Neniyo 7 - The Keyagana NT and 25 OT books

Neniyoʼmo loleʼe loleʼe afu anagaʼaiteʼmo alagamuna ageʼniya gemae

¹ Melisasaʼmo hogote kafugaʼamo Mamiloni kote kini vekamo maiʼnigenoʼaeʼmo Neniyoʼa haniʼilagamo hipale havaeʼnenoʼaeʼmo mago alagamuna ageʼniye. Ani alagamuna gemo ava geʼeʼmo aepaʼaʼefeʼmo avoʼmo kae maleʼniye.

² Neniyoʼmo hunoʼaeʼmo, Nagaemo mago alagamuna ageʼnovana loleʼe loleʼe yasimo kokuʼnapati alinineno solovala aniteʼmo aliʼnigeno solovala aniʼmoʼmo aino holakau holakau huʼniye.

³ Inagi loleʼe loleʼe alopa alu afu alu afumo ani solovala anipatiʼmo afole aiʼnae.

⁴ Hogoteno laiyonigana agufa afumoʼa hakiki namamo hakugana huno haneʼniya afumo afole aiʼniye. Nagaemo ageʼna maiʼnogeʼa hakumo aliʼa ataleteʼa vayakana huʼa aiyaletiʼmo aeʼa he tiʼa ateʼnae. Apakaemo vayaʼmogi aipa agesamo amiʼnae.

⁵ Napa tu afumo meyagana agufa afumo malage huno afole aiʼniye. Ani afumoʼa aeno hatuto huno maiʼniye. Avayafiʼmo loleʼe magoʼe haipa ayamufamo hanino aliʼniye. Mago vayaʼmogimo agaefeʼmo huʼapaeʼmo, He tika asole apameʼmo hanika hatagauka no, huʼa huʼnae.

⁶ Afole aiʼnigeʼna ageʼnovana alu afumo alopa afela pusimo lepati pusimo afole aiʼnigeʼna ageʼnove. Loleʼe loleʼe namamo hakumo akamelegamo haneʼnigeno loleʼe loleʼe agenopamo haneʼniye. Ani afumoʼa muki koteʼmo yagaisiyafeʼmo lokiyaʼamo amiʼnigeno aliʼniye.

⁷ Afole aitegeno napa fo afumo afole aiʼnigeʼna ageʼnove. Ani afumo alopa hosu afumo lokiya afumo maiʼnigeʼa ageteʼapaeʼmo lusi kava huʼa koli huʼnae. Agaemo alopa aeni aveʼmo haneʼnigeno muki yaʼmo hapaeno kutala aitenoʼaeʼmo atupa yaʼaleʼmo aiyaletiʼmo aeno lata paiʼniye. Ani afumo hogoteʼa afole aiʼnaya afugana osuʼnifa aeto agufa afumo maiʼnigeno agenopafiʼmo naya loleʼa lokiyaʼamo haneʼniye.

⁸ Nagaemo lokiyaʼamo ageteʼnaeʼmo nagesamo neʼafugenoʼaeʼmo mago aise lokiyaʼamo ani folagapatiʼmo afole aiʼniye. Ani saufa lokiyaʼmoʼmo hogoteʼa haneʼnaya lokiyafatiʼmo loleʼe magoʼe lokiyaʼamo aepafatiʼmo aeno akaino atale atale huʼniye. Ani saufa lokiyaʼamoʼa vayaʼmogita laulagagana huno aulagamo haneʼniye. Avayafatiʼmo himuʼnamu gemo huʼniye.

Neniyoʼa akeyaʼvilagamo neʼmaiya Gotiteʼmo alagamuna ageʼniya gemae

⁹ Nagaemo ageliʼna ageliʼna uʼnovana mago kini siyakoʼmo aliniʼeʼa maleʼnae. Akeyaʼvilagamo neʼmaiya Gotiʼa eno fai maiʼniye. Kukenaʼamoʼmo hiyakana huno yaveyaveʼage huteno agenopa ayokaʼmoʼa sipisipimo ayokakana huno magoʼe huno yaveyave huʼniye. Siyaʼafiʼmo kale aiyagana huno haneʼnigeno ani siyapatiʼmo alopa atamo le teno

¹⁰ aulagaleʼmo aeno ha lelino uʼniye. Asole tauseniʼa vayaʼmogi aliʼyaʼamo aliʼnageʼapaeʼmo agae aulagaleʼmo asole asole miliyoniʼa vayaʼmo he tiʼa maiʼnae. Agoti gemo afisaya vayaʼmo fai maiʼnageno asole mukumo alino vaga leʼniye.

¹¹ Nagaemo aulu heʼna ageʼnovana napa fo afumo lokiyaʼamoʼmo lusi himuʼnamu gemo huʼnigeʼna afiʼnove. Nagaemo apakovana apakaemo ani napa fo afumo kamitimo amagiteʼa asagauʼa atafi yaga auʼa ataleʼnageno alagi leno saga liʼniye.

¹² Mago loleʼe magoʼe afu anagaʼmogi yagaiʼa apatesaya lokiyaʼapimo aliʼa hano huʼa apateteʼa afaʼa apateʼnageʼa magoʼe afinaʼmo maiʼnae.

¹³ Haniʼilagamo nagaemo ani ageʼnova alagamunafiʼmo vemo mafaʼnegana huʼna mago vekamo ageʼnove. Agaemo hiyateʼmo eno akeyaʼvilagamo neʼmaiya Gotitegamo eʼnigeʼa avaleliʼuʼa Goti aulagaleʼmo ateʼnae.

¹⁴ Ani akeyaʼvilagamo neʼmaiya vekamoʼmo ani vekamo alino kini vekamo ateteno ha le konali yaʼe yagaino apatesiya himamuʼeʼmo amiʼniye. Muki vayanagi muki nofi vayaʼenagi muki alu apakemo alu apakemo neʼaiya vayanagi huʼa aiyafi maisageno yagaino apatesiyafeʼmo alino ateʼniye. Agaemo muki afinaʼmo yagaino apateno alagi yagaino apateno hano osugiye. Yagaino apatesiya kavaʼmo afaʼa aliʼa oʼatalegae.

¹⁵ Nagaemo Neniyoʼnamo ani alagamuna ageʼnogenoʼaeʼmo naipamoʼmo lusi kava huno kana huʼnigeʼna nagesa alaʼamo afiʼnove.

¹⁶ Nagaemo he tiʼa maiʼnaya vayaʼai hapaopaleʼmo uʼna mago vekaeʼmo ani kavafeʼmo ge huʼna afi geʼnove.

¹⁷ Afi geʼnogeno ani ge huno naha paiʼniye. Ani loleʼe loleʼe alopa afu anagakana huʼa loleʼe loleʼe kini vayaʼmo afole aigae.

¹⁸ Afole aigayaʼmonanafa aeno apaka seno alagi anaga Goti apaote vayaʼamogi yagaiʼa apatesaya lokiyaʼapimo aliteʼa alagi yagaiʼa apateʼa hano osugae, huno naha paiʼniye.

¹⁹ Nagaemo ani gemo ago afiteʼnaeʼmo napa fo afumo ava gemo afisuvafeʼmo huʼnove. Agaemo alu afu anagagana osuno mago aeto agufa afumo maiʼniye. Agaemo alopa hosu afumo lokiya afumo maiʼnigeʼa ageteʼapaeʼmo lusi kava huʼa koli huʼnae. Alopa aeni aveʼmo haneʼnigeno muki yaʼmo hapaeno kutala aiteno atupaʼaleʼmo aiyaletiʼmo aeno lata paiʼniye.

²⁰ Agenopafiʼmo naya loleʼa lokiyaʼamo haneʼnigeno mago lokiyaʼmo ani folagapatiʼmo afole aiʼnigeʼapaeʼmo loleʼe magoʼe lokiyaʼamo asagauʼa aiʼnae. Ani aulagaʼe avayaʼeʼmo haneʼniya lokiyaʼmoʼa himuʼnamu gemo huʼniye. Ani lokiyaʼmoʼa mago lokiyaʼamo ago aeno apaka seno afole aiʼnigeʼa ageʼnae.

²¹ Nagaemo aulu heʼna ageʼnovana ani lokiyaʼmoʼmo Goti apaote vayaʼalegamo kame huno apateteno aeno apakaseʼnigeʼna ageʼnove.

²² Aeno apaka selino apaka selino neʼvigeno akeyaʼvilagamo neʼmaiya Gotiʼa eno agoti huno apateteno alino fako huno apaote vayaʼmo alino asagauno apateteno lokiya vekamo alino afepi ateʼniye. Ani afinaʼmo aeno apaka seno alagi anaga Gotiʼa apaote vayaʼamogi yagaiʼa apatesaya lokiyaʼapimo apamisigeʼa yagaiʼa apatesaya afinaʼmo afole aiʼniye.

²³ Inagi naha paiʼniya vekamoʼmo magoʼe gemo naha painoʼaeʼmo, Napa fo afole aisiya afumoʼa muki ma mopafi vayaʼaiteʼmo yagaino apatesiya gamanimae. Ani gamanimoʼa yagaino apatesiya kavaʼmoʼa alu vayaʼmogi neʼyagaiya agufa kavaʼmo osugifa mago alu kava hugiye. Ani gamanimoʼmo muki ma mopafi vayaʼaina aeno apaka seteno apamagino aino katali huno aise aise huno alino hano huno apatalegaiye.

²⁴ Ani afumo naya loleʼa lokiyaʼamo haneʼniya kava huʼa ani gamanifatiʼmo naya loleʼa kini vayaʼmo afole aigae. Apakamelegatiʼmo mago kini vekamo afole aigiye. Ani kini vekamoʼmo hogoteʼa afole aiʼnaya kini vayakana huno oʼmaigifa alu kava huno maigiye. Agaemo naya loleʼa kini vayaʼaipatiʼmo loleʼe magoʼe kini vayaʼaina kame huno apateteno aeno apaka segaiye.

²⁵ Agaemo aeno apaka seno alagi anaga Gotitegamo himuʼnamu gemo huge aeno apaka seno alagi anaga Goti apaote vayaʼalegamo aini huno apatege afinaʼe keʼaepa geʼeʼmo aliʼna alu afinaʼe alu keʼaepa geʼeʼmo malegauve, huno agesamo afige hugiye. Gotiʼa apaote vayaʼamo apavaleno ayapiʼmo apatesigeno loleʼe magoʼe kafugagi sigisiʼa kaigi huno yagaino apategaiye.

²⁶ Yagaino apategaiyaʼmonanafa kokuʼnapi vayaʼmogi agoti gemo afisaya vayaʼmo fai maiteʼa yagaino apatesiya lokiyaʼamo aliʼa hano huʼa ataleteʼa aliʼa agoʼya lagauʼa atalegae.

²⁷ Inagi aeno apaka seno alagi anaga Gotiʼa muki kini vayaʼmogi yagaiʼa neʼapataya kavanagi lokiyaʼapigi ala apakiʼapigi huno vayaʼamo apamigiye. Agaemo muki afinaʼmo yagaino apatesigeʼa muki kotega vayaʼmogi aiyafiʼmo maiteʼa geʼamo akame hugae, huno naha paiʼniye.

²⁸ Muki ani ageʼnova alagamuna geʼnimo haiʼmae. Nagaemo Neniyoʼnamo nagesamo neʼafugenoʼaeʼmo naipafatiʼmo lusi kava huʼnigeʼna aeto agufa naugosamo kaliʼnovaʼmonanafa vayaʼaifeʼmo hapa opaiʼnofa afaʼa naipafiʼmo haneʼniye.