Samu 101 - The Keyagana NT and 25 OT books

Neviniʼa ina kavaʼmo huguve, huno huʼniya gemae

¹ Ala kava nene, huʼna, Nagaemo kahau huka neʼnatana kavakaʼe alagepa huka alika fako huka neʼnatana kavakaleʼefeʼmo yokemo huguve. Ala kava nene, huʼna, kagaefekeʼmo yokemo huguve.

² Ageʼna aeto huteʼnaeʼmo afiteʼna vaiʼmo alagi oʼalisuva kateʼmo uguve. Hainu afinaʼmo nagaetegamo egane. Nagaemo noʼnifiʼmo maiʼneʼnaeʼmo aliʼyaʼnimo neʼaliya vayaʼaiteʼmo yagaiʼna apateʼneʼnaeʼmo vaiʼmo alagi oʼalisuvana alagepa kavaʼageʼmo huʼna maiguve.

³ Nagaemo hosu kavaʼmo hisuvafeʼmo nagesamo oʼafiguve. Alagepa kaʼmo ataleʼa neʼvaya vayaʼai kavaʼapieʼmo naini huʼnovanageno ani agufa hosu kavaʼapimoʼa nagaeteʼmo aino okamaegaiye.

⁴ Aigofe kavaʼmo osuʼna hosu apaipa vayaʼmo hapafaiʼna apatalegauve.

⁵ Huʼa faipa huʼa neʼataya vayaʼmo hapafaiʼna apatalegauve. Ala vayaʼmo maiʼnone, huʼa huteʼa himuʼnamu kavaʼmo nehaya vayaʼmo nagaeʼeʼmo oʼmaigae.

⁶ Nagaemo Goti geʼamo oʼataleʼa akame nehaya vayaʼaifeʼmo amuse huʼna apatesugeʼa nagaeʼeʼmo magokepi lokaeʼa maigae. Aigofe gemo nosaya vayaʼmogigeʼmo aliʼyaʼnimo aligae.

⁷ Aeʼa ati nekaya vayaʼmo noʼnifiʼmo uʼa haiʼa oʼmaigae. Aigofe gemo nehaya vayaʼmo nagaeʼeʼmo magokepi lokaeʼa oʼmaigae.

⁸ Malage huʼna he tiʼna hosu vayaʼmo aliʼna hano huʼna apataleteʼna hosu kavaʼmo nehaya vayaʼmo Ala kava neʼmo taonifatiʼmo aliʼna hapa faiʼna apatalegauve.