Neniyo 8 - The Keyagana NT and 25 OT books

Neniyoʼmo sipisipileʼe memeleʼeʼmo alagamuna ageʼniya gemae

¹ Melisasaʼmo loleʼe magoʼe kafugamo kini vekamo maiʼnigeʼnaeʼmo nagaemo mago alu kavaʼmo alagamuna agegekana huʼna ageʼnove. Hogote alagamunamo ageteʼna henagaʼamo ageʼnove.

² Ani alagamunamo afole aiʼnigeʼna ageʼnovana nagaemo Ilami kotega alopa Susa taonifiʼmo Ulai aniʼmo agiʼnaleʼmo maiʼnove.

³ Ageʼnovana ani agiʼnaleʼmo mago ve sipisipimo nahaopale maiʼnigeʼna ageʼnove. Lole yatala lokiyaʼamo haneʼniye. Henaga afole aiʼniya lokiyaʼamoʼmo hogoteno afole aiʼniya lokiyaʼamo ago aeno aga seno magoʼe huno yatala huʼniye.

⁴ Ageʼnovana agenopamo ape huʼneno nagu nagu huno uno muki afu anagaʼmo kame huno apateteno aeno apaka seʼniye. Agaemo nagu nagu huno yegemo uno lamino nefaleya haopalegagi lamaga haopalegagi hoga haopalegagi huno uneno huʼniye. Mago afuʼamogimo ani afumo lokiya ayapatiʼmo apakufamo afaʼa aliʼa katiʼa oʼapategae. Agaiʼamo hauʼniya kavaʼageʼmo huteno alopa agi aliʼniye.

⁵ Nagaemo ani kavafeʼmo nagesa alaʼamo neʼafugeno yegemo uno lamino nefaleya haopalegatiʼmo mago ve mememo eʼnigeʼna ageʼnove. Muki haopalega ma mopafiʼmo nagu nagu huʼniyana aginagomoʼmo mopafiʼmo aeno olapaneʼniye. Lokiyaʼamo magokeʼageʼmo alopa lokiyagefamo aulagalaʼmo folagapiʼmo he tino haneʼniye.

⁶ Ani mememoʼa ani agiʼnaleʼmo he tino maiʼnigeʼna ageʼnova sipisipilegamo lusi kava huno ayamukiki huno nagu nagu huno uʼniye.

⁷ Nagaemo ageʼnovana ve sipisipiʼeʼmo kame huʼniye. Ani mememoʼmo lusi kava huno aipa leʼnigeno kame huno ateteno ve sipisipimo lole lokiyaʼalaʼmo ago amagino lo aeno ataleʼniye. Ve sipisipimo kame hisiya lokiyaʼamo ohaneʼnigeno mago alino agoʼya ofaiʼnigeno mememokeʼmo alino mopafiʼmo yaga auno ataleteno aiyaletiʼmo lusi kava huno aeno lata paiʼniye. Mememo ayapatiʼmo ani sipisipimo agufamo afaʼa alino katino atesiya vekamo oʼmaiʼniye.

⁸ Inagi ani ve mememo ala vekamo hamaleʼnigeno lokiya himamuʼamo afole neʼaigenoʼaeʼmo agenopafati alopa lokiyaʼamo lo aeʼniye. Ani lo aeʼniya lokiyaʼmo aimuʼyaleʼmo alu loleʼe loleʼe alopa lokiyaʼamo haineʼniye. Mago lokiyaʼamoʼmo lamaga haopalegamo alino augosa huʼnigeno mago lokiyaʼamoʼmo hoga haopalegamo alino augosa huʼnigeno mago lokiyaʼamoʼmo yegemo haine neʼeya haopalegamo alino augosa huʼnigeno mago lokiyaʼamoʼmo yegemo uno lamino nefaleya haopalegamo alino augosa huʼnigeʼa huʼnae.

⁹ Mago aise saufa lokiyaʼamo ani loleʼe loleʼe lokiyafatiʼmo afole aiʼniye. Ani lokiyaʼamoʼmo kosime kosime uno lamaga haopalegagi yegemo haine neʼeya haopalegagi ha le konali mopalegagi huno uʼniye.

¹⁰ Ani lokiyaʼamoʼmo kosime kosime uno kokuʼnapi ami vayaʼeʼmo kame huno apateno alino yaga auno apataleteno mago kanefi anagaʼmo alino mopafiʼmo yaga auno apataleʼneno aeno lata paiʼniye.

¹¹ Ami vayaʼaiteʼmo neʼyagaiya vekamoʼmo ala agimo neʼaliya kava huno magoke agufa agimo aliteno ani vekamoʼmo agaiʼa agiʼaleʼmo alino asaga huʼniye. Agaemo muki afinaʼae afinaʼaeʼmo ofalini nehaya kavaʼapimo ago alino hano huno ataleteno Goti mono noʼamo alino hosu huno ateʼniye.

¹² Yu vayaʼmogimo hosu kava huʼnayaʼmofeʼmo Gotiʼa Yu ami vayaʼmo alino ani lokiyaʼmo ayapi apateʼnigeno ani lokiyaʼmoʼa muki afinaʼae afinaʼaeʼmo ofalini nehaya kavaʼapileʼmo kame huteno lama gemo alino mopafi yaga auno ataleʼniye. Muki ani kavaʼmo huteno agaemo alagepa huno maiʼniye.

¹³ Inagi nagaemo afiʼnovana mago aote enisole vekamoʼmo ge nehigenoʼaeʼmo alu aote enisole vekamoʼmo ina ge huno ge huno afi geʼniye. Alagamuna gemo hainu afinaʼmo hano hugiye. Na magi afinaʼmo utegeno muki afinaʼae afinaʼaeʼmo ofalini kavaʼapimo magoʼe huno oʼakanigiye. Na magi afinaʼmo utesigeno mono noʼamo aliʼa hosu huʼa neʼataya kavaʼmo hano hugiye. Na magi afinaʼmo utesigeno mono noʼaʼe asole vayaʼeʼmo apaiyaletiʼmo aeʼa lata nepaiya kavaʼmo hano hugiye, huno ge huno afi geʼnigeno

¹⁴ ani ge huno naha paiʼniye. Tu tauseni tali hataletiʼa felugaʼe haniʼilagaʼeʼmo utesigeno mono noʼamo halate alino alagepa huno ategaiye.

Neniyofeʼmo enisole vekamo Gemaliyoʼa alagamuna gemo aepaʼamo ha paiʼniya gemae

¹⁵ Nagaemo Neniyoʼnamo ani alagamuna ageteʼnaeʼmo aepaʼaeʼmo nagesa afiʼna kahauya nehugenoʼaeʼmo malage huno mago vayakana vekamo afole aiteno naulagale he tiʼniye.

¹⁶ Nagaemo afiʼnovana mago vekamoʼmo Ulai anitegatiʼmo ge huʼniye. Agaemo Gemaliyofeʼmo keya aeno ha painoʼaeʼmo, Gemaliyo, huno, alagamuna gemo aepaʼamo afisiyafeʼmo ha paiyo, huno huʼnigeno

¹⁷ nahaopaleʼmo eʼnigeʼnaeʼmo koli huteʼna naugosalegatiʼmo mopafi asagauʼna aiʼnove. Gemaliyoʼmo ani ge huno naha paiʼniye. Vemo mafaʼneo, huno, alagamuna gemo atupa afinaʼmo afole aisiya kavafeʼmae.

¹⁸ Agaemo ge nehigeʼnaeʼmo naugosalegatiʼmo mopafiʼmo nau kaleʼnove. Agaemo name aliteno alino he tino nateʼnigeʼna he tiʼnove.

¹⁹ Agaemo hunoʼaeʼmo, Afiyo, huno, Gotiʼa Isaleli vayaʼaifeʼmo aipamo leno apatesiya kavaʼmo atupa afinaʼmo afole aisiya kavafeʼmo kaha nepauve. Gotiʼa lekana pai maleʼnisiya afinaʼmo hano hugiye.

²⁰ Kagaemo mago lole lokiyaʼamo haneʼniya ve sipisipimo ageʼnane. Lole lokiyaʼamo haneʼniya kava huno Mitiya kini vayaʼe Pesiya kini vayaʼeʼmo maiʼnae.

²¹ Ve mememo maiʼniya kava huno Galiki kini vayaʼmogi yagaiʼa neʼapataya koʼamo haneʼniye. Lole aulagalaʼmo folagapiʼmo alopa lokiyaʼamo haneʼniya agufa kava huno Galiki vayaʼai hogote kini vekamo maiʼniye.

²² Ani alopa gamani lokiyaʼamo lo aesigeno aimuʼyaleʼmo loleʼe loleʼe lokiya gamani afole aigae. Ani kavaʼmo aepaʼamo haneʼniyana Galiki gamanifatiʼmo aliʼa fako huʼa loleʼe loleʼe gamani afole aigae. Hogote kini vekamoʼa lokiya himamuʼamo aliʼniya agufa kava huʼa oʼaligae.

²³ Ani foʼa kini vayaʼmogi yagaiʼa apatesaya atupa afinaʼmo gemo amagiʼa neʼatalaya vayaʼai hosu kavaʼapimoʼmo ko sino alopa nesigenoʼaeʼmo mago kini vekamo afole aigiye. Ani kini vekamo lokiya augosaʼe vekamoʼmo humi apategaiye.

²⁴ Agaemo lokiya himamuʼamo hanegaiyaʼmonanafa agaiʼa lokiya himamuʼamo ohanegaiye. Agaemo vayaʼmo alaʼamo apamagiteno asole yaʼapimo alino hosugiye. Hausiya kavaʼmo alagike huteno alagepa huno maigiye. Agaemo lokiya vayaʼe Goti apaote vayaʼaʼeʼmo kamitimo apamagigiye.

²⁵ Agaemo aigofe gemo hapa paiteno humi apategaiye. Nagaemo aeʼna apaka seʼna hogote vekamo maiʼnove, huno aipafiʼmo agesamo afigiye. Asole vayaʼmogimo, afaʼa maigune, huʼa apakesamo neʼafisagenoʼaeʼmo agaemo alagepa huʼa maiʼnisaya vayaʼmo alino hano huno apatalegaiye. Agaemo koli osuno yagaiʼnaya kini vayaʼaiteʼmo yagaiʼniya kini vekalegaʼeʼmo kame huno ategaiyaʼmonanafa aeno aga osegaiye. Ma mopafi vayaʼmogi kamitimo oʼamagisiyaʼmonanafa faligiye.

²⁶ Haniʼilagaʼe neteʼeʼmo afole aisiya kavafeʼmo ageʼnana alagamuna gemo alagi lama gemae. Yatala afinaʼmo utesigenoʼaeʼmo ani kavaʼmo afole aigiyaʼmofeʼmo mani alagamuna gemo hapa opaika afaʼa ato, huno naha paiʼniye.

²⁷ Nagaemo Neniyoʼnamo naunena aiteno yatala afinaʼmo kaita nahauʼniye. Henagaʼamo he tiʼna kini vekamo aliʼyaʼamo aliʼnove. Nagaemo alagamuna ageʼnova kavafeʼmo nahau aiteʼna nagesa alaʼamo neʼafuvaʼmonanafa muki vayaʼmogi aepaʼamo oʼafiʼnae.