Neyomi 2 - The Keyagana NT and 25 OT books

Niniva taonimo aliʼa hano huʼa atalesaya kavafeʼmo huʼniya gemae

¹ Ago alagi alino hosu huno neʼataleya vekamoʼmo lapakaeʼeʼmo kame hugiye. Niniva vayane, huʼna, Taonile yafa kegiʼyaleʼmo yagaisaya ati vayaʼmo apavaleta apateyo. Kame vayaʼmo esaya kateʼmo alagepa hutapa yagaiyo. Lapakaemo he titapa lokiya vaita maiʼnetapa kamemo hisayafeʼmo alo hiyo. Ati vayatapimo apavaleta alita anupa hutapa apateyo, huʼna lapa nepauve.

² Asiliya kame vayaʼmogi Isaleli vayaʼeʼmo kamemo huteʼa muki alagepa yaʼapimo aliʼnayaʼmonanafa Ala kava neʼmoʼa hogoteno haneʼniya kava huno Isaleli vayaʼmogi ha le konali yaʼapimo alino afole aino ategaiye.

³ Hamagana huno maiʼniya vekamo ati vayaʼamogi haesa haleguʼmo aliteʼa kamemo hisayafeʼmo haesa kukena yaʼmo vaiʼa aliʼnaya vayaʼmo neʼae. Kame talalaʼapimoʼmo atagana huno nele. Hayoʼapimoʼmo aiyamo neʼae.

⁴ Kame talalaʼapimoʼmo taonifilagamo neʼaya kateʼmo lusi kava huʼa nagu nagu huʼa uteʼeteʼa nehae. Kame talalaʼapimoʼmo ata kanikana huʼa aeʼa ha leʼnageno alaveʼyogana huno aeno halelino uneno nehiye.

⁵ Agaemo ati vayaʼaiteʼmo yagaiʼa apateʼnaya vayaʼaifeʼmo keya aeʼnigeʼa malage huʼa uʼnagenoʼaeʼmo yafaʼmoʼa apaiyafiʼmo hapaeʼniye. Apakaemo nagu nagu huʼa uʼa alopa yafa kegiʼyaleʼmo yagaiʼnae.

⁶ Aniʼmo haneʼniya kitamo yakino ataleʼnigeno lusi kava huno aniʼmo taonifiʼmo uno lamiteno kini vekamo noʼamo alinino uʼniye.

⁷ Gotiʼa hu maleʼniyana kame vayaʼapimogi Kuvini a kanomo atafauʼa avaleliʼa ugae. Avaleliʼa neʼvageʼapaeʼmo aliʼyaʼamo neʼaliya aʼne anagaʼmogimo hosu apaipamo kaliʼnigeʼa kaugoʼyavegana huʼa aviʼyaʼmo nehuʼapaeʼmo yulagefa aiʼapaeʼmo hapaifiʼyaleʼmo amagime amagime uʼa avaleliʼa ugae.

⁸ Akeyaʼvilagamo Niniva taonimo alopa ani keli kotugana huno haneʼniyaʼmonanafa hemenimo vayaʼamo taonifatiʼmo ataleʼa apaune heʼnae. Apakaefeʼmo huʼapaeʼmo, Maiyo, maiyo, huʼa keya aeʼnayaʼmonanafa oʼafiʼa magoke vekamoʼa aino atagineno oʼuʼniye.

⁹ Kame vayaʼapimogimo vayaʼapieʼmo hapa paiʼapaeʼmo, Malage huta muki siluvaʼe goliʼeʼmo aliyo. Ani taonifiʼmo asole kanale yaʼmo hano osisiya yakana huno haneʼnigeno magoʼe magoʼe huno haneʼniye.

¹⁰ Niniva taonimo taoniʼageʼmo haneʼnigeno vayaʼmo oʼmaiʼnae. Muki yaʼmo alagi hosuʼnigeno no atufaʼageʼmo haneʼniye. Niniva taonifi vayaʼmogi lusi kava huʼa koli huʼnagenoʼaeʼmo apaiyamoʼmo atete huge lokiyaʼapimo hano huge huʼnigeno apaugosamoʼmo alino kola paige huʼniye.

¹¹ Niniva vayatama vayaʼmogimo laiyoni anagakana huʼa maiʼnae. Hogoteno ani agufa laiyoni anagaʼmogi nokana huno taonimo haneʼniyana hemenimo haiyateʼmo haneʼniye. Ani vayatama vayaʼmogi alagi ataleʼa uʼnae. Hogoteno ani laiyoni aikeli anagaʼmogimo neʼyaʼmo neʼnaya yategana huno haneʼnigeʼa ve laiyonigi a laiyonigi apanaʼau anagaʼenagi huʼa taonifiʼmo umenitata nehagenoʼaeʼmo magoke vekamoʼmo koli yaʼmo oʼapamiʼniye.

¹² Ani laiyoni anagaʼmogimo afumo haetenoʼaeʼmo a laiyonimoʼe anaʼaumogiʼeʼmo nesayafeʼmo hanino katali huno aise aise huʼniye. Agaemo apanopiʼmo afumo maleno havaite maleʼniye.

¹³ Ala kava neʼmo muki lokiyaʼamo haneʼniya vekamoʼmo Niniva vayaʼaifeʼmo ina ge huno hapa painoʼaeʼmo, Nagaemo kame vekatapimo maiʼnove. Nagaemo muki lapakae talalamo kaeʼna atalege laiyoni aikeli anagatapimo naipeletiʼmo apaige huguve. Nagaemo lapakaeʼeʼmo kame huteʼa alu vayaʼmogimo eʼa muki yatapimo aliʼnaya yaʼmo aliguve. Lapakaemo alu kotega vayaʼmo alita apatesageʼa getapimo aliniʼa visaya vayaʼmogi gemo oʼafigae, huno hapa paiʼniye.