Samu 1 - The Keyagana NT and 25 OT books

Alagepa vayaʼe Gotifeʼmo mono nosaya vayaʼefeʼmo huʼniya yokemae

¹ Gotifeʼmo mono nosaya vayaʼmogimo apakesamo afiʼapaeʼmo, ina kateʼmo viyo, huʼa nehaya kateʼmo umenitata osuge hosu kavaʼmo nehaya vayaʼmo neʼvaya kateʼmo uʼa he tiʼa oʼmaige mono katefeʼmo, afa kane, huʼa huteʼa huʼa faipa huʼa neʼataya vayaʼeʼmo magokepi lokaeʼa itopaleʼmo fai oʼmaige nehaya vayaʼmogimo Goti aulagaleʼmo alagepa huʼa maiʼnayanageʼa afaʼa apamogaga aigae.

² Ani agufa kavaʼmo nosayaʼmonanafa Ala kava neʼmo keʼaepa geʼalefekeʼmo amuse huteʼa apamogaga neʼaiye. Apakaemo felugaʼe haniʼilagaʼeʼmo keʼaepa geʼaekeʼmo apakesa afifi huʼa neʼmaiye.

³ Apakaemo ani agoʼnanenamo folagapiʼmo fai maleʼniya yosamoʼmo alagamo neʼaeya afinaʼmo alagamo aesigenoʼaeʼmo haitaʼamo falu noteya yosagana huʼa maiʼnae. Muki aliʼnaya aliʼyaʼapimoʼmo alagepa huno afole neʼaiye.

⁴ Hosu vayaʼmo ani kava huʼa oʼmaiʼnae. Apakaemo mago haletiʼya yakana huʼa maiʼnae. Haleti yaʼamo haleʼnagenoʼaeʼmo yasimoʼmo alino halelino neʼviya haletiʼya yakana huʼa maiʼnae.

⁵ Maiʼnayaʼmofeʼmo Gotifeʼmo mono nosaya vayaʼmo agoti huno apatesiya yateʼmo he tiʼa oʼmaiʼa alagi asagauʼa aigae. Inagi hosu kavaʼmo nehaya vayaʼmogimo fatago vayaʼmo aliʼa anupa huʼa maisayapiʼmo uʼa oʼmaigae.

⁶ Ala kava neʼmoʼa fatago vayaʼmogimo nehaya kavaʼapieʼmo apakeno amuse nehiyaʼmonanafa agaefeʼmo mono nosaya vayaʼai aliʼyaʼapimo alino hano huno atalesigeʼa alagi afela hegae.