiʼnigeʼa kokuʼnapilagamo uʼa haiteʼa emiʼeteʼa huʼnagenoʼaeʼmo apakupi mafaʼnemoʼmo ani hegekana huʼniye.

²⁷ Alopa aniʼmo neteʼa negi nagi huteʼa laku taka nehaya vayakana huʼa maiʼnae. Alagepa huta maisunafeʼmo na agufa kavaʼmo hisupi huʼa apakesamo oʼafiʼnae.

²⁸ Ani kavaʼmo huʼa hanageke yaʼmo aliʼneʼapaeʼmo Ala kava nefekeʼmo keya aeʼa ge huʼnagenoʼaeʼmo hanageke yaʼmo aliʼnaya kavapatiʼmo apakufamo alino katino apateʼniye.

²⁹ Agaemo yasieʼmo afaʼa maiyo, huno huʼnigenoʼaeʼmo aniʼeʼmo afaʼa haneʼnaʼae.

³⁰ Aniʼmo afaʼa haneʼnigeʼa apamogaga aiʼnae. Ani kavaʼmo huno apavalelino uʼnigeʼa solovala ani agiʼnaleʼmo haneʼniya taonifiʼmo uʼa avaʼyi huteʼa alagepa huʼa maisayafeʼmo huʼniya taonifiʼmo apavalelinuno apateʼniye.

³¹ O, huʼna, Vayaʼmogimo Ala kava neʼmoʼa muki vayaʼaitegamo huʼniya alagepa kavaʼamo ageteʼa hapau aiʼnaya kavaʼaeʼmo hao ke heyo.

³² Apakaemo aliʼa anupa huʼa maisayateʼmo ala agiʼamo amiyo. Apakaemo vayatama vayaʼmogi aliʼa anupa huʼa maisayateʼmo agiʼaleʼmo aliʼa asaga huʼa ateyo.

³³ Ala kava neʼmoʼa alopa aniʼmo alino leneno neʼatale. Eno haine neʼeya meti aniʼmo alagi alino laneno neʼatale.

³⁴ Vayaʼmogimo hosu kavaʼmo huʼnayaʼmofeʼmo asole neʼyaʼmo neʼaeya mopaʼapimo alino hosu mopamo hamaleno neʼate.

³⁵ Nehiyaʼmonanafa hau huʼniya mopamo alino lanitani mopamo hamaleno neʼate. Aniʼmo ohaneʼniya mopafatifeʼmo hunoʼaeʼmo, aniʼmo haikeno, huno huʼnigeno haineʼniye.

³⁶ Agaemo apaka neteya vayaʼmo ani mopaleʼmo maisayafeʼmo apavalelinuno apateʼniye. Apakaemo maisaya taoniʼapimo kisayafeʼmo apavalelinuno apateʼniye.

³⁷ Apakaemo asole neʼyaʼapimo alisayafeʼmo avina yaʼmo hakalege nofi alagamo faige huʼnae.

³⁸ Ala kava neʼmoʼa hapa neʼmaegeʼapaeʼmo asole mafaʼnemo aliʼa neʼapatae. Pulumaka anagaʼmo hapa neʼmaegeʼapaeʼmo magoʼe huʼa aiʼa atagu nefae.

³⁹ Kame vayaʼapimogi kana aliʼa apamige hanageke yaʼmo apamige hisagenoʼaeʼmo apaipamoʼmo kana hisigeʼa alagepa huʼa oʼmaisaya afinaʼmo Ala kava neʼmoʼa hapa maegaiye.

⁴⁰ Agaemo kame vayaʼapileʼmo yagaiʼnaya vayaʼmo alino afepi apateʼnigeʼa kaʼmo ohaneʼniya kaʼme kotegamo afaʼa umenitata nehae.

⁴¹ Alino afepiʼmo neʼateyaʼmonanafa kagemi yaʼapimo ohaneʼniya vayaʼmo alino asagauno anaʼaleʼmo apategeʼa hanageke yaʼmo noʼaliye. Hapa neʼmaegeʼa afamo anagaʼmo magokepiʼmo lokaeʼa maiʼnaya sipisipi anagakana huʼa maiʼnae.

⁴² Fatago vayaʼmogimo ani kavaʼmo ageteʼapaeʼmo apamogaga neʼaiyaʼmonanafa hosu vayaʼmo apavayaleʼmo alino akani maleʼnigeʼa ge nosae.

⁴³ Muki afiteʼa ageʼnaya vayaʼmogimo ani kavafeʼmo apakesa afifi huʼa maigae. Apakaemo Ala kava neʼmoʼa vayaʼaeʼmo hau ayamopafiʼmo hauʼniya kavaʼamo ageʼa aeto hugae.