Samu 10 - The Keyagana NT and 25 OT books

¹ O Ala kava nene, huʼna, na kava higekaeʼmo afagitegamo he tika maiʼnane. Na kava higekaeʼmo hanageke yaʼmo afole neʼaiya afinaʼmo fala kika maiʼnane.

² Hosu vayaʼmogimo apakaiʼapieʼmo apakesamo afiteʼapaeʼmo kagemi yaʼapimo ohaneʼniya vayaʼaifeʼmo apaini nehae. Apakeka apatalenegeʼa aneʼaiʼmo hanagi maleʼnaya aneʼaifiʼmo apakaiʼapimo hegae.

³ Hosu kavaʼmo nehiya vekamoʼmo hosu kavafeʼmo haʼye nehunoʼaeʼmo, alagepa kavaʼmo nehuve, huno nehiye. Agaemo hapaʼye nehiya vayaʼmo aliʼa auleʼa neʼapateyaʼmonanafa Ala kava nefeʼmo hosu gemo huteno ataleno uʼniye.

⁴ Avai avai nehiya vekamoʼmo Gotiʼa agesiyafeʼmo kahauya nosiye. Gotifeʼmo alagi agesamo noʼafiye.

⁵ Noʼafiyaʼmonanafa muki afinaʼmo aliʼyaʼamoʼmo alagepa huno afole neʼaiye. Alika fako nehana kavaʼmo muga anaga afagiʼaleʼmo haneʼnigeno hosu vekamoʼmo ageno aeto nosiye. Agaemo kame vayaʼaeʼmo avenatuʼnaʼmo heno atalegekana nehiye.

⁶ Aipafiʼmo hunoʼaeʼmo, Nagaemo asagauʼna oʼaiguve, huno agesamo neʼafiye. Muki afinaʼmo kana yaʼmo oʼaliguve, huno agesamo neʼafiye.

⁷ Muki afinaʼmo huno faipa huno apatege aigofe gemo huge koli yaʼmo alino apamisiyafeʼmo lokiya gemo huge nehiye. Hosu kavafeʼmo ava gemo huge hanageke kavafeʼmo ava gemo huge nehiye.

⁸ Agaemo muki taoniʼafiʼmo fala kino neʼmaiye. Vaiʼmo oʼaliʼnaya vayaʼmo kamiti apamagisiyafeʼmo apakava maiʼniye.

⁹ Laiyonimoʼmo fala nekiya kava huno kagemi yaʼapimo ohaneʼniya vayaʼmo apatafausiyafeʼmo fala kino maiteno yagaino maiʼniye. Umeniʼaletiʼmo neʼapatafaiye.

¹⁰ Agaemo ape huno mopafiʼmo asagauno aite maiʼniye. Maiʼnigeʼapaeʼmo vayaʼmogimo lokiya oʼvaiʼnaya vayaʼmo aeʼa apaka segae.

¹¹ Agaemo aipafiʼmo hunoʼaeʼmo, Gotiʼa nehuva kavaʼnieʼmo age kaniʼniye, huno nehiye. Aulagaleʼmo aino ati kaeʼniyanageno hisuva kavaʼnimo afa oʼagegaiye, huno nehiye.

¹² O Ala kava neʼmo Gotiyo, huʼna, he tika hosu vayaʼaina kayoʼmo apamiyo. Aliʼa afepiʼmo apateʼnaya vayaʼaifeʼmo kage okanika kagesamo afiyo.

¹³ Na kava higeʼapaeʼmo hosu vayaʼmogi Gotiʼa ataleʼa neʼvae. Apakaemo apaipafiʼmo huʼapaeʼmo, Agoti huno olategaiye, huʼa apakesamo neʼafiyaʼmofeʼmae.

¹⁴ Apakesamo neʼafiyaʼmonanafa kagaemo anonaʼapilefeʼmo apamisanafeʼmo kana yaʼmo aliʼa apamiʼnageno apakafu nekiya vayaʼaina apakeʼnane. Alagepa huʼa oʼmaiʼnaya vayaʼmo hapa maesanafeʼmo apakufamo kagae kayapiʼmo maleʼnae. Vayaʼmogi hapa noʼmaya vayaʼaina hapa neʼmane.

¹⁵ Kagaemo hosu vayaʼe hanageke yaʼmo neʼapamiya vayaʼeʼmo apayaʼmo alika lo neʼane. Kagaemo muki hosu kavaʼapimo kahauya huka ageteka kayoʼmo apamiyo.

¹⁶ Ala kava neʼmoʼa muki afinaʼmo kini vekamo maiʼneno yagaino apateme apateme ugiye. Agaefeʼmo mono nosaya nofi vayaʼmo agaiʼa mopaletiʼmo alino hapa faino apataleʼniye.

¹⁷ O Ala kava nene, huʼna, kagaemo yagu yaga vayaʼmogimo nunumuʼmo nehaya gemo afigane. Koli osisayafeʼmo apaipamo alika falu hugane. Kagetafo huka afigane.

¹⁸ Aliʼa afepi apateʼnaya vayaʼe hapa noʼmaya vayaʼmogiʼeʼmo kagaefeʼmo keya aeʼa ge hisageka afitekaeʼmo alagepa huka alika fako huka apategane. Ma mopafi vayaʼmogimo magoʼe huʼa aliʼa afepi oʼapatesayafeʼmae.