Salomoni Yokemae 8 - The Keyagana NT and 25 OT books

¹ Nasaʼnimoʼa itaʼnimo nuʼaleʼmo neʼniya nasaʼnimogana huka maisanafeʼmo nahauʼniye. Nasaʼnimogamo maiʼnanesinana kumatega kageteʼnaeʼmo kahaeʼna nesugenoʼaeʼmo mago vekamoʼmo ani kavafeʼmo hosu agesamo afaʼa oʼafiyesine.

² Inagi nagaemo kagaemo kavaleliʼna itaʼnimo notegamo visugekaeʼmo kagaemo alagepa huka afaʼa alika naya malegane. Nagaemo nofi alagafati anipiʼmo alagepa haga nehiya yaʼmo aliʼna ateteʼna alo huʼna kamiguve, huno ha paiʼniye.

³ Hoga ayatetiʼmo nageyutega maleʼneno lamaga ayatetiʼmo nagufaleʼmo natafauʼniye.

⁴ Yulusalemu aʼmafaʼne anagane, huʼna, lokiya gefatiʼmo huʼnaeʼmo, afela afu anagaʼmogi koli huteʼa apaune nehaya afu anagaʼaifeʼmo lapakesamo afitetapa nahau nayamopafiʼmo neʼnahaiya a kanomo aupatiʼmo haunetapa oʼateyo. Agaiʼamo hauʼninageno aupatiʼmo he tigiye, huno hapa paiʼniye.

⁵ Ina laʼamoʼmo yahaofilagatiʼmo eno hau ayamopafiʼmo hauʼniya vekamo agufaleʼmo atafautegeʼana kako kiliʼana eʼana hai eʼnaʼae, huʼa huʼnae. Kagaemo apoli yosamo aepafiʼmo havaeʼnanageʼna kahauneʼna kateʼnove. Itakamoʼmo ani yosa aepafiʼmo alino kateʼniye. Alino kateʼniya a kanomoʼmo ani yosa aepafiʼmo alino kateʼniye, huno ha paiʼniye.

⁶ Mago vekamoʼmo alagena kavaʼmo hu neʼmaleya kava huka nagaemo alika kaipafiʼmo alagena kavaʼmo hugekana huka hu malo. Ani kava huka nagaemo alika kayamoteʼmo alagena kavaʼmo hugekana huka hu malo. Ani kavatefeʼmo nahau nayamopafiʼmo nahauʼniya kavaʼmo lokiyaʼamoʼmo fali kavaʼmo lokiyaʼagana huno haneʼniye. Nagaemo kaino nefauva kavaʼmoʼa nefaliya kavakana huno haneʼniye. Kaino nefauva kavaʼmo atagana huno nele. He, lusi kava huno nele.

⁷ Hau ayamopafiʼmo nehaiya kavaʼmoʼa atagana huno neleyanageno aniʼmoʼa afaʼa aeno yu osegaiye. Aniʼmo hesiyaʼmoʼmo alagi aeno ati okaegaiye. Mago vekamoʼmo a kanoeʼmo hunoʼaeʼmo, Nagaefeʼmo kahau kayamopafiʼmo kahausiyafeʼmo muki moniʼaniletiʼmo miya faiguve, huno ha paisigenoʼaeʼmo, afaʼa ina agufa yane, huno huteno hosu aipamo kaligiye, huno huʼniye.

⁸ Lasatimoʼmo aise aʼmafaʼnemo maiʼnigeno nuʼamo oʼmeʼniye. Mago vekamoʼmo aligefeʼmo hisigetaeʼmo agaetegamo na agufa kavaʼmo hugune, huno ge huno apafi geʼniye.

⁹ Agaemo alagepa huno taonilefeʼmo yafa lafi kegiʼyagana huno maiʼnisigetaeʼmo lagaemo ani yafa lafi kegiʼyaleʼmo siluva yafatetiʼmo yatala noʼmo kime kime uta haigune. Agaemo kitagana huno maiʼnisigetaeʼmo lagaemo agaeteʼmo lokiya sita yosaletiʼmo noʼamo kigune, huʼa ha paiʼnae.

¹⁰ Nagaemo mago yafa lafi kegiʼyagana huʼna maiʼnogeno nuʼnimoʼa lole yatala vegovego notalakana huno haneʼniye. Ani afinaʼmo fiku naha maeʼnigeʼnaeʼmo aulagaleʼmo alagepa huʼna maiʼnove, huno hapa paiʼniye.

¹¹ Kini vekamo Salomoniʼa nofi hoyaʼamo Malihamoni kotega haneʼniye. Agaemo hoyaʼaleʼmo yagaiʼa atesayafeʼmo apavaleno apateʼniye. Apakaemo nofi alagamo alisayafeʼmo muki vayaʼamogimo vani tauseni vani tauseni huʼa siluva yafatetiʼmo miya faiʼa alisaya kavaʼmo haneʼniye.

¹² Hoyaʼnimo nagaiʼni hoyamo naulagaleʼmo haneʼniye. O Salomonigae, huʼna, vani tauseni siluva yafaʼmo alitesanageʼa hoyaleʼmo neʼyagaiya vayaʼmogi tu hataleti tu hataleti huʼa aligae, huno ha paiʼniye.

¹³ Hoyafiʼmo maiʼnana aʼnimogae, huʼna, kagaeʼeʼmo magokepi lokaeʼa maiʼnaya vayaʼmogimo kagemo neʼafiye. Kagemo aigeʼna afino, huno ha paiʼniye.

¹⁴ Nahau nayamopafiʼmo neʼnahaiya vekaʼnimogae, huʼna, malage huka emikeno. Mago alagepa afela afumoʼa alagepa atumo neʼaiya yaʼmo havai teno haneʼniya avelegamo nagu nagu huno eno haine neʼeya kava huka emikeno, huno ha paiʼniye.