Salomoni Yokemae 6 - The Keyagana NT and 25 OT books

¹ Kanale alagepa a kanomo maiʼneka muki aʼne anagaʼmo ago aeka apakaseʼnana a kanomogae, huʼa, Kahau kayamopafiʼmo kahauʼniya vekamo haiyategamo uno maiʼniye. Lagaemo kagaeʼeʼmo magokepi lokaeta kahauya huta agesunafeʼmo haiya kateʼmo uʼniye, huʼa ge huʼa afi geʼnae.

² Nahau nayamopafiʼmo neʼnahaiya vekaʼnimo hoyaʼafiʼmo uno maiʼniye. Agaemo sipisipi anagaʼamo hoyaʼafatiʼmo nesayafeʼmo apavalelino uʼniye. Agaemo kanale yaveyave kahau ausemo alino anupa huno malesiyafeʼmo hoyaʼafiʼmo uno maiʼniye.

³ Nahau nayamopafiʼmo nahauʼniya vekamo nagaiʼni vekaʼnimo maiʼnigeʼna agaiʼa aʼamo maiʼnove. Agaemo sipisipi anagaʼamo apavalelino uʼnigeʼa kanale yaveyave kahaumoʼmo ausemo heʼniya folagapatiʼmo kahaumo neʼnae, huno hapa paiʼniye.

⁴ Nahau nayamopafiʼmo neʼnahaiya aʼnimogae, huʼna, vae, kanale taonimo Tilisi taonigana huka maiʼnane. Kanale taonimo Yulusalemu taonigana huka maiʼnane. Asole ati vayaʼmogimo asole kalahauʼmeʼmo aliniʼa neʼvageʼa apaketeʼapaeʼmo hapau neʼaiya asole ati vayakana huka maiʼnane.

⁵ Aulu nahaeka oʼnago. Kaulagamoʼmo ago aeno nagaseʼnigeʼna kagaefeʼmo neʼnahaiye. Kayokaʼmoʼa meme anagaʼmogi Gileyati avelegatiʼmo magokepi uʼa nelamiya meme anagaʼai apayokakana huno haneʼniye.

⁶ Muki kaveʼakamoʼmo yaveyave sipisipi anagaʼmo hemenimo aniʼmo faleʼa apateʼnagenoʼaeʼmo apayokaʼmoʼa yaveyaveʼageʼmo nehiya kava huno kaveʼmoʼa yaveyaveʼageʼmo nehiye. Mani muki sipisipi anagaʼmogimo lagoʼya apanaʼaumo maleʼnae. Mago anamo sipisipimo oʼmaiʼnae.

⁷ Kayokaʼmoʼa kagesa aepaleʼmo aino ati kaeʼniya kagesa aepamoʼmo mago yosamo agiʼamo pamagalanati yosa alagamo aino apalo atiʼniya yosa alagagana huno haneʼniye.

⁸ Kini vekamo aʼne anagaʼmo asole aʼne anagaʼmo maiʼnae. Sigisitiʼa kuvini aʼne anagaʼmo maige henaga aʼne anagaʼamo eitiʼamo maige lekana opaisuna agufa alu aʼmafaʼne anagaʼmo aliʼniya aʼne anagaʼamo maige huʼnae.

⁹ Maiʼnayaʼmonanafa kaugoʼyave namaʼnimoʼa aeno apakaseno uno haino hapaiʼniye. Asole aʼne anagaʼmo maiʼnayaʼmonanafa aʼnimo magokeʼageʼmo maiʼniye. Itaʼamoʼmo magoke aʼmafaʼnemo alino ateʼniye. Alino ateʼniya itaʼamoʼmo hunoʼaeʼmo, hogote aʼmafaʼneʼnimo maiʼniye, huno agesamo afiʼniye. Muki aʼmafaʼne anagaʼmogi ageteʼapaeʼmo hao ke heʼnae. Kuvini aʼne anagaʼmogiʼe kini vekamo alu aʼne anagaʼamogiʼeʼmo agiʼaleʼmo aliʼa asaga huʼa ateʼnae.

¹⁰ Aulu neʼnahaeya a kanomo ina laʼae. Kaimoʼmo alagepa huno aeno ha lege yegemoʼmo alagepa huno aeno ha lege nehiya kava huno aulu neʼnahae. Asole ati vayaʼmogimo asole kalahauʼmeʼmo aliniʼa neʼvageʼa apaketeʼapaeʼmo hapau neʼaiya ati vayakana huno maiʼniye, huno hapa paiʼniye.

¹¹ Nagaemo kagoʼmufilagatiʼmo alagamo neʼaeya yosamo agesuvafeʼmo uʼna lamiʼna alagepa yosamoʼmo alagamo neʼaeya yosa hoyafiʼmo maiʼnove. Nofiʼmo alagepa huno haneʼnifi pamagalanati yosamoʼa ause heʼnifi huʼna agesuvafeʼmo uʼna lamiʼnove.

¹² Nagesamo oʼafiʼnogenoʼaeʼmo malage huno nagupi mafaʼnemoʼa alino he tino nateʼnigeʼna aliʼna namalagiteʼnaeʼmo visuvafeʼmo nehuve. Hapauʼnisiya vayaʼnilefeʼmo hosimoʼmo halaulino neʼviya talalagana huno alino ha maleno nateʼniye, huno huʼniye.

¹³ Yulusalemu a kanomogae, huʼa, Aika atagi neka eno. Kagaemo atagi neka egetao lagaemo kageno, huʼa ha paiʼnae. Yulusalemu a kanomo agesayana na agufa a kanomo agegae. Agaemo lole nofi ati vayakana huno maiʼniya a kanomo agegae, huno hapa paiʼniye.