Neniyo 9 - The Keyagana NT and 25 OT books

Gotiʼa Isaleli vayaʼmo hapa maesiyafeʼmo Neniyoʼa nunumuʼmo huʼniya gemae

¹ Naliyasiʼa Sekesi mafaʼnemo Mitiya nofi vekamoʼmo Mamiloni vayaʼaiteʼmo yagaino apatesiyafeʼmo kini vekamo hamaleʼniye.

² Agaemo hogote kafugaʼamo yagaino neʼapategeʼnaeʼmo nagaemo Neniyoʼnamo Ala kava neʼmo mukufi gemo Yelelmaiyaʼa Gotitegati gemo alinineno aeno hakalo huno hapa nepaiya vekamoʼmo avoʼmo kae maleʼniya gemo lekana paiʼna afiʼnovana sevetiʼa kafugamo Yulusalemu taonimo no atufaʼageʼmo hanegaiyaʼmonanafa ani kafugaʼamo utesigenoʼaeʼmo halate afole aigiye, huʼna afiʼnove.

³ Afiteʼnaeʼmo Ala kava netegamo naipa nagesamo amiʼneʼna neʼyaʼmo oʼneʼna mo sige kogu kukenamo vaige laʼnefamo aliʼna falege huteʼna lokiya kava huʼna nunumuʼmo huʼna ge huʼnove.

⁴ Nagaemo Ala kava neʼmo Gotiʼnimofeʼmo nunumu huʼna hosu kavatieʼmo aeʼna hakalo huʼnaeʼmo, O Ala kava nene, huʼna, kagaemo aeka apaka seʼnanageta kagaefeʼmo koli nehuna Gotigae, huʼna, muki afinaʼmo kagaefeʼmo hapau apayamopafiʼmo hapauge keʼaepa gekamo akame huge nehaya vayaʼeʼmo magokepi kotalakemo hu maleʼnana gekamo akame huka kahau huka neʼapatane.

⁵ Lagaemo hosu kavaʼmo huge osisuna agufa kavaʼmo huge hosu kavaʼmo huta lakameʼyamo kamige hiyo, huka laha paiʼnana gemo oʼafige keʼaepa gekamo amagita atalege huʼnone.

⁶ Aliʼyakamo neʼaliya vayaʼmogi kagaetegati gemo alini eʼa kini vayaʼaifenagi yagaiʼa lateʼnaya vayaʼaifenagi laginago vayaʼaifenagi muki vayatiʼenagi huʼa aeʼa hakalo huʼa laha paiʼnaya gemo oʼafiʼnone.

⁷ O Ala kava nene, huʼna, Kagaemo fatago kavaʼageʼmo nehana Gotigamo maiʼnanaʼmonanafa lagaemo muki Isaleli vayaʼmogita hosu kavatimoʼmo muki afinaʼmo alopa lavagage yaʼmo alino nelamiye. Lagaemo Yuta kotega vayaʼmogitaleʼe Yulusalemu taonifi vayaʼmogitaleʼeʼmo hemenimo ani lavagage yaʼmo haneʼniye. Mago vayaʼakamo kataleʼa uʼnayaʼmofeʼmo alika hapa faika apataleʼnanageʼa uʼa haopaleʼmo maige afagitegamo maige huʼnaya vayaʼmogi apavagage hisiya kavaʼmo haneʼniye.

⁸ O Ala kava nene, huʼna, Kini vayatigi yagaiʼa lateʼnaya vayanagi laginago vayanagi lagaitigi huta hosu kavaʼmo huʼnonaʼmofeʼmo lavagage yaʼmo afa aligune.

⁹ Lagaemo kaiyafi oʼmaita kataleta uʼnonaʼmonanafa kahau huka lateteka hosu kavatimo alika ataleʼnane.

¹⁰ Ala kava neʼmo Gotitimogamo aliʼyakamo neʼaliya vayaʼaifeʼmo keʼaepa gekamo hapa paiʼnanageʼa laha paiʼnagetaeʼmo ani kateʼmo oʼuta amagita ataleʼnone.

¹¹ He, muki Isaleli vayaʼmogitamo keʼaepa gekamo ago amagita ataleteta gekamo oʼafisunafeʼmo kataleta uʼnonaʼmofeʼmo Moseseʼmo aliʼyakamo neʼaliya vekamoʼmo keʼaepa gemo lamiʼniya gemo kagoʼyamo ataleteka huʼnana lifana gemoʼmo lagaeteʼmo asagauno aiʼniyana kagaetegamo hosu kavaʼmo huʼnonaʼmofeʼmae.

¹² Kagaemo alopa kana yaʼmo alisunafeʼmo lapakaetegaʼe yagaiʼa lapateʼnaya vayaʼaitegaʼeʼmo huguve, huka laha paiʼnana kavaʼmo lagaetegamo huʼnane. Kagaemo muki ma mopafi vayaʼaitegamo alika afole aika oʼateʼnana agufa kana yaʼmo Yulusalemu taonifi vayaʼmogitaleʼmo alika afole aika ateʼnane.

¹³ Lagaemo muki neʼaluna kana yafeʼmo kagaemo Moseseʼmo amiʼnana keʼaepa gefiʼmo huʼnanaʼmofeʼmo aliʼnonaʼmonanafa kagaemo fikumo laha maeka lamisanafeʼmo ge huta kafi oketa hosu kavatimo oʼataleta lama gekamo akame osuʼnone.

¹⁴ Akame osuʼnonaʼmofeʼmo ani kana yaʼmo alo huka maiʼneka lamiʼnane. Ala kava neʼmo Gotitimogamo muki huʼnana kavaʼmo fatago kavaʼageʼmo huʼnanaʼmonanafa lagaemo gekamo akame osuʼnone.

¹⁵ O Ala kava neʼmo Gotitimogae, huʼna, himamukaletiʼmo vayakamo hatu maeka apateteka Isipi kotegatiʼmo apavalelika eka ala kagikamo aliʼnana Gotitimogamae, huʼna, Lagaemo hosu kavaʼmo huʼnone. Lagaemo hanageke kavaʼmo huʼnone.

¹⁶ O Ala kava nene, huʼna, nunumuʼmo huʼnaeʼmo, fatago kavakalefeʼmo magoʼe huka kaipamo leka olateka magoʼe huka kayamukiki huka aote aveleʼmo haneʼniya Yulusalemu taonifi vayaʼmo oʼapamagiyo. Lagaeʼe laginago vayaʼeʼmo hosu kavaʼmo huʼnonaʼmofeʼmo muki lahaopaleʼmo maiʼnaya vayaʼmogimo huʼa faipa huʼa nelatageno lavagage nehiye.

¹⁷ O Gotiyo, huʼna, Lavagage nehiyaʼmofeʼmo aliʼyakamo neʼaluva vekamoʼnamo nunumuʼmo nehuva gemo afaʼa afiyo. Laha maesanafeʼmo naipafatiʼmo nahauʼnigeʼna magoʼe huʼna nunumuʼmo gemo afaʼa afiteka ala kagikalefeʼmo mono no atufakaeʼmo alagepa huka kagesamo afiteka laha mao.

¹⁸ O Gotiʼnimogae, huʼna, kagetafo huka afiyo. Kaulaga ageka ayakeka kagaika taonimo no atufaʼamo ago. Alagepa vayaʼmo maiʼnonaʼmofeʼmo kagaefeʼmo nunumuʼmo nosunanagi kahau huka neʼapatana kavakalefeʼmo nunumuʼmo nehune.

¹⁹ O Ala kava nene, huʼna, afiyo. O Ala kava nene, huʼna, hosu kavatimo alika atalo. O Ala kava nene, huʼna, afiteka laha mao. Afaʼa oʼmaika kagaikalefeʼmo malage huka aliʼyaʼmo aliyo. Taoniʼe vayaʼeʼmo kagaika yaʼmo haneʼniyaʼmofeʼmae.

Henagaʼamo Mesaiya vekamo afole aisiya kavafeʼmo huʼniya gemae

²⁰ Nagaemo Ala kava neʼmo Gotiʼnimo aulagaleʼmo nunumuʼmo huʼna hosu kavaʼnieʼmo aeʼna hakalo huge Isaleli vayaʼnimogi hosu kavafeʼmo aeʼna hakalo huge Gotiʼnimo aote avelefeʼmo ge huge nehuve.

²¹ Nunumuʼmo nehugenoʼaeʼmo ani hogoteʼna alagamunamo ageʼnova enisole vekamo Gemaliyoʼa nagaetegamo halelino emineʼniye. Gotiʼa alino ateʼnigeno emineno une ofalini nehuna kanaleʼmo uno avaʼyi huʼniye.

²² Agaemo naipa nagesamo huno halo aisiyafeʼmo naha paiʼniye. O Neniyo, huno, nagaemo kagesa afi yaʼmo kamisugeka afiteka ageka halesanafeʼmo emiʼneʼnove.

²³ Gotiʼa kagaefeʼmo lusi kava huno hauʼniyaʼmofeʼmo aepa faika nunumuʼmo nehanagenoʼaeʼmo gekaleʼmo aeno atagaina huno naha paiʼnigeʼnaeʼmo kaha paisuvafeʼmo emiʼneʼnove. Huʼniyaʼmofeʼmo geʼaeʼmo kagesa afifi nehuka alagamuna gemo aepaʼamo afiteka ago.

²⁴ Gotiʼa vayakaʼe aote taonikaleʼefeʼmo sevetiʼa sotamo lekana pai maleʼniye. Ani afinaʼmo agaemo aeno apaka seʼniya aote vekamo uvelimo lakino atesigeʼapaeʼmo Yu vayaʼmogi hosu kavaʼapimoʼmo magoʼe huno havai tesiyafeʼmo magoʼe huʼa hosu kavaʼmo hugae. Ani aote vekamoʼmo hosu kavaʼmo alino hano huno atalege alino nanu aeno apatege hanege hanege huno hanesiya fatago kavaʼamo alino afole aino atege alagamuna agegekana huʼa vayaʼmogi Gotitegati gemo aliniʼeʼa aeʼa hakalo huʼa hapa nepaiya kavaʼmo ohanesiyafeʼmo kameletiʼmo faleno aeno akanino atalege hugiye.

²⁵ Ani kava hugiyaʼmofeʼmo kagaemo afole aisiya kavaʼmo afiteka ago. Halate Yulusalemu taonimo utapa kiyo, huno hisiya afinaʼmo seveniʼa sotamo afole aiteno sigisiti tuʼa sotamo afole aitesigeno Mesaiya vekamo yagaino apatesiya vekamoʼmo aliʼyaʼamo aepa faino aligiye. Hogoteno seveniʼa sotamo afole neʼaisigeʼapaeʼmo alopa hanageke yaʼmo afole aisiya afinaʼmo Yulusalemu kaʼe yafa kegiʼyaʼeʼmo hugae.

²⁶ Inagi sigisiti tuʼa sotamo utesigeʼa Mesaiya vekamo agoti huʼa ateteʼa amagisageno faligiyaʼmonanafa agaiʼalefeʼmo ofaligiye. Falitesigeʼapaeʼmo afole aisiya kini vekamo ami vayaʼamogimo eʼa Yulusalemu taoniʼe mono noʼeʼmo heʼa halagape vaiʼa atalegae. Alopa aniʼmoʼa ani heteno muki yaʼmo alinino neʼviya kava huno ani kamemoʼmo muki yaʼe vayaʼeʼmo alinino ugiye. Gotiʼa hu maleʼniya alopa kana yaʼmo afole aime aime neʼvisigenoʼaeʼmo ani kamemoʼmo hano hugiye.

²⁷ Mago sotafiʼmo agaemo asole vayaʼeʼmo kotalakemo hu malegaiye. Ani sotamo folagapiʼmo afumo amagiʼa ofalini amige alu ofalini amige nehaya kavaʼmo alino hano huno atalegaiye. Mago ami vayaʼmo alagi hosu faipa vayaʼmo afole aisageno kini vekaʼapimoʼa muki yaʼmo alagi alino hosu huno atalesigeno muki mopamo kaʼme kokana huno haneme haneme neʼvisigenoʼaeʼmo atupa afinaʼmo hosu kavaʼmo ani alino hosu huno atalesiya vekaleʼmo asagauno aigiye.