Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Samu 104 - The Keyagana NT and 25 OT books


Gotiʼa muki yaʼmo alo huʼniyanageta lagaemo agiʼaleʼmo alita asaga hugune, huno huʼniya gemae

1 Nagupi mafaʼneo, huʼna, Ala kava neʼmo alika auleka ato. O Ala kava neʼmo Gotiʼnimogae, huʼna, Kagaemo alagi hogote Gotigamo maiʼnane. Kagaemo kini vekamo hale konali yakamo alige ala kagikamo alige huka maiʼnane.

2 Kagaemo ina kava huʼa vayaʼmogimo kukena yatetiʼmo apakufaleʼmo vaiʼa aiʼa ati nekaya kava huka ha le yakaletiʼmo aika katiʼnekane. Kagaemo vayaʼmogimo ina kava huʼa seli noʼmo aliʼa he tiʼa ateteʼa nofitetiʼmo aeʼa api aiʼa ateʼnageno nehaneya agufa kava huka kokuʼnaʼmo alika api aika ateʼnanageno haneʼniye.

3 Kagaemo nokamo anaga aniteʼmo ki maleʼnane. Hiyaʼmo talalakagana huno haneʼnigeno yasimoʼmo kagaemo kavalelino neʼviye.

4 Agaemo enisole vayaʼamo yasigana huno alo huno apateʼniye. Aliʼyaʼamo neʼaliya enisole vayaʼmo ata vaikana huno alo huno apateʼniye.

5 Kagaemo ma mopamo maleʼnanageno alagi lokiya vaino haneʼniyaʼmofeʼmo aiseʼamo alime oʼugiye.

6 Kagaemo ma mopamo kukenagana huka solovala anitetiʼmo aika ati kae maleʼnane. Hogoteno aniʼmoʼa muki aveʼamo aeno ati kaeʼniye.

7 Ati kaeʼnigeka kagaemo lokiya gefatiʼmo ge hauʼnanagenoʼaeʼmo solovala aniʼmo aune heno uʼniye. Agemoʼmo hakalu hakalu nehigenoʼaeʼmo solovala aniʼmoʼa afitenoʼaeʼmo nagu nagu huno uno lamiʼniye.

8 Solovala aniʼmoʼa muki aveletiʼmo ataleno kagoʼmu kotegamo nagu nagu huno uʼniye. Kagaemo ani haopalegamo solovala aniʼmo hanesiyafeʼmo lekana pai maleʼnanageno haneʼniye.

9 Kagaemo hakuʼmo ago male maleʼnananageno solovala aniʼmoʼa ani hakuʼmo afaʼa aeno ha olegaiye. Afaʼa aeno ha olegaiyaʼmofeʼmo solovala aniʼmoʼa halate muki mopamo aeno ati okaegaiye.

10 Kagaemo mopafi kelifatiʼmo aniʼmo afole aiteno kagoʼmu koʼe ave koʼeʼmo hanetegeno folagapatiʼmo aniʼmo uno lamisiya kavaʼmo huʼnane.

11 Muki afela afu anagaʼmogimo ani anitetiʼmo nege afela noki anagaʼmogiʼeʼmo nege huʼnageno lugoʼapileʼmo magoʼe huno hau osuʼniye.

12 Kokuʼnate nama anagaʼmogimo ani haigileʼmo haneʼniya yosaleʼmo apanoʼmo kiteʼa yosa akopaleʼmo maiʼneʼa apakemo neʼaiye.

13 Kagaemo kokuʼnapatiʼmo koʼmo alika ataleʼnanageno aveleʼmo emine neʼe. Ina kava huka ma mopafiʼmo alika auleka ateʼnana yaʼmoʼa havai teʼniye.

14 Kagaemo pulumaka anagaʼmogimo nesaya kahaumo lagisiya kavaʼmo huge lagaemo vayaʼmogitamo muki agufa avina yaʼmo nehakalonagekaeʼmo alika hageka ateʼnanagetaeʼmo alita neʼnona kavaʼmo huge nehane.

15 Ani agufa kavaʼmo nehanaʼmofeʼmo lagaemo nofi alagamo faiʼnonageno aeʼnigeta aniʼmo huta neʼnonageno laipamoʼmo amogaga neʼaiye. Lagaemo olivi yosafatiʼmo uvelimo alita laugosafiʼmo faleʼnonageno laugosafatiʼmo fayu fayu nehiye. Lagaemo vitimo faiteta peleti mayamo kaeta neʼnonageno lagufamo lokiya neʼvaiye.

16 Koʼmo ailino emineʼnigenoʼaeʼmo Lemanoni kote yosamoʼmo asole aniʼmo neʼaliye. Ani Sita yosamo alagi Ala kava neʼmo yosamae. Akeyaʼvilagamo agaiʼamo fai maleʼniye.

17 Nama anagaʼmogimo ani Sita yosafiʼmo apanoʼmo nekiyaʼmonanafa yatala lugoʼe apaiyaʼe nama anagaʼmogimo Paeni yosafiʼmo apanoʼmo nekiye.

18 Afela meme anagaʼmogimo alopa avelegamo umenitata nehageʼapaeʼmo vale anagaʼmo avefiʼmo alopa yafa kapiʼmo fala kiʼa neʼmaiye.

19 Kagaemo kaimo alo huʼnanagenoʼaeʼmo agaemo muki kaiʼamoʼmo kafugaeʼmo lekana nepaiye. Yegemoʼmo kanaʼaleʼmo ageʼnenoʼaeʼmo uno nelamiye.

20 Kagaemo haniʼmo hisiya kavaʼmo huʼnanageno hani nehigeʼapaeʼmo haniʼilagamo yahaofilaga afela yaʼmogimo umenitata nehae.

21 Aikeli laiyoni anagaʼmogimo afueʼmo kahauya nehuʼapaeʼmo magoʼe huʼa alopa gefatiʼmo apake neʼaiye. Apakaemo kagaemo afumo apamisanafeʼmo kahauya nehae.

22 Apakaemo yegemo haiʼne neʼegeʼapaeʼmo keli apifiʼmo halate uʼa nehavae.

23 Nehavageʼapaeʼmo vayaʼmo uʼa aliʼyaʼapimo neʼaligenoʼaeʼmo yegemo uno lamino nefale.

24 O Ala kava nene, huʼna, asole aliʼyaʼmo alu aliʼya alu aliʼyaʼmo aliʼnane. Kagaemo afiteka ageʼnana kavakamo alopa kavaʼmo haneʼnigeka muki yaʼmo alo huʼnane. Kagaemo alo huʼnana yaʼmoʼmo ma mopafiʼmo alagi havaiteʼniye.

25 Solovala aniʼmo alagi alopa aniʼmo haneʼnigeʼa asole alopa noyame anaganagi aise noyame anaganagi alu yanagi huʼa anipiʼmo maiʼnae. Afaʼa lekana opaigune.

26 Alopa sipimo solovala anipiʼmo uʼeʼa nehageʼapaeʼmo kagaemo alo huka apateʼnana alopa alopa noyame anagaʼmogimo yokalo leliʼa uʼeʼa huʼa solovalapiʼmo nagosamo neʼaiye.

27 Mukiʼamogimo kagaemo neʼyaʼmo apamisanafeʼmo apaka te; nigeʼa kagava neʼmaiye.

28 Kagaemo neʼyaʼmo apamiʼnanageʼapaeʼmo neʼnae. Neʼnagenoʼaeʼmo apaipafiʼmo apamu nehiye.

29 Kagaemo kakameʼyamo apamiʼnanageʼapaeʼmo lusi kava huʼa kolikamo nehae. Kagaemo apavamusateʼmo aliʼnanageʼapaeʼmo faliteʼa halate mopamo aliʼa nehamalae.

30 Kagaemo Kaunekameʼmo alika ateʼnanageno uno alo huno neʼapate. Kagaemo ma mopafiʼmo muki saufa afumo afole aisaya kavaʼmo nehane.

31 Ala kava neʼmo ha le konali yaʼamo muki afinaʼae afinaʼaeʼmo hanege hanege huno haneno. Ala kava neʼmoʼa alo huʼniya yafeʼmo amogaga aino.

32 Agaemo mopaleʼmo aulu haeno neʼagegenoʼaeʼmo mopamoʼmo atete nehiye. Agaemo aveleʼmo ayatetiʼmo ame neʼaligenoʼaeʼmo avefatiʼmo halinamo neʼaiye.

33 Nagaemo muki afaʼa maisuva afinaʼmo Ala kava neʼmoʼa afisiyafeʼmo yokemo huguve. Nagaemo Gotiʼnimofeʼmo yoke huʼnaeʼmo agiʼaleʼmo aliʼna asaga huʼna yokemo huliʼna uʼna faliguve.

34 Nagaemo Ala kava nefeʼmo namogaga neʼauvaʼmofeʼmo agaefeʼmo nagesa afifi nehuva kavafeʼmo amuse huno nateno.

35 Agaemo ma mopafatiʼmo hosu vayaʼmo alino hosu huno apataleno. Hosu vayaʼmo hano hiyo. Nagupi mafaʼneo, huʼna, Ala kava neʼmo alika auleka ato. Ala kava neʼmo agiʼaleʼmo alita asaga hiyo.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ