Salomoni Yokemae 5 - The Keyagana NT and 25 OT books

¹ Nasaʼnimogamo aʼnimogae, huʼna, Nagaemo hoyaʼnilegamo ago eʼna alagepa atumo neʼaiya yaʼmo agiʼamo meyaʼe mago alagepa atumo neʼaiya yaʼeʼmo aliʼna anupa huʼnove. Nagaemo lumemo anoʼaʼe anuʼaʼeʼmo neʼnove. Nagaemo nuʼanuʼe nofi alagafati aniʼeʼmo neʼnove. Nao vayaʼnimogitapae, huʼna, alitapa neyo. Nahau nayamopafiʼmo neʼnahaiya vayaʼnimogitapae, huʼna, He, aniʼmo netapa lapamu hiyo.

² Haniʼilagamo nau kaleʼnovaʼmonanafa nagupi mafaʼnemoʼa auʼmo okaleno afaʼa maiʼniye. Nahau nayamopafiʼmo neʼnahaiya vekaʼnimo agemo afiʼnove. Kitaʼnileʼmo hakalu hakalu huteno, Nasaʼnimogamo nahau nayamopafi aʼnimogae, huʼna, Kitamo yakika nato. Haniʼilagamo aniʼmoʼa emineno nagenopafiʼmo aniʼmo faleno nateʼnigeno nayokapiʼmo lao yaʼmo emineno havai teʼniye, huno naha paiʼniye.

³ Nagaemo kukenaʼnimo ago asagiʼna ataleʼnovanageʼna halate haiya kava huʼna aliʼna vaiguve. Nagaemo naiyaʼnimo ago sese hu maleʼnovanageʼna halate he tiʼna uʼneʼna hisugeno naiyaʼnileʼmo oʼaniʼya faigiye, huʼna ha paiʼnove.

⁴ Nahau nayamopafiʼmo neʼnahaiya vekaʼnimoʼa kitamo alita neʼyakuna yateʼmo ayaʼmo aliʼnigeʼna ageteʼnaeʼmo naipamoʼmo he tiʼniye.

⁵ Nagaemo kitamo yakiʼna atesuvafeʼmo he tiʼna kitamo alita neʼyakuna yaʼaleʼmo nayaʼmo neʼalugenoʼaeʼmo meya aniʼmo alagepa atu neʼaiya aniʼmo nayate haneʼniya aniʼmoʼa kita alita neʼyakuna yaʼaleʼmo aeno kamaeʼniye.

⁶ Nahau nayamopafiʼmo nahauʼniya vekaʼnimo kita yakiʼna ateʼnovaʼmonanafa ago utegeʼna nagaemo oʼageʼnove. Nagaemo huʼniya geʼaeʼmo nagesamo neʼafugenoʼaeʼmo nagupi mafaʼnemoʼmo alagi hosuʼniye. Nagaemo agaefeʼmo kahauya huʼnovaʼmonanafa oʼageʼnove. Nagaemo keya aeʼna ge huʼnovaʼmonanafa agaemo geʼnileʼmo aeno atagaina huno ge osuʼniye.

⁷ Umenitata nehuʼa taonifiʼmo neʼyagaiya vayaʼmogi nageteʼapaeʼmo namagiʼa nagufamo aiʼa atalagauʼnae. Yafa lafi kegiʼyaleʼmo neʼyagaiya vayaʼmogi naugosafiʼmo aiʼna ati kaeʼna neʼaluva lavolavoʼnimo aliʼnae.

⁸ Yulusalemu aʼmafaʼne anagaʼmogitapae, huʼna, Lapakaemo nahau nayamopafiʼmo neʼnahaiya vekaʼnimo agetapaeʼmo agaefeʼmo nahau nayamopafiʼmo nahauʼniyaʼmofeʼmo lokiyaʼnimo ohaneʼniye, hutapa ha paiyo, huno hapa paiʼniye.

⁹ Kanale alagepa a kanomo maiʼneka muki aʼne anagaʼmo ago aeka apakaseʼnana a kanomogae, huʼa, kahau kayamopafiʼmo kahauʼniya vekamo haiya kava huno maiʼneno muki hapau apayamopafiʼmo nehapaiya vayaʼmo aeno apakaseʼniye. Haiya kava huno maiʼneno muki hapau apayamopafiʼmo nehapaiya vayaʼmo aeno apakaseno maiʼniyaʼmofeʼmo lokiya gefatiʼmo hiyo, huka laha nepaine, huʼa ha paiʼnae.

¹⁰ Nahau nayamopafiʼmo neʼnahaiya vekaʼnimo yaveyave augosamo hanege haesa augosamo hanege huʼniye. Agaemo asole tauseniʼa vayaʼmo ago aeno apakaseʼniye.

¹¹ Agenopamoʼmo hogote goli yafakana huno leʼnigeno ayokakuʼmo kanale alopa ayokakuʼmo mago anupa namamo ayokagana huno haneʼniye.

¹² Aulagamoʼmo kaugoʼyave anagaʼmogi nuʼmo anuletiʼmo aniʼmo faleteʼa uʼa ani agiʼnaleʼmo he tiʼa maiʼnaya namagana huno haneʼniye.

¹³ Agalametaletiʼmo alagepa atumo neʼaiya yosamo aise yosamo hiʼyalamuteʼmo haneʼniya yosagana huno hanege kahaumo ausemo aulafilega haneʼniya kahaumo ausegana huno hanege huʼniye. Avayamo kanale kahaumo ausegana huno haneʼnigeno avayafatiʼmo alagepa atumo neʼaiya aniʼmo meya aniʼmo lape tape huno asagauno neʼaiye.

¹⁴ Ayatalaʼmoʼa goli linimo apayateʼmo neʼvaiya linigana huno haneʼniye. Alopa moniletiʼmo miya nefaiya yafaʼmo aeno ha neleya yafaʼmo apayateʼmo neʼvaiya linifiʼmo neʼmalaya linigana huno haneʼniye. Agufamoʼa elefeni afumo avekana huno haneʼnigeno agufalegatiʼmo yaveyaveʼage huteno aeno ha leʼniye.

¹⁵ Aiyaʼalaʼmo kanale yaveyave yafatetiʼmo alo nehaya posilaʼmo golilateʼmo aeʼa he tiʼa ateʼnageno haneʼniya posigana huno haneʼniye. Agaemo Lemanoni avegana huno maige alagepa sita yosagana huno maige huʼniye.

¹⁶ Avayafatiʼmo haga huʼniye. He, muki agufaʼamo alagepa agufamo haneʼniye. Yulusalemu aʼmafaʼne anagaʼmogitapae, huʼna, Agaemo nahau nayamopafiʼmo neʼnahaiya vekaʼnimo maige nao vekaʼnimo maige huʼniye, huʼna lapa paiʼnove, huno hapa paiʼniye.