Salomoni Yokemae 3 - The Keyagana NT and 25 OT books

¹ Haniʼilagamo hipaʼnileʼmo havaeʼneʼnaeʼmo nagupi mafaʼnemoʼmo hau ayamopafiʼmo hauʼniya vekaʼnieʼmo kahauya huʼnovaʼmonanafa oʼageʼnove.

² Nagaemo he tiʼna taonifiʼmo uʼna muki kaʼaleʼmo uʼneʼna nagupi mafaʼnemoʼmo hau ayamopafiʼmo hauʼniya vekanimo kahauya huʼna agegauve, huʼna nagesamo afiʼnove. Nagaemo kahauya huʼnovaʼmonanafa oʼageʼnove.

³ Uʼneʼna nehugeʼapaeʼmo taonifiʼmo uʼeʼa huʼa neʼyagaiya vayaʼmogimo nageʼnageʼnaeʼmo, nagupi mafaʼnemoʼmo hau ayamopafiʼmo hauʼniya vekaʼnimo ageʼnafiye, huʼna ge huʼna apafi geʼnove.

⁴ Nagaemo apataleʼna uvategamo malage huʼna nagupi mafaʼnemoʼmo hau ayamopafiʼmo hauʼniya vekaʼnimo ageʼnove. Nagaemo agaetegamo uʼnaeʼmo agaemo natalesiyafeʼmo oʼnahauʼnigeʼnaeʼmo anu kiʼna maiʼnove. Oʼataleʼna avaleliʼnuʼna alino nateʼniya itaʼnimoʼmo nehavaeya yapilagamo utaʼa haiʼnoʼae.

⁵ Yulusalemu aʼmafaʼne anagane, huʼna, lokiya gefatiʼmo huʼnaeʼmo, afela afumogimo koli huʼa apaune nehaya afu anagaʼmogi nehaya agufa kavafeʼmo lapakesamo afitetapa nahau nayamopafiʼmo neʼnahaiya vekamo aupatiʼmo haunetapa oʼateyo. Agaiʼamo hauʼninageno aupatiʼmo he tigiye.

⁶ Ageyo, huʼna, Ina laʼmo yahaofilagamo aniʼmo ohaneʼniya kotegatiʼmo haine neʼe. Maketiletiʼmo miya nefaiya laʼnefamo atafiʼmo nekaya afinaʼmo alagepa atumo neʼaigeno halinaʼamoʼmo posigana huno haneʼneno halinamo ailinuno nehaiya kava huno haine neʼe.

⁷ Ageyo, huʼna, Mago vayaʼmogi Salomoni siyamo aliniʼa neʼae. Sigisitiʼa Isaleli ati vayaʼmo koli nosaya lokiya ati vayaʼmogimo faiʼa vego huʼa ateliʼa neʼae.

⁸ Muki vayaʼamogimo kame nehaya kavaʼmo ageʼa alagepa huʼnaya vayaʼmogi naipeʼapimo aliniʼa neʼae. Haniʼilagamo afole neʼaiya kavafeʼmo koli nehayaʼmofeʼmo naipeʼapimo apaluteʼmo maleʼnae.

⁹ Kini vekamo Salomoniʼa Lemanoni kotegati aliʼnaya alagepa yosaletiʼmo alini uʼeʼa nehaya siyaʼamo mago aise nokana huno kiʼniye.

¹⁰ Agaemo siluva yafatetiʼmo posiʼamo alo huge goli yafatetiʼmo afeʼalumelagaʼamo alo huge huteno haesa kenaletiʼmo aino ati kae maleʼniye. Yulusalemu aʼmafaʼne anagaʼaifeʼmo hau ayamopafiʼmo hauʼniya kavatetiʼmo yuʼilagaʼamo alagepa huno alo huʼniye.

¹¹ Saiyoni aʼmafaʼne anagane, huʼna, lapakaemo etapa kini vekamo Salomoniʼmo ageyo. Agaemo agenopaleʼmo kini kakolitamo haneʼniye. Kini vekamo Salomoniʼa aʼmo aliʼniya afinaʼmo lusi kava huno amogaga aiʼnigenoʼaeʼmo itaʼamoʼmo ani kakolitamo alino agenopaleʼmo maleno ateteno kini vekamo lekana paino ateʼniye.