Salomoni Yokemae 2 - The Keyagana NT and 25 OT books

¹ Nagaemo Saloni kotega yahaofatiʼmo kahaumoʼmo haesa ausemo neheya ausegana huʼna maige ave aiyamo folagapiʼmo haneʼniya yaveyave kahaumo ausegana huʼna maige huʼnove.

² Aufe kahaumo haneʼniya folagapiʼmo kanale yaveyave kahaumo ausemo haneʼniya kava huno nahau nayamopafiʼmo neʼnahaiya aʼnimoʼmo aʼmafaʼne anagaʼai folagapiʼmo maiʼniye.

³ Alagepa alagamo neʼaeya yosamo yahaofilaga yosamo haneʼniya folagapiʼmo haneʼniya kava huno nahau nayamopafiʼmo neʼnahaiya vekaʼnimo ve mafaʼne anagaʼai folagapiʼmo maiʼniye. Nagaemo lusi yegemo nelegeʼnaeʼmo ani yosamo ulunapiʼmo itopaleʼmo maiʼneʼnaeʼmo lusi kava huʼna namogaga aiʼnove. Ani yosa alagamo lagiʼna neʼnogeno navayafilagatiʼmo lusi kava huno haga neʼnahaiye.

⁴ Agaemo alopa neʼyaʼmo neʼnaya noʼafiʼmo navalelino uno haino nagaefeʼmo hau ayamopafiʼmo hauʼniya kavatefeʼmo kalahauʼmeʼmo nagenopaleʼmo asai maleʼniye.

⁵ Nagaefeʼmo hau ayamopafiʼmo hauʼnigeʼnaeʼmo lokiyaʼnimo alagi ohaneʼniyaʼmofeʼmo nofi alagafati aniʼmo namiteka alika lokiya vaika nato. Alagepa apoli alagamo namigeʼna neʼna falu hino.

⁶ Hoga ayatetiʼmo nageyutega maleteno lamaga ayatetiʼmo nagufaleʼmo natafauno maiʼniye.

⁷ Yulusalemu aʼmafaʼne anagane, huʼna, lokiya gefatiʼmo huʼnaeʼmo, afela afumogimo koli huteʼa apaune nehaya afu anagaʼmogi nehaya kavafeʼmo lapakesamo afitetapa nahau nayamopafiʼmo neʼnahaiya aʼnimo aupatiʼmo haunetapa oʼateyo. Agaiʼamo hauʼninageno aupatiʼmo he tigiye.

⁸ Nahau nayamopafiʼmo neʼnahaiya vekaʼnimo agemo afiʼnove. Agaemo aeno hailo hailo hulino nagu nagu huno aveleʼmo neʼe.

⁹ Nahau nayamopafiʼmo neʼnahaiya vekaʼnimoʼmo kanale afela afugana huno nagu nagu huno neʼe. Ago eno kumateʼmo he tino maiʼnenoʼaeʼmo aise yasi katetiʼmo nopilagamo aulu heno ageʼniye.

¹⁰ Nahau nayamopafiʼmo neʼnahaiya vekaʼnimoʼmo naha paiʼniye. Agaemo naha painoʼaeʼmo, Nahau nayamopafiʼmo neʼnahaiya aʼnimo kanale alagepa aʼnimogae, huno, he tika kumatega emikeka nagaeʼeʼmo magokepi lokaeka eno.

¹¹ Kagaemo yasi kofeʼmo koli osuvo. Koʼmo neʼaiya afinaʼmo ago hano huʼniye.

¹² Hemenimo muki haopalegamo yosamo ausemo ago heʼnigeʼapaeʼmo nama anagaʼmogimo yoke nehae. Kaugoʼyave anagaʼmogimo yoke huʼnageʼapaeʼmo muki haopalegatiʼmo vayatimogimo neʼafiye.

¹³ Fiki yosamoʼa aepa faino alagamo aeʼnigenoʼaeʼmo nofiʼmoʼa ausemo heʼnigeno alagepa atumo aiʼniye. Nahau nayamopafiʼmo neʼnahaiya aʼnimo kanale alagepa aʼnimogae, huno, he tika egetaʼao uguʼae.

¹⁴ Kaugoʼyave namaʼnimo yafakapiʼmo maiʼnane. Aulafi kateʼmo uka haika fala kika maiʼnane. Kanale kaugosamo alika nave ligeʼna ageno. Kagemo alagepa kagemo haneʼnigi kage aigeʼna afino.

¹⁵ Aise afela kala anagaʼmo apatafauka apanu kiyo. Fiku yanageʼa hoyatifiʼmo haiʼeʼa nofiʼmo aliʼa hosu huʼa ategae. Nofitimoʼa saufa alagamo aeʼniyaʼmofeʼmae.

¹⁶ Nahau nayamopafiʼmo neʼnahaiya vekamo nagaiʼni vekaʼnimo maiʼnigeʼna agaiʼa aʼamo maiʼnove. Agaemo sipisipi anagaʼamo apavalelino uʼnigeʼapaeʼmo kanale yaveyave kahaumoʼmo ause heʼniya folagapatiʼmo kahaumo neʼnae.

¹⁷ Nahau nayamopafiʼmo neʼnahaiya vekaʼnimogae, huʼna, oʼnataleka malage huka aika ataginekeka alino fako huno laʼateʼniya avelegamo haikeka kanale afela afugana huka nagu nagu huka egetaʼao nagaeʼeʼmo maime maime neʼvisuʼagenoʼaeʼmo kotisigenoʼaeʼmo hani huʼniya kavaʼmo hano hino.