Samu 105 - The Keyagana NT and 25 OT books

Gotiʼa Isaleli vayaʼaiteʼmo alagepa huno yagaino apateʼniya kavafeʼmo huʼniya gemae

¹ Ala kava nefekeʼmo hao ke heyo. Agaefekeʼmo ge hiyo. Huʼniya kavafeʼmo ava gemo afisayafeʼmo muki alu nofi vaya alu nofi vayaʼaifeʼmo aeta hakalo huta hapa paiyo.

² Agaefekeʼmo yokemo huge samu yokemo huge hiyo. Lapau neʼaiya kavaʼaʼe kavaʼaʼeʼmo ava gemo hiyo.

³ Aote agiʼalefeʼmo ala lapakitapimo alitetapa lapamogaga aiyo. Ala kava nefeʼmo kahauya nehaya vayaʼmogimo apamogaga aiyo.

⁴ Ala kava netegatiʼmo himamuʼamo alisayafeʼmo uta kahauya hiyo. Augosafiʼmo agesayafeʼmo kahauya hiyo.

^5-6 Emalehamuʼa Ala kava neʼmo aliʼyaʼamo neʼaliya vekamo aginago vayaʼamogitapaʼe Yekopuʼa lekana paino ateʼniya vekamo aginago vayaʼamogitapaʼene, huʼna, lokiya kavaʼaʼe aune kavaʼaʼefeʼmo lapakesamo afiyo. Alino fako huno apateteno ani kavaʼmo hiyo, huno huʼniya geʼaeʼmo lapakesamo afiyo.

⁷ Agaemo Ala kava netimo Gotitimoʼmae. Agaemo muki ma mopafi vayaʼmo alino fako huno apateteno ani kavaʼmo hiyo, huno nehiye.

⁸ Agaemo muki afinaʼmo agaiʼamo hu maleʼniya kotalake geʼaeʼmo agesamo afiteno oʼataleno akame nehiye. Vayaʼmo afole aite afole aite hume hume neʼvisagenoʼaeʼmo afole aigiye, huno huʼniya geeʼmo age okanino agesamo neʼafiye.

^9-10 Agaemo Emalehamuʼeʼmo kotalakemo hu maleteno Emalehamu mafaʼnemo Aisakifeʼmo ani kavaʼmo huguve, huno hu maleteno Aisaki mafaʼnemo Yekopufeʼmo hanege hanege huno hanesiya kotalakemo hu maleʼniye.

¹¹ Kenani mopamo lapamisugeno lapakaitapi mopamo hanegaiye, huno ha paiʼniye.

^12-13 Aise vayaʼamogimo ina agufa nata vayaʼmo maiʼneʼapaeʼmo uʼa mago nofi vayaʼai mopaleʼmo maigeʼa atale uʼa mago alu nofi vayaʼai mopaleʼmo maigeʼa atale uʼa ani kava huʼa mago kini vekamoʼmo yagaiʼniya mopaleʼmo uʼa maigeʼa atale uʼa mago alu kini vekamoʼmo yagaiʼniya mopaleʼmo maige maige huʼa maiʼnae.

¹⁴ Ani kava huʼa maiʼnayaʼmonanafa Ala kava neʼmoʼa agaiʼa vayaʼaiteʼmo hosu kavaʼmo huʼa yagaiʼa oʼapatesayafeʼmo oʼapataleno yagaino apateʼniye.

¹⁵ Inagi yagaiʼa neʼapataya kini vayaʼaifeʼmo hunoʼaeʼmo, uvelimo lakiʼna apateʼnova vayaʼmo maiʼnayanagi apame oʼaliyo. Nagaetegati gemo alini eʼa aeʼa hakalo huʼa hapa nepaiya vayaʼmo maita halove hutapa apatetetapa hanageke yaʼmo alita oʼapamiyo, huno ge hapauʼniye.

^16-17 Ala kava neʼmoʼa, kafu hisaya kavaʼmo aliʼna afole aiʼna ategauve, huno agesamo afiteno hogoteno vayaʼamo hapa maesiya vekamo Yosefeʼmo alino ateʼnigeno uʼniye. Yosefeʼmo nepuʼamogimo avaleʼa maketi huʼnageʼa alu nofi vayaʼmogi ani mafaʼnemoʼmo kalavusi aliʼyaʼmo alisiyafeʼmo miya faiʼa avaleliʼa uʼnae.

¹⁸ Isipi kotegamo uno maiʼnigeʼa kalavusi huʼa ateteʼapaeʼmo aiyalateʼmo seli nofitetiʼmo kiʼa ateʼnageno lusi kava huno kana hauʼniye.

¹⁹ Ani kava huno maiʼnigenoʼaeʼmo Ala kava neʼmoʼa amalageka hume hume neʼvigenoʼaeʼmo afole aigiye, huno huʼniya kavaʼmo afole aiʼniye.

²⁰ Hogote kini vekamoʼmo aliʼyaʼamo neʼaliya vekaeʼmo, uka hatu maeka ato, huno huteno alino ateʼnigeno uno Yosefeʼmo hatu maeno ateʼniye.

^21-22 Hatu maeno atetenoʼaeʼmo, muki Isipi kote mopaleʼe vayaʼaiteʼeʼmo yagaika apato, huno ha paiʼnigeno Yosefeʼa hogote gamani vayaʼmo maiʼneʼa yagaiʼa neʼataya vayaʼaiteʼeʼmo yagaino apateteno vayatama vayaʼmo alino apaya maleʼniye.

²³ Ani kava huno yagaino apateʼnigeʼapaeʼmo Isaleli vayaʼmo Isipi kotegamo eʼnae. Yekopuʼe muki afamo anaga vayaʼaʼeʼmo kalaga hageʼa eʼa Hamu aginago vayaʼai mopaleʼmo Isipi kotegamo maiʼnae.

²⁴ Maiʼnagenoʼaeʼmo Ala kava neʼmoʼa vayaʼamo hapa maeʼnigeʼa asole mafaʼnemo aliʼa apateʼnageʼa aiʼa atagu faeʼa maiteʼa lokiya vayaʼmo hamaleteʼa kame vayaʼapimo aeʼa apakaseʼnae.

²⁵ Agaemo Isipi vayaʼai apaipa apakesamo alino aino afe le maleʼnigeʼapaeʼmo agaiʼa vayaʼaifeʼmo apaini huteʼa aliʼyaʼamo neʼaliya vayaʼaifeʼmo humi apateʼnae.

²⁶ Agaemo aliʼyaʼamo neʼaliya vekamo Moseseʼe lekana paino ateʼniya vekamo Eloniʼeʼmo alino anateʼnigeʼana kini vekalegamo uʼnaʼae.

²⁷ Anakaemo Goti lokiyaʼaletiʼmo noʼagaya agufa anaune kavaʼmo Isipi koteʼmo huʼnaʼae.

²⁸ Agaemo hani hisiya kavaʼmo alino ateʼnigeno emineno hani huʼniye. Isaleli vayaʼmogimo geʼamo oʼataleʼa afiʼnae.

²⁹ Agaemo kola aniʼmo alino hamaleno ateʼnigeʼa noyame anagaʼmo faliʼa hano huʼnae.

³⁰ Lokuloku anagaʼmo aiʼa atagu faeʼa muki ani mopaleʼmo maiteʼa kini vayaʼmo nehavaya nopiʼmo uʼa haiʼa maiʼnae.

³¹ Ge huʼnigeʼapaeʼmo asole kosi anaganagi apayokapi nama anaganagi huʼa eʼa muki ani mopaleʼmo aiʼa atagu faeʼa maiʼnae.

^32-33 Afa koʼmo aiyo, huno osuʼnifa ko mopa koʼmo aiyo, huno huʼnigeno muki ani koteʼmo alino alave huteno lusi ko mopa koʼmo aiteno nofiʼe fiki yosaʼeʼmo amagiʼniye. Hafosa haiʼnigeno muki haopalegamo haneʼniya yosamo amagino lo aeʼniye.

^34-35 Ge huʼnigeʼa asole akenu anagaʼmo saufa akenuʼageʼmo lekana opaisuna agufa akenu anagaʼmogimo eʼa muki hegafatalili yaʼe muki hoyalega haneʼniya neʼyaʼapiʼeʼmo neʼa hano huʼa ataleʼnae.

³⁶ Muki Isipi vayaʼai yege mafaʼne anagaʼapimo apamagiʼniye.

³⁷ Apamagiteno Isaleli vayaʼmo hatu maeno apateʼnigeʼa Isipi kotetiʼmo ataleʼa visayafeʼmo nehuʼapaeʼmo Isipi vayaʼai siluva yafaʼapiʼe goli yafaʼapiʼeʼmo aliniʼa uʼnae. Muki vayaʼamo kaita ohapauʼnigeʼa lokiya vaiʼa maiʼneʼa uʼnae.

³⁸ Isipi vayaʼmogimo apakaefeʼmo lusi kava huʼa koli huʼnayaʼmofeʼmo Isaleli vayaʼmo apataleʼa neʼvageʼapaeʼmo apamogaga aiʼnae.

³⁹ Gotiʼa muki felugaʼamo ulunapiʼmo uge maige hisayafeʼmo hiyatetiʼmo aino apati kaeteno muki haniʼilagaʼamo aeno ha leno apatesiyafeʼmo kokuʼnapatiʼmo ata leʼnigeno aeno ha leno apateʼniye.

⁴⁰ Apakaemo Gotifeʼmo ge huʼa afi geʼnagenoʼaeʼmo hifakana agufa nama anagaʼmo alino apateʼnigeʼa haleli uʼa maiʼnageʼa apatafauʼa kaeʼa neʼnae. Agaemo lusi neʼyaʼmo kokuʼnapatiʼmo apamiʼnigeʼa aliʼa neʼa apamu huʼnae.

⁴¹ Agaemo aniʼmo ohaneʼniya kotegamo yafapiʼmo amagino apalo atiʼnigeno yafapatiʼmo alopa anikefamo emineʼnigeʼa neʼnae.

⁴² Agaemo aliʼyaʼamo neʼaliya vekamo Emalehamufeʼmo ani kavaʼmo huguve, huno hu maleʼniya geʼaeʼmo agesamo afiʼniyaʼmofeʼmo ani kavaʼmo huʼniye.

⁴³ Ani kavaʼmo huno vayaʼamo apavalelino neʼvigeʼapaeʼmo lekana paino apateʼniya vayaʼamogimo yokemo huʼa apamogaga aiʼnae.

⁴⁴ Agaemo alu nofi vaya alu nofi vayaʼmogi mopamo alino apamiʼnigeʼa hoyaʼapiʼeʼmo aliʼnae.

⁴⁵ Geʼamo afiteʼa keʼaepa geʼamo akame hisayafeʼmo ani kavaʼmo huʼniye. Ala kava neʼmo agiʼaleʼmo alita asaga huta ateyo.