Samu 103 - The Keyagana NT and 25 OT books

Ala kava neʼmoʼa hau huno lateʼniya kavafeʼmo huʼniya gemae

¹ Nagupi mafaʼneo, huʼna, Ala kava neʼmo alika auleka ato. Muki nagufamoʼe naipa nagesamoʼeʼmo aote vekamo agiʼaleʼmo alino asaga hino.

² Nagupi mafaʼneo, huʼna, alagepa huno naha maeʼniya kavafeʼmo kage okanika alika auleka ato.

³ Agaemo muki hosu kavaʼnimo alino ataleteno muki kaitaʼnimo alino nahageno neʼnate.

⁴ Falisuva kavapatiʼmo miya faino hatu maeno neʼnate. Ala kava neʼmoʼa ala nagiʼnimo namitenoʼaeʼmo nagaefeʼmo hau ayamopafiʼmo hauʼnigenoʼaeʼmo hau huno neʼnate.

⁵ Alagepa yaʼmo namiʼnigenoʼaeʼmo magoʼe yafeʼmo naipafatiʼmo ohauʼniye. Naha maeʼnigeʼnaeʼmo hakikiʼmo agapagana huʼna maiʼnove.

⁶ Ala kava neʼmoʼa aliʼa afepi apateʼnageʼa maiʼnaya vayaʼmo hapa maeteno apakaiʼapi yakeʼmo alisayafeʼmo apamigiye.

⁷ Agaemo aipafiʼmo agesamo afige hauge nehiya kavaʼamo Moseseʼmo alino ave lige huʼniya kavaʼmo Isaleli vayaʼmo alino apave lige huʼniye.

⁸ Ala kava neʼmoʼa hau huno apatege fiku hapa maeno apamige vase vase huno aipamo leno apatege lusi kava huno hau ayamopafiʼmo hauge nehiye.

⁹ Halate magoʼe huno olahaugiyaʼmonanafa muki afinaʼmo aipamo leno olategaiye.

¹⁰ Hosu kavatimo anonatilefeʼmo magoke aiyaya huno nolamiye. Hosu kavaʼmo huʼnona kavatilefeʼmo magoke aiyaya huno kayoʼmo nolamiye.

¹¹ Kokuʼnaʼmo muga anagamo haneʼniya kava huno agaefekeʼmo koli huteʼa mono nehaya vayaʼmo magoke aiyaya kava huno hau huno neʼapate.

¹² Yegemo haine neʼeya haopalegaʼe yegemo uno lamino nefaleya haopalegaʼeʼmo lusi kava huno afagiʼaleʼmo haneʼniya kava huno Gotiʼa hosu kavatimo magoke aiyaya kava huno alino afagiʼaleʼmo yaga auno neʼatale.

¹³ Afoʼapimogi mafaʼne anagaʼapieʼmo hapau huʼa neʼapataya kava huno Ala kava neʼmoʼa agaefeʼmo koli huteʼa mono nehaya vayaʼaifeʼmo hau huno neʼapate.

¹⁴ Agaemo hunoʼaeʼmo, mopaletiʼmo alo huʼna apateʼnove. Mumusopaletiʼmo alo huʼnova vayageʼmo maiʼnae, huno agesamo afiʼniyaʼmofeʼmo lagaetegamo vase vase huno aliʼyaʼmo neʼaliye.

^15-16 Kahaumoʼmo aise afinaʼmo nehaneya kava huta ma mopafiʼmo aise afinaʼmo maiteta nefalune. Kahaumoʼmo ausemo heʼnigenoʼaeʼmo malage huno yasimo neʼaligenoʼaeʼmo falu teteno hali huno mopafiʼmo asagauno neʼaiya kava huta aise afinaʼmo maiteta ago nefalune.

^17-18 Nefalunaʼmonanafa Ala kava nefeʼmo koli huteʼa mono nehaya vayaʼaifeʼmo akeyaʼvilagatiʼmo hau huno apatelineno henagaʼamo afole aisaya afinaʼeʼmo hau huno apatelinuno hau huno apateno hano osugiye. Agaemo laha neʼmaeya kava huno alita apateʼnonanageʼa henagaʼamo aliʼa apateliʼa visaya mafaʼne anagaʼmogimo kotalake geʼamo akame huteʼa ina kavaʼmo hiyo, huno huʼniya gemo neʼafiya vayaʼmo hapa neʼmae.

¹⁹ Ala kava neʼmo kokuʼnapiʼmo maiʼnenoʼaeʼmo yagaino neʼapate. Muki asole vayaʼaiteʼmo yagaino neʼapate.

²⁰ Enisole vayaʼmogitapae, huʼna, lokiya vayaʼmo maiʼnetapa geʼamo afiteta akame nehaya vayaʼmogitapae, huʼna, Ala kava neʼmo alita auletapa ateyo.

²¹ Muki kokuʼnapi maiʼnetapa aliʼyaʼamo neʼaliya vayaʼmogitapamo hauʼniya kavaʼmo nehaya vayaʼmogitapae, huʼna, Ala kava neʼmo alita auletapa ateyo.

²² Muki alo huno lapateteno muki yagaiʼniya kotegamo maiʼnaya vayaʼmogitapae, huʼna, Ala kava neʼmo agiʼaleʼmo alita asaga hiyo. Nagupi mafaʼneo, huʼna, Ala kava neʼmo alika auleka ato.