Neyomi 1 - The Keyagana NT and 25 OT books

Ala kava neʼmoʼa alopa Niniva taonimo taonieʼmo aipamo leʼniya gemae

¹ Neyamiʼmo Elikosi taonifiʼmo maiʼniya vekamoʼmo mago alagamuna agegekana agufa kavaʼmo huno Gotiʼa ani kana huʼniya gemo alopa Niniva taonieʼmo ha paiʼniye.

² Ala kava neʼmo kaino gemo nehiya Gotiʼa hosu kavaʼmo anonaʼapilefeʼmo kayoʼmo neʼapamiye. Ala kava neʼmoʼa lusi kava huno aipamo leʼnigenoʼaeʼmo anonaʼapilefeʼmo kayoʼmo neʼapamiye. Ala kava neʼmoʼa kame huʼa atesaya vayaʼmo hosu kavaʼmo anonaʼapilefeʼmo kayoʼmo apamigiye. Agaemo kame vayaʼaeʼmo aipamo leno neʼapateyanageno kayoʼmo apamisiya afinafeʼmo agava maiʼniye.

³ Ala kava neʼmoʼa vase vase huno aipamo leno apategaiyaʼmonanafa lusi kava huno lokiya Gotiʼa maiʼniye. Agaemo hosu kavaʼapilefeʼmo vaiʼapimo haneʼnisiya vayaʼmo afaʼa apakegeno oʼapategaiye. Ala kava neʼmoʼa kaʼaleʼmo neʼvigenoʼaeʼmo alopa yasiʼe koʼeʼmo afole neʼaiye. Mago vekamo uneno nehigenoʼaeʼmo mumusopamoʼmo nehiya agufa kava huno Ala kava neʼmoʼa uneno nehigenoʼaeʼmo hiyaʼmoʼa mumusopagana huno afole neʼaiye.

⁴ Agaemo solovala anifeʼmo ge hauʼnigenoʼaeʼmo inagi solovala aniʼmo nelane. Agaemo alu ani alu aniʼmo uno nelamiya aniʼmo alino laneno neʼatale. Aniʼmo nelanegenoʼaeʼmo alagepa mopamo haneʼniya koʼmo Meyani kotegagi Kamo avemo yahaofilagagi Lemanoni aveʼmo yahaofilagagi huno falu nete. Hoyagi yosagi yosamo ausegi huno muki yaʼamo falu nete.

⁵ Ala kava neʼmoʼa emineʼnigenoʼaeʼmo imimaʼmo aliʼnigeno muki alopa avemoʼmo kanage kanage huge muki aise avefatiʼmo hamaiʼmo alige nehiye. Eno avaʼyi hisiya afinaʼmo ma mopamo leno sagaligiye. He, Agaemo mopaʼe ma mopafi vayaʼeʼmo leno pasagaligiye.

⁶ Agaemo aipamo lesiya afinaʼmo ina laʼmo aulagaleʼmo afaʼa he tino maigiye. Aipamo leno apatesigeʼapaeʼmo haiya vayaʼmo afaʼa maigae. Aipamo leno apateteno kayoʼmo neʼapamiya kavaʼmo atagana huno vayaʼai apakenopaleʼmo asagauno neʼaiye. Aipamo neleya kavaʼmoʼa yafaʼmo aino naku nepae.

⁷ Ala kava neʼmoʼa alagi alagepa vekamo maiʼniye. Agaemo vayaʼamo kana yaʼmo neʼaliya afinaʼmo fala nekiya koʼapigana huno maiʼneno alagepa huno yagaino neʼapate. Agaefeʼmo aliʼa amufa neʼamiya vayaʼaifeʼmo, Vayaʼnimo maiʼnae, huno apakeʼniye.

⁸ Agaemo vayaʼamo apakeʼniyaʼmonanafa alopa aniʼmo hegekana huno Niniva taonimo alino hosu huno atalegaiye. Agaemo kame vayaʼamo apavegala aesigeʼa hani huʼniya kopiʼmo uʼa lamiʼa hosu kava huʼa maigae.

⁹ Lapakaemo Ala kava netegamo kame hutapa atesayafeʼmo na agufa gemo huta ge huge afige hutapa maiʼnae. Agaemo alagi alino hano huno lapatalegaiye. Lapakaemo halate he titapa hanageke kavaʼmo osugae.

¹⁰ Apakaemo aufe kahaumoʼmo aino kiʼniya kava huʼa maige lokiya aniʼmo neteʼa negi nagi nehaya vayaʼmo magokepi lokaeʼa neʼmaiya kava huʼa magokepiʼmo lokaeʼa maige huʼnayanageno atamoʼmo vaiʼniya hiʼyagofafiʼmo neleya kava huno alagi alino hano huno apatalegaiye.

¹¹ Asiliya vayaʼmogitapafatiʼmo mago vekamoʼmo Ala kava netegamo hosu kavaʼmo hisiyafeʼmo ani kavaʼmo huguve, huno huteno agesa afifi nehiya vekamo afole aigiye. Agaemo Ala kava netegamo hosu kavaʼmo huteʼa atalesayafeʼmo Asiliya vayaʼaifeʼmo ina hosu kavaʼmo hiyo, huno hapa paigiye.

¹² Ala kava neʼmoʼa Yuta vayaʼamogifeʼmo ina gemo huno hapa painoʼaeʼmo, Asiliya vayaʼmo asole vayaʼmo alagepa huʼa maiʼa haga nelayaʼmonanafa lokiya vekamo eno apakae folagapiʼmo neʼunoʼaeʼmo alino hano huno apatalegaiye. Nagaemo kayoʼmo ago lapamiʼnovaʼmonanafa magoʼe huʼna kayoʼmo olapamiguve.

¹³ Hemenimo nagaemo Asiliya vayaʼmogimo lokiya vaiʼa yagaiʼa lapateʼnaya kavaʼmo aliʼna hano huʼna atalegauve. Kalavusi aliʼyapatiʼmo hatu maeʼna lapategauve. Nagaemo nofi kiʼa lapateʼnaya nofiʼmo aliʼna kapalu aeʼna ataleʼnove, huno huʼniye.

¹⁴ Inagi Ala kava neʼmoʼa Asiliya kini vekamoʼmo hu maleʼniya kavafeʼmo ina gemo huno ha painoʼaeʼmo, Afamo anaga vayakafatiʼmo magoʼe huʼa mafaʼnemo afole oʼaigae. Kagaemo alagi hosu vekamo maiʼnanaʼmofeʼmo kagae mono nopiʼmo muki gotikagi apauneʼamo aliʼna hano huʼna atalege kanolukamo alo hu malege huguve, huno ha paiʼniye.

¹⁵ O Yuta vayaʼmogitapae, huʼna, Ageyo, mago vekamoʼmo avefiʼmo haneʼniya kotega kateʼmo alagepa faigoko gemo alininenoʼaeʼmo, kame osugayanagi maitapa haga leyo, huno aeno hakalo huno lapa nepaiye. Gotiʼa mono hisayafeʼmo hu maleʼniya hopa afinaʼmo mono hiyo. Lapakaemo Gotifeʼmo ago polomasi gemo hu maleʼnaya kavaʼmo hiyo. Hosu vekamo halate lapakaetegamo oʼmegaiye. Gotiʼa ago alino hosu huno ataleʼniye.