Salomoni Yokemae 7 - The Keyagana NT and 25 OT books

¹ Kini vekamo aʼmafaʼneʼamogae, huʼna, kagaemo kaiyaleʼmo suʼmo vaika aliʼnana kaiyaʼmoʼmo magoʼe huno kanale kaiyamo haneʼniye. Kaumiʼyamo aeno hapaiʼniya yaʼe kaleʼyamo aeno hapaiʼniya yaʼeʼmo alopa moniletiʼmo miya nefaiya yafaʼmo ina kava huno alagepa huno ageʼniya vekamoʼmo alo huʼniya yafakana huno haneʼniye.

² Kagae kaipamo folagapiʼmo mago kapugana huno haneʼniye. Ani kapufiʼmo nofi alagafati aniʼmo havai teʼniye. Kaipamo kanale alagepa kaipamoʼmo ina kava huno vitimo aliniʼeʼa magokepi aliʼa anupa huʼa maleʼnaya vitimo yaveyave ausemo folagapiʼmo haneʼniya vitigana huno haneʼniye.

³ Kagaemo lole nukalaʼmoʼa ani kava huno lole kanale afela afulaʼmo lagoʼya afela afulakana huno haneʼniye.

⁴ Lugokamoʼmo mago yatala vegovego noʼmo yaveyave nokana huno haneʼniye. Kaulagalaʼmoʼa lole ani kotutalaʼmo Hesimoni taonimo yafa lafi kegiʼya kate kipateʼmo haneʼniya ani kotutalakana huno haneʼniye. Kagaemo kagoʼyamo kanale kagoʼyamo Lemanoni yahaofiʼmo yatala nokana huno haneʼniye. Kava neʼyagaiya vayaʼmogimo ani nopiʼmo maiʼneʼa Namakasi taonifi maiʼnaya vayaʼaifeʼmo aulu hapaeʼa apakeʼa yagaiʼa neʼmaiye.

⁵ Kagenopamoʼmo Kameli avegana huno haneʼniye. Kayokaʼmo okokana agufa kayokaʼmo haneʼniye, huno ha paiʼniye. Agaemo kini vekamo atafauʼnigeno uʼa haiteʼa emiʼeteʼa nehaya yateʼmo maiʼniye.

⁶ Nahau nayamopafiʼmo neʼnahaiya a kanomogae, huʼna, alagi kanale a kanomo maiʼnane. Muki yaʼakamoʼmo namogaga aisuva agufa kavaʼmo nehiye.

⁷ He tika maikaeʼmo alagi alagepa huno api aino haneʼniya kokanasi yosagana huka he tika maiʼnane. Nukamoʼmo ani agufa yosa alagagana huno haneʼniye.

⁸ Nagaemo huʼnaeʼmo, Ani yosafiʼmo uʼna haiʼna yosa akopaleʼmo atafauguve, huʼna huʼnove. Haiʼna maisugeno nukamoʼmo nofi alagamoʼa magokepiʼmo akalo akalo huno nehaneya kava huno hanegaiye. Kavayafatiʼmo apoli yosa alagamoʼa kanale atumo neʼaiya agufa atumo aigiye.

⁹ Kavayamo nofi alagafati aniʼmo hogote anikana huno hanegaiye, huno ha paiʼniye. Ani nofi alagafati aniʼmo nahau nayamopafiʼmo neʼnahaiya vekaʼnilefeʼmo haneʼniye. Ani aniʼmoʼa hagaʼageʼmo huʼniye. Apaukalegekana huʼa neʼmaiya vayaʼmogimo neʼneʼapaeʼmo ge nehae.

¹⁰ Nagaemo nahau nayamopafiʼmo neʼnahaiya vekaʼnimo aʼamo maiʼnogeno nagaefeʼmo haʼye nehiye, huno huʼniye.

¹¹ Nahau nayamopafiʼmo neʼnahaiya vekaʼnimogae, huʼna, nagaeʼeʼmo magokepi lokaeka egetaʼao malaga uguʼae. Utaʼa alu aise taonifiʼe alu aise taonifiʼeʼmo havaegauʼae.

¹² Havaetetaʼaeʼmo kotilamisiyapiʼmo he titaʼa nofi hoyalegamo utaʼaeʼmo nofiʼmoʼa ago ausisimo aeʼnisifi auseʼamo ago aino ata leʼnisifi pamagalanati yosamoʼa ago ause heʼnisifigetaʼa utaʼa agegauʼae. Maiʼnetaʼaeʼmo nahau nayamopafiʼmo neʼnahaiya kavaʼnimo aliʼna kave liguve.

¹³ Alagepa kahaumo ausemoʼa alagepa atumo neʼaiye. Nagaemo alagepa yosa alagamo aliʼna muki yafa lafi kegiʼya kate kipaʼaleʼmo maleʼnove. Magoʼamo akeyaʼvilaga alige magoʼamo hemenimo alige huʼna aliʼna anupa huʼna maleʼnove. Nahau nayamopafiʼmo neʼnahaiya vekaʼnimogae, huʼna, kagaetefeʼmo aliʼna anupa huʼna maleʼnove, huno ha paiʼniye.