Salomoni Yokemae 4 - The Keyagana NT and 25 OT books

¹ Nahau nayamopafiʼmo neʼnahaiya aʼnimogae, huʼna, vae, kanale alagepa a kanomo maiʼnane. He, kanale alagepa a kanomo maiʼnane. Kaulagamo kaugoʼyavemo aulagagana huno haneʼnigeno kanale kayokaʼmoʼmo aino ati kaeʼniye. Kayokaʼmoʼa meme anagaʼmogi Gileyati avelegatiʼmo magokepi lokaeʼa uʼa nelamiya meme anagaʼai apayokakana huno haneʼniye.

² Muki kaveʼamoʼmo yaveyave sipisipi anagaʼmogi apayokaʼmo magoke aiyaya huʼa lagauʼa apateteʼa hemenimo aniʼmo faleʼa apateʼnagenoʼaeʼmo apayokaʼmoʼa yaveyaveʼage nehiya kava huno kaveʼmoʼa yaveyaveʼageʼmo nehiye. Mani muki sipisipi anagaʼmogimo lagoʼya apanaʼaumo maleʼnae. Mago anamo sipisipimo oʼmaiʼnae.

³ Kavayamo kanale haesa nofikana huno haneʼnigeka alagepa kagemo neʼaine. Kayokaʼmoʼmo aino ati kaeʼniya kagesa aepaleʼmo mago yosamo agiʼamo pamagalanati alagamo aino apalo atiʼniya yosa alagagana huno haneʼniye.

⁴ Lugokamo kini vekamo Neviniʼa kame nehiya yaʼamo maleʼniya noʼmo yatala vegovego nokana huno haneʼniye. Ani nopiʼmo lokiya vaiʼa kame nehaya vayaʼai haleguʼapimo tauseniʼa haleguʼmo asai maleʼnae.

⁵ Lole nukalaʼmo kanale lagoʼya afela afulaʼmoganimo yaveyave kahaumo ausemo haneʼniya folagapatiʼmo kahaumo neʼnaʼa afulakana huno haneʼniye.

⁶ Nagaemo alagepa atumo neʼaiya yosamo haneʼniya avefiʼmo uʼna haiʼna maime maime neʼvisugenoʼaeʼmo kotisigenoʼaeʼmo hani huʼniya kavaʼmo hano hugiye.

⁷ Nahau nayamopafiʼmo neʼnahaiya aʼnimogae, huʼna, kanale alagepa a kanomo maiʼnane. Oʼaniʼya faifa yaʼmo kagaeteʼmo ohaneʼniye.

⁸ Aʼnimogae, huʼna, kagaemo nagaeʼeʼmo Lemanoni aveletiʼmo ataleka ugetaʼao. Amana aveletiʼmo agege Sena aveletiʼmo agege Hemoni aveletiʼmo agege huka ago. Ani loleʼe magoʼe avefiʼmo Laiyoni anagaʼe Laiyonigana huʼa maiʼnaya afela pusi anagaʼeʼmo maiʼnae.

⁹ Nasaʼnimogamo aʼnimae, huʼna, kagaemo aiseʼatoʼamo nagaemo aulu nahaeka neʼnaganagenoʼaeʼmo naipafiʼmo lusi kava huno nahaʼye huʼniye. Nagaemo lugokamo ageteʼnaeʼmo kagaeteʼmo asagauʼna neʼauve.

¹⁰ Nasaʼnimogamo aʼnimae, huʼna, Nagaefeʼmo kahau kayamopafiʼmo kahauʼniya kavaʼmoʼa kanale alagepa kavaʼmo haneʼniye. Ani kahauʼniya kavakamo hagaʼamoʼmo nofi alagafati aniʼmoʼa nehiya hagaʼamo alagi ago aeno agaseʼniye. Ani nefalana aniʼmoʼa alagepa atuʼamoʼmo muki alagepa atumo neʼaiya yaʼmo atuʼamo ago aeno agaseʼniye.

¹¹ O aʼnimogae, huʼna, Kavayafatiʼmo lume anumo asagauno neʼaiye. Kavenafuʼnamo afeʼalumelaga lume anuʼe nuʼanuʼeʼmo haneʼniye. Kukenakalegatiʼmo alagepa atumo Lemanoni avefatiʼmo neʼaiya agufa alagepa atumo neʼaiye.

¹² Nasaʼnimoʼmo maige aʼnimo maige huʼniya aʼnimoʼa hoyaleʼmo kegiʼyamoʼa faino vego huʼniya hoyagana huno maige keli kotupi aniʼmo muki vayaʼmogimo oʼnesayafeʼmo ka akani maleʼniya keli kotupi anikana huno maige aniʼmo kanage kanage huno eno haine neʼeya aniteʼmo loki ae maleʼniya anikana huno maige huʼniye.

^13-14 Kagae hoyafati yosamoʼmo alagepa alagamo neʼae. Haga atumo neʼaiya yaʼmo nehage. Magoʼaletiʼmo alagepa atumo neʼaiya yaʼmo alo huge haga neʼyaʼmo alo huge laʼnefamo atafi kaeʼnageno halinamo aiʼnigenoʼaeʼmo alagepa atumo neʼaiya laʼnefamo alo huge nehae.

¹⁵ Kagaemo kanage kanage huno eno haine neʼeya aniʼmoʼa muki hoyafilagamo uno nelamiya anikana huka maige Lemanoni avefatiʼmo emine neʼeya anikana huka maige huʼnane.

¹⁶ Hoga haopalegatiʼmo yasimo alinika eno. Lamaga haopalegatiʼmo yasimo alinikeka hoyaʼnifiʼmo aligenoʼao alagepa atumo neʼaiya yaʼmoʼa muki haopalegamo ailino uneno hino. Nahau nayamopafiʼmo neʼnahaiya vekaʼnimoʼa hoyaʼafatiʼmo eno alagepa yosa alagamo lagino neno.