Samu 106 - The Keyagana NT and 25 OT books

Isaleli vayaʼmogimo hosu kavaʼmo huʼnaya kavafeʼmo huʼniya gemae

¹ Ala kava neʼmo agiʼaleʼmo alita asaga hiyo. Alagepa vekamo maiʼniyaʼmofeʼmo hao ke heyo. Muki afinaʼmo hau huno apatege apatege huno neʼmaiye.

² Ina lagimo huʼniya kavafeʼmo ava gemo hugae. Alagepa kavaʼmo lusi kanale kavaʼmo huʼniyaʼmofeʼmo ina lagimo ani kavaʼmo huʼa agiʼaleʼmo aliʼa asaga hugae.

³ Geʼamo afiteʼa muki afinaʼmo akame huʼa alagepa kavaʼmo nehaya vayaʼmogimo Goti aulagaleʼmo alagepa huʼa maiʼnayanageʼa afaʼa apamogaga aigae.

⁴ Ala kava nene, huʼna, Vayakamo hapa maesana afinaʼmo nagaeʼefeʼmo kagesamo afiyo. Apakufamo alika katika apatesana afinaʼmo nagaeʼeʼmo nagufamo alika katika nato.

⁵ Naha maegeʼnao vayakamo alagepa huʼa maisageʼna apaketeʼnaeʼmo apakaegiʼeʼmo magokepi namogaga aiteʼna vayakaʼeʼmo Goti vayaʼamo maiʼnone, huʼna huteʼna magokepi lamogaga aigune.

⁶ Laginago vayaʼmogimo hosu kavakeʼmo huʼa maiʼnaya kava huta hosu kavakeʼmo huta maiʼnone.

⁷ Laginago vayaʼmo Isipi kotegamo maiʼnagenoʼaeʼmo Gotiʼa noʼagaya agufa lokiya aune kavaʼmo huʼniyana ageʼa aeto osuʼnae. Hau huno apateʼniya kavafeʼmo alagepa huʼa apakesamo oʼafiʼnafa ago apake kaniʼniye. Apakaemo solovala aniteʼmo uʼa avaʼyi huteʼaeʼmo anaga hogote vekalegamo hosu kavaʼmo huteʼa geʼamo ago amagiʼa ataleʼnae.

⁸ Amagiʼa ataleʼnayaʼmonanafa lapa maegauve, huno huʼniya gemo akame huno himamuʼamo alino apave lisiyafeʼmo apakufamo alino katino apateʼniye.

⁹ Agaemo solovala anifeʼmo, aika kaka vao, huno huʼnigeno aino akaka vaeʼnigeno aniʼmo folagapiʼmo hau huʼniya mopaleʼmo apavalelino uʼniye.

¹⁰ Agaemo kame vayaʼai apayapatiʼmo apakufamo ago alino katino apatetenoʼaeʼmo ani kava huno kame vayaʼapilegatiʼmo apavalelino eʼnigeʼa eʼa afaʼa maiʼnae.

¹¹ Aniʼmoʼa kame vayaʼapimo ago aeno apati kaeʼnigeʼa muki vayaʼamo ago faliʼnae.

¹² Ani kava huʼnigeʼapaeʼmo geʼaeʼmo apakesamo afiʼa fatago huʼnae.

¹³ Huʼnayaʼmonanafa huʼniya kavafeʼmo ago apake kaniʼnigeʼapaeʼmo agaefeʼmo na agufa kavaʼmo hisune, huʼa ge huʼa afi okeʼneʼa afa kavakeʼmo huʼnae.

¹⁴ Kaʼme kotega maiʼneʼapaeʼmo hosu hapaʼye huʼnigeʼa Gotiʼmo amalageka huʼnae.

¹⁵ Agaefeʼmo lamiyo, huʼa ge huʼnaya gemo afiʼniyaʼmonanafa apagupi mafaʼnemoʼmo apaka teʼniye.

^16-17 Kaʼme kotega maiʼneʼapaeʼmo Moseseʼe Ala kava neʼmo aliʼyaʼamo neʼaliya vekamo Eloniʼefeʼmo, aetana laga oseʼnaʼaʼmofeʼmo yagaitana olateʼao, huʼa huʼnageno mopamo aino akaka vaeʼnigeʼa Netaniʼe afamo anagaʼaʼenagi Amilamiʼe afamo anagaʼaʼenagi huʼa asagauʼa aiʼnageno aino akaniteno aeno apati kaeʼniye.

¹⁸ Kokuʼnapatiʼmo atamo emineno hosu kavaʼmo huteʼa anakame huʼnaya vayaʼeʼmo alagi leno apasaga liʼniye.

¹⁹ Alu afinaʼmo apakaemo goli yafatetiʼmo pulumakamo auneʼamo alo huteʼa mono huʼnae.

²⁰ Apakaemo ani kava huʼa ha le konali Gotiʼmo ataleʼa agae aimuʼyaleʼmo kahaumo neʼneya pulumakamo auneʼalefeʼmo mono huʼnae.

²¹ Gotiʼa lokiya aune kavaʼmo Isipi kotegamo huteno apakufamo alino katino apateʼniya kavafeʼmo ago apake kaniʼniye.

²² Agaemo Isipi kotegamo aune kavaʼmo huteno solovala aniteʼeʼmo lokiya kavaʼmo huʼnigeʼapaeʼmo hapau aiʼnae.

²³ Henagaʼamo Gotiʼa aipamo leno apatetenoʼaeʼmo vayaʼnimo aliʼna apagoʼya lagauʼna apatalegauve, huno huʼnigenoʼaeʼmo Gotiʼa aliʼyaʼamo alisiyafeʼmo lekana paino ateʼniya vekamo Moseseʼa nunumuʼmo huno apatetenoʼaeʼmo apamagisiya kaʼmo ago akani maleʼnigeno Gotiʼa afaʼa apateʼniye.

²⁴ Apateteno alagepa mopamo lapamiguve, huno huʼniyana apakesamo afiʼa fatago osuʼnayaʼmofeʼmo ina agufa mopamo haneʼniye, huʼa huteʼa alagepa mopaeʼmo ohapauʼniye.

²⁵ Apakaemo seli noʼapifiʼmo maiʼneʼapaeʼmo Goti geʼamo akame osuʼa ge nege nege huʼa maiʼnae.

^26-27 Ani kava huʼa maiʼnagenoʼaeʼmo ani vayaʼaifeʼmo kaʼme kotegamo lapamagiteʼna henagaʼamo lapakinago vayaʼmo alagepa mopaʼapiletiʼmo aliʼna hapa faitalesugeʼa alu vayaʼai kotegamo uʼa maiʼneʼa falige falige huʼa maigae, huno hapa paiʼniye.

²⁸ Henagaʼamo Piyo kotega aigofe gotiʼapimo agiʼamo Malifeʼmo mono huteʼa aunemeʼamo ohaneʼniya aigofe gotiʼa ofalinimo amiteʼa amiʼnaya ofalini yaʼmo neʼnae.

²⁹ Ani kava huʼnagenoʼaeʼmo Ala kava neʼmoʼa aipamo leno apateteno alopa kaitaʼmo apamiʼniye.

³⁰ Apamiʼnigeno Finiyasiʼa he tino hosu kavaʼmo huʼnaya vayaʼmo apamagiʼnigeʼa faliʼnageno Gotiʼa magoʼe huno kaitaʼmo oʼapamino apataleʼniye.

³¹ Finiyasiʼa ani alagepa kavaʼmo huʼnigenoʼaeʼmo Gotiʼa naulagaleʼmo fatago kavaʼmo huʼniye, huno hu maleʼniyanageno fatago kavaʼamo muki afinaʼmo hanege hanege huno hanegaiye.

^32-33 Apakaemo Melima kotegamo yafapatiʼmo aniʼmo emineʼniya kotegamo hosu kavaʼmo huʼnagenoʼaeʼmo Gotiʼa aipamo leno apateʼniye. Hosu kavaʼmo huʼnagenoʼaeʼmo Moseseʼa hosu aipamo kaliʼnigeno agesamo oʼafiʼneno malage huno hosu gemo huʼnigeno Gotiʼa kana yaʼmo amiʼniye.

³⁴ Henagaʼamo Gotiʼa hunoʼaeʼmo, muki alu nofi vayaʼmo kamitimo apamagigeʼa faliyo, huno huʼniya gemo oʼafiʼnae.

³⁵ Oʼafiʼa alu nofi vayaʼmogi aʼmafaʼnemo alige aʼmafaʼneʼapimo apamige huʼa maiʼneʼapaeʼmo hosu kavaʼapimo akame huʼa maiʼnae.

³⁶ Aigofe gotiʼapimogitefeʼmo mono huʼnayaʼmofeʼmo Gotiʼa apamagiʼniye.

^37-38 Apakaemo ve mafaʼneʼapiʼe aʼmafaʼneʼapiʼeʼmo apamagiʼa hosu apaune vayaʼmo ofalinimo apamiʼnae. Apakaemo mago agufa kavaʼmo osuʼnaya nute mafaʼneʼapimo apamagiteʼa Kenani vayaʼai aigofe gotiʼapimogimo apamiʼnae. Apamagiʼnaya mafaʼne anagaʼmogi kolaʼmoʼa mopamo alagi alino hosu huno ateʼniye.

³⁹ Apakaemo Gotiʼa apakameʼyamo amiteʼa hosu kavaʼmo huteʼa apakaiʼapimo aliʼa hosu huʼa apateʼnae.

⁴⁰ Ani kavaʼmo huʼnagenoʼaeʼmo Ala kava neʼmoʼa agaiʼa vayaʼaifeʼmo alagi ohauʼnigeno aipamo leno apateʼniye.

⁴¹ Hapa oʼmaeno afaʼa apakeno apataleʼnigeʼapaeʼmo alu nofi vayaʼmo kame vayaʼapimogimo eʼa yagaiʼa apateʼnae.

⁴² Kame vayaʼapimogi yagaiʼa apateʼnageʼa apaiyafiʼmo maiʼneʼa geʼapimo akame huʼnae.

⁴³ Agaemo asole afinaʼmo apakufamo alino katino apateme apateme eʼniyaʼmonanafa apakameʼyamo amiteʼa hosu kavaʼmo huteʼapaeʼmo hanageke yaʼmo aliʼnae.

⁴⁴ Ani kavaʼmo huʼa maiʼnayaʼmonanafa agaefeʼmo keya aeʼa ge huʼnageno hau huno apateʼniye.

⁴⁵ Kotalakemo huguve, huno hu maleʼniya geʼaeʼmo agesamo afiʼniye. Apakaefeʼmo hau huno apateteno halate agesamo afiʼniye.

⁴⁶ Agaemo apavaleli uʼa kalavusi aliʼyateʼmo apateʼnaya vayaʼaifeʼmo hapa paiʼnigeʼa hapau huʼa apateʼnae.

⁴⁷ O Gotiyo, huʼna, Ala kava netimogae, lagufamo alika katika lateteka alu nofi vayaʼai apayapatiʼmo lavaleka alika anupa huka lategetao kaote kagikaleʼmo alita asaga huta kateteta kahao ke heta lamogaga aino.

⁴⁸ Isaleli vayaʼai Gotiʼapimo agiʼaleʼmo alita asaga hiyo. Hemenimo agiʼaleʼmo alita asaga hutetapa muki afinaʼaeʼmo agiʼaleʼmo alita asaga hiyo. Muki vayaʼamogitapamo he, lama ge hutapa hiyo. Agiʼaleʼmo alita asaga hiyo. Gotiʼa hosu kavategatiʼmo apakufamo alino katino neʼapateya kavafeʼmo huʼniya gemae.